Aarbecht & Liewen

D’DP setzt sech dofir an, datt d’Bierger hiert Privatliewen an hire Beruff besser matenaner verknäppe kënnen. Dat bedeit méi Zäit fir Famill, Frënn a Fräizäit an an engems Succès am Beruff.

Covid-Lutte ass um richtege Wee – Op der liberal-sozialer Schinn virufueren
De „Lëtzebuerger Wee“ – also e Mix vun Impfung a sanitäre Reegelen – ass déi richteg Manéier am Kampf géint d’Pandemie. Dat sot eise Fraktiounschef Gilles Baum op der Bilans-Pressekonferenz vum Chambergrupp vun der DP.

Eenzelthemen

Aarbecht

Beruff a Privatliewe matenee verbannen

D’DP ass sech der Tatsaach bewosst, datt vill Leit haut eng nei Virstellung vun hirer Aarbecht a vun hirem Liewen hunn. De Wonsch no Flexibilitéit a no Auszäite passt neméi bei déi rigid 9to5-Aarbechtszäiten, déi vu mueres 9 bis owes fënnef Auer ginn. D’DP gesäit déi gréissten Erausfuerderung fir de Lëtzebuerger Aarbechtsmaart doranner, datt Aarbecht, Famill a Fräizäit musse besser matenaner verbonne ginn. Ma och d’Betriber an d’Entreprenariat brauche méi Flexibilitéit bei der Organisatioun vun den Aarbechtszäiten, fir sech dem wirtschaftlechen Ëmfeld unzepassen.

D’Flexibiliséierung an e finanziell besser ënnerstëtzte Congéparental hu schonn duerzou gefouert, datt 70% méi Eltere vum neie Congépartenal profitéieren. Besonnesch den Undeel vun de Pappen, déi den neie Congéparental huelen, ass enorm an d’Luucht gaangen. Aner Verbesserunge concernéieren déi aussergewéinlech Congésdeeg: De Pappecongé bei der Gebuert vun engem Kand ass vun 2 op elo 10 Deeg gehéicht ginn, de Mammecongé gouf generell vun 8 op elo 12 Woche verlängert an de Congé, wann d’Kanner krank sinn, ass méi flexibel gemaach ginn. Fir d’DP waren dat wichteg éischt Schrëtt, fir den Eltere méi Zäit mat hire Kanner z’erlaben.

Mir wäerten d’Aarbechtsrecht esou moderniséieren, datt et den haitege Virstellungen an der Realitéit vun de schaffende Leit entsprécht, an datt och d’Entreprise méi Fräiraum kréien. Mir wëllen déi Entscheedungen am Sozialdialog huelen. Mir wäerte schonn haut d’Aarbechtswelt vu muer preparéieren, esou datt d’Entreprisen an d’Mënschen d’Gewënner vun der digitaler Aarbechtswelt sinn.

Méi gewuer ginn

Benevolat

D’DP ass sech bewosst, wéi wichteg de Benevolat an eiser Gesellschaft ass an dofir wëlle mir déi vill Fräiwëlleg an hirer Aarbecht ënnerstëtzen. Mir wäerten dofir e Kadergesetz fir d’Fërderung vun de Benevollen ausschaffen, an deem déi aktuell Reglementatiounen a staatlech Ënnerstëtzunge vereenheetlecht ginn. Mir wëllen och nei Motivatioune schafen, fir d’Fräiwëllegenaarbecht méi attraktiv ze maachen.

 

Méi gewuer ginn

Famill

Eng besser Verknäppung vu Beruff a Famill

Wärend der Regierungsperiod 2013-2018 huet d’DP d’Familljepolitik moderniséiert. Déi Politik vu virdrun huet net méi den Erausfuerderunge vun der haiteger Gesellschaft entsprach an huet esouguer deels onsécher Situatiounen ënnermauert. Den Aarmutsrisiko –zemol vun Elengerzéiende mat Kanner –huet e Paradigmewiessel an der Familljepolitik verlaangt, deen et den Elteren erméiglecht, fir Beruff a Famill besser matenaner ze verknäppen. Virun allem Kanner aus aarmutsbedräete Famillje si vu Nodeeler oder schouleschen Echecke bedräet a riskéieren dofir och Echecken am Beruff.

