D’Grompereproduktioun hei am Land

D'Gromper ass eng vun deene populäerste Kulturen hei am Land. Eis Deputéierten Gusty Graas an André Bauler hunn den Här Landwirtschaftsminister an enger parlamentarescher Fro notamment gefrot wéi héich eise Versuergungsgrad un Iessgromperen hei am Land ass.

„D’Gromper ass eng vun deene populäerste Kulturen hei am Land. Besonnesch am Éislek gi vill Zorte Grompere gesat a recoltéiert. 2022 war leider eent vun deenen dréchensten, déi mir an de leschte 50 Joer erlieft hunn. Dat wäert wuel net ouni Konsequenze fir eis Grompereproduktioun ausbliwwe sinn an och en Impakt op déi kommend Rekolten hunn.

An deem Kontext wollte mir dem Här Landwirtschaftsminister folgend Froe stellen:

  • Ass et dem Här Landwirtschaftsminister méiglech fir zu dësem Zäitpunkt en detailléierten Iwwerbléck iwwer d’Grompereproduktioun vum Joer 2022 jee no Zort ze liwweren? Wéi huet si sech am Verglach zu de vergaangene Joren entwéckelt?
  • Wéi héich schätzt den Här Minister eise Versuergungsgrad un Iessgromperen hei zu Lëtzebuerg an? Riskéiert deen net eventuell duerch déi wuessend Bevëlkerung zréckzegoen? Wa jo, missten net Ustrengunge gemaach ginn, fir d’Eegeversuergung op engem eenegermoossen héije Niveau ze halen?
  • Mat wat fir enge finanziellen Hëllefe kann een de Gromperebauer méi geziilt entgéintkomme fir hir Produktioun ënner anerem besser op dréche Summere virzebereeden?
  • Firwat gëtt d’Gromper net als Geméis unerkannt? Wëll den Här Minister dat eventuell änneren?
  • Ass den Här Minister de Moment am Gespréich mat Grompereproduzente fir hir spezifesch Suergen z’erfaassen an esou op dës reagéieren ze kënnen?“

Ass et dem Här Landwirtschaftsminister méiglech fir zu dësem Zäitpunkt en detailléierten Iwwerbléck iwwer d’Grompereproduktion vum Joer 2022 jee no Zort ze liwweren? Wéi huet si sech am Verglach zu de vergaangene Joren entwéckelt?

Bei der Grompereproduktioun muss zu Lëtzebuerg tëschent 2 Produktiