Weiderbildung a Life long learning

Weiderbildung a Life long learning

„Digital Learning Centers“ an e Bildungsscheck an der Erwuessenebildung aféieren

Den technologesche Wandel ass eng Erausfuerderung fir d’Entreprisen a hir Beschäftegt. Dofir wëll d’DP „Digital Learning Centers“ mat enger digitaler Bildungsplattform schafen, iwwert déi ee ka fräi op Programmer (Uni Lëtzebuerg, Erwuessenebildung, IFEN oder INAP) zeréckgräifen. An dësen Zentere sollen iwwerdeems vun technesche Ressource profitéiert ginn (z.B. Toun- oder Videostudioen), fir eegestänneg digital Inhalter ze schafen.

 

De Schwéierpunkt vun dësen Zenteren gëtt op déi digital Aus- a Weiderbildung geluecht. Duerch d’Aféiere vun engem Bildungsscheck wäert d’DP all Salariée gratis Cours ubidden, deen an d’Grondlage vun der digitaliséierter Beruffswelt aféiert.

„Digital Learning Hub“ – en digitale Kompetenzzenter fir Lëtzebuerg schafen

Zu Lëtzebuerg gëtt et net genuch qualifizéiert Personal, dat den Ufuerderungen am ICT-Secteur gerecht gëtt. Fir dee Problem ze léisen, wäert d’DP den „Digital Learning Hub“ grënnen, also en digitale Kompetenzzenter fir Lëtzebuerg. D’Aufgab vun deem Zenter wäert doranner bestoen, fir noutwenneg Inhalter fir digital Formatiouns- a Weiderbildungscoursen auszeschaffen, (Héich-)Schoulen a soss Instituter ze beroden a fir Enseignanten ze forméieren.

D’Qualitéit vun der Formation professionelle continue sécherstellen

D’DP wäert an Zesummenaarbecht mat de Beruffschamberen eng Akreditéierungs-Agence schafen, fir d’Qualitéit vun der berufflecher Weiderbildung z’ënnerstëtzen a fir d’Transparenz um Marchévun der Weiderbildung ze sécheren. Just nach akkreditéiert Ubidder an akkreditéiert Formatioune kënnen da vun enger staatlecher Subventioun profitéieren.

Erwuessenebildung stäerken

De Wee zu enger Gesellschaft, déi um Wësse baséiert, féiert iwwert d’Weiderbildung an de Lifelong Learning. D’DP wäert dofir d’Erwuessenebildung zu Lëtzebuerg ausbauen. Dobäi soll méi staark vun de Raimlechkeete vun de Schoulen aus dem Secondaire profitéiert ginn. Den zoustännege Service vum Ministère wäert déi Offere koordinéieren. Iwwert de Wee vun enger Validatioun vun de fréiere Schoulresultater, vun der Beruffserfarung a vun de Weiderbildungen, sollen d’Salariéen d’Méiglechkeet fir eng méi héich Qualifikatioun kréien. Dofir mussen déi néideg Strukturen a Kontrollorganer geschafe ginn. Dës Funktioun dierf de Staat net aus der Hand ginn.

Zentrum fir politesch Bildung ausbauen

Dës Regierung huet den Zentrum fir politesch Bildung geschaf. Déi positiv Akzenter vun dëser Institutioun mussen an Zukunft weidergefouert an ausgebaut ginn. Fir d’DP soll déi politesch Bildung méi en héije Stellewäert an alle Bildungsberäicher kréien.

Deelen:

Share on facebook
Facebook
Share on twitter
Twitter
Share on linkedin
LinkedIn
Share on email
Email
Share on whatsapp
WhatsApp