E wesentleche Faktor fir de Bien-être vun de Kanner, ass d’Zäit, déi d’Eltere mat hirem Nowuess verbrénge kënnen. Dofir huet d’DP konkrete Moossname getraff, fir datt d’Eltere méi Zäit fir hir Kanner kënnen hunn. D’Flexibiliséierung an déi finanziell Verbesserunge vum Congé parental hunn duerzou gefouert, datt 70% méi Eltere vum neie Congé parental profitéieren. Dobäi ass besonnesch den Undeel vu de Pappen, déi den neie Congé parental ufroen, staark an d’Luucht gaangen. Aner Verbesserunge betreffen déi aussergewéinlech Congésdeeg. De Pappecongé bei der Gebuert vun engem Kand ass vun 2 op 10 Deeg erhéicht ginn. De Mammecongé no der Gebuert ass generell vun 8 op 12 Wochen erhéicht ginn an de Congé fir d’Eltere vu kranke Kanner ass méi flexibel organiséiert ginn. Fir d’DP war dat en éischte Schrack, fir den Eltere méi Zäit mat hire Kanner z’erlaben.

D’DP steet fir eng nohalteg a responsabel Familljepolitik, an där d’Kanner am Mëttelpunkt stinn. Eent vun de wichtegsten Ziler vun eiser Politik ass d’Chancëgläichheet, déi d’DP awer net op finanziell Leeschtunge fir d’Famillje beschränkt. D’DP setzt verstäerkt op Sachleeschtungen an op eng qualitativ héichwäerteg, ëffentlech Offer an der Kannerbetreiung. An den nächste Jore wäert d’DP weider Mesuren ëmsetzen, fir datt d’Elteren hiert Privat- an hiert Beruffsliewe kënne besser matenaner verbannen.

Méi gewuer ginn

Gesondheet a Rettungswiesen

E séieren Accès zu enger qualitativ héichwäerteger Medezin

An der Gesondheetspolitik leet d’DP de Fokus op e séieren Accès vun de Patienten zu enger qualitativ héichwäerteger Medezin. Gläichzäiteg huet fir d’DP déi laangfristeg Ofsécherung vum Gesondheets- a Rentesystem déi héchste Prioritéit.

An der aktueller Legislatur huet d’DP sech fir däitlech Verbesserungen am Gesondheetssystem agesat. Am Kader vum neie Spidolsplang huet d’DP beispillsweis fir eng regional flächendeckend Versuergung an eise Spideeler gesuergt. D’Offer u basismedezineschen Déngschter ass ausgebaut ginn. Doriwwer eraus hu mir eis fir e méi staarkt Matsproocherecht vun den Dokteren a vun der Personaldelegatioun an de Verwaltungsréit vun de Kliniken agesat. Opgrond vun héijen Iwwerschëss an der Gesondheetskeess konnten doriwwer eraus d’Leeschtungen am Beräich vun der Zännmedezin ausgebaut ginn.

D’Leeschtunge vum Lëtzebuerger Gesondheetssystem zielen zu den avantagéiste weltwäit a kënnen sech international weise loossen. D’DP gëtt sech domadder awer net zefridden a wäert de Gesondheetssystem weider verbesseren. Besonnesch bei der Effikassitéit an der Transparenz ass am Gesondheetswiesen nach vill Loft no uewen. E Mangel un Datë bei de Qualitéitsstandarden, mëttelméisseg Qualitéitsdaten an en onverhältnesméisseg héijen administrativen Opwand maachen de Wee hin zu neien, innovativen an besoinsorientéierte Betreiungskonzepter an der Medezin an an der Fleeg méi schwéier. D’DP wäert sech dofir staarkmaachen, datt voll besate Waardezëmmer an der Urgence a méintelaang Waardezäite fir en IRM oder e CT-Scan net méi virkommen.

Opgrond vun der demographescher Entwécklung an enger Liewenserwaardung, déi ëmmer méi an d’Luucht geet, waarden déi nächst Joren nei Erausfuerderungen op d’Gesondheetswiesen. De Gesondheetssystem wäert an Zukunft mat Sécherheet méi staark an Usproch geholl ginn an deemno och méi deier ginn. Fir eng flächendeckend, éischtklasseg Patienteversuergung unzebidden, wäerte mir an Zukunft méi geziilt a méi effikass an eise Gesondheetssystem investéieren. D’DP wäert dofir besonnesch op d’Méiglechkeete vun der Digitaliséierung zeréckgräifen. Ganz nom Motto: „Virsuerg ass déi beschte Medezin“ , wäerte mir däitlech Moyenen an d’Gesondheetspreventioun an an -fërderung investéieren.

Méi gewuer ginn

Inklusioun

Fir d’DP ass d’Inclusioun e Mënscherecht. Fir eis ass et en zentraalt Uleies, datt Mënsche mat spezielle Besoine kënnen um gesellschaftleche Liewen deelhuelen. All Bierger soll iwwerdeem e méiglechst selbstbestëmmt Liewe féiere kënnen. Den DP-gefouerte Familljeministère huet d’Iddi vun der Inclusioun an de leschte fënnef Joren virubruecht an déi am Joer 2011 ratifizéiert UNO-Behënnerterechtskonventioun konsequent ëmgesat. Esou ass e Bilan gezu ginn – zesumme mat de Vertrieder vun der Zivilgesellschaft an den zoustännege ministerielle Servicer – iwwert d’Ëmsetzung vum Aktiounsplang fir behënnert Leit. Fir datt Mënsche mat Limitten an eeler Leit kënnen ouni Problem um gesellschaftleche Liewe participéieren, huet d’DP d’Ëmsetzung vun neie Mesuren ausgebaut, déi en fräien Zougang – ouni Barrièren – zu ëffentleche Plazen erlaben.

Weider ass e Gesetz op den Instanzewee bruecht ginn, fir eng Assistance zur Inclusioun op der Aarbecht. Entreprisëkréien deemno unerkannten Experten zur Verfügung gestallt, déi d’Aglidderung vu Persoune mat engem Behënnertestatut oder Leit, déi an der Reinsertioun sinn, ënnerstëtzen. D’DP huet schliisslech d’Unerkennung vun der däitscher Gebäerdesprooch als offiziell Sprooch zu Lëtzebuerg duerchgesat. D’DP geet iwwregens mam gudde Beispill vir: Op eise Kongresser ass allkéiers eng Iwwersetzung an der Gebäerdesprooch an eise Kuerzwalprogramm gëtt an der sougenannter „Leichten Sprache“ publizéiert. Doriwwer eraus ass eise Walprogramm an enger Audio-Versioun disponibel.

 

Méi gewuer ginn

Integratioun a Zesummeliewen

D’Flüchtlingskris war eng grouss Erausfuerderung fir déi europäesch a fir déi lëtzebuergesch Politik. Am Joer 2015 hu sech d’Demanden op international Protektioun am Verglach mat 2014 méi wéi verduebelt; vu ronn 1.000 op bal 2.500. Eist Land huet mussen d’Opnam an d’Integratioun vun dëse Leit garantéieren. D’DP-gefouert Regierung huet an dëser Krisenzäit Responsabilitéit iwwerholl. An enker Zesummenaarbecht mat de Gemengen huet de Familljenan Integratiounsministère eng kohärent Politik vum Accueil a vun der Integratioun assuréiert. Déi substantiell Erhéijung vum Personal vum OLAI (Office luxembourgeois de l’accueil et de l’intégration) huet d’Viraussetzunge geschaf, fir e mënschewierdegen Accueil an eng kompetent Betreiung vun de sëlleche neien Demandeurs d’asile. Fir d’Integratioun vun de Flüchtlingen ze fërderen, huet de Familljeministère (an Zesummenaarbecht mam Bildungsministère) de „parcours d’intégration accompagné“ (PIA) ausgeschafft. Den neien „Lëtzebuerger Integratiouns- a Sozialkohesiounszenter“ (LISKO) iwwerdeems, ass e Lien zu de Sozialbüroen an Associatiounen an ënnerstëtzt esou d’Integratioun op Gemengenniveau.

D’DP wäert sech och an Zukunft fir e respektvollt an tolerant Matenaner asetzen an déi gesellschaftlech Participatioun vun alle Bierger ënnerstëtzen. Mir wäerten eis wieder géint d’Ongerechtegkeeten an eiser Gesellschaft asetzen an all Diskriminéierung bekämpfen.

 

Méi gewuer ginn

Senioren an drëtten Alter
Soziales
Weiderbildung a Life long learning
Digitalisatioun

Ënnert der Responsabilitéit vun der DP huet d’Regierung mat der Initiativ „Digital Lëtzebuerg“ e wichteg Grondstee fir déi digital Zukunft geluecht. Lëtzebuerg huet eng global digital Strategie, déi alleguerten d’Beräicher ofdeckt –vun der Informatiséierung vun de Staatsverwaltungen iwwer d’Fërderung vun digitale Kompetenzen bis bei d’Entwécklung vu neie Kompetenznischen. 

D’DP wäert an Zukunft vun der Digitaliséierung profitéieren, fir d’Wirtschaft méi breet opzestellen. Wéinst der Produktivitéit, déi wieder wiisst, wäerte mir de Wuesstem méi op Qualitéit ausriichten. D’Tatsaach, datt Google Lëtzebuerg als Standuert fir en Datenzenter consideréiert, weist, datt d’Efforte vun der DP-gefouerter Regierung fir eist Land zu engem digitalen Hub ze maachen, Friichten dréit. D’DP wäert den ICT-Standuert Lëtzebuerg weider ausbauen.

D’DP wäert dofir suergen, datt och d’Aarbechtswelt vum digitale Wandel profitéiert. Mir wäerten nei, flexibel Aarbechtsmodeller fërderen, déi eréischt duerch d’Digitaliséierung méiglech ginn. Zu Lëtzebuerg solle méi Aarbechtsplazen duerch d’Digitaliséierung an duerch d’Robotiséierung bäikommen, wéi där aler ewechfalen. Eng Offensiv an der Weiderbildung soll dofir suergen, datt d’Salariéëbeschtméiglech op d’Aarbecht vun der Zukunft preparéiert sinn.

 

Méi gewuer ginn

Sport

Sport a Beweegung: E gesond Liewe fërderen

D’DP moosst dem Sport eng héich gesellschaftspolitesch Bedeitung zou. De Sport fërdert d’Gesondheet, vermëttelt Toleranz a Teamgeescht, hëlleft sozial Diskrepanzen z’iwwerwannen an ass e wichtegen Integratiounsfaktor. Mir wëllen dës Bedeitung bei de Leit stäerken an de Breede-, Leeschtungs-, a Behënnertesport an deem Sënn fërderen.

Déi finanziell Ënnerstëtzung fir d’Jugendaarbecht ass an der leschter Legislaturperiod ganz vill an d’Luucht gesat ginn. Mat der Aféierung vum „Subside Qualité Plus“ ass de Montant vun der Ënnerstëtzung u kloer Ausbildungskritäre vun de Trainere geknäppt ginn. Fir déi lokal Veräiner ass dëst een zousätzlechen Ureiz, fir an eng qualitativ héichwäerteg Betreiung vun de jonke Sportler z’investéieren.

Nieft de Veräiner sinn och d’Sportsverbänn Piliere vum Lëtzebuerger Sport. Dës grouss Verantwortung gëtt dagdeeglech vun ee puer wéinege Fräiwëllege gedroen, ouni där hiren onermiddlechen Asaz keng Kompetitioun am Land méi kéint stattfannen. D’Federatioune stousse besonnesch bei den administrativen Uspréch un hir Grenzen. Mir wäerten dofir d’Sportsverbänn ënnerstëtzen, fir sech méi professionell opzestellen an d’Professionaliséierung vum Verbandssport an deem Sënn virundreiwen.

D’DP wëll och dem Beweegungsmanktem bei de Kanner konsequent entgéintwierken. De Manktem u kierperlecher Aktivitéit ass zu engem eeschte Problem vun de Famillje ginn. D’Konsequenze gi vun enger schlechter Fitness iwwer eng schlecht Kierperhaltung, bis zu enger schlechter Leeschtungsfäegkeet. Mir wäerten dofir d’Beweegungserzéiung, bannent a baussent vun der Schoul, extra ënnerstëtzen.

Méi gewuer ginn

YouTube

By loading the video, you agree to YouTube's privacy policy.
Learn more

Load video

Corinne Cahen & Nora Back (Aarbecht & Liewen)

Déi 1. Episode mat der Familljeministesch Corinne Cahen & Nora Back – Generalsekretärin vum OGBL a Presidentin vun der Chambre des Salariés, geet iwwert de Sozialdialog, d‘Work-Life-Balance an d’Roll vun der Fra an eiser Gesellschaft.

Kaffispaus - Gratis ëffentlechen Transport

YouTube

By loading the video, you agree to YouTube's privacy policy.
Learn more

Load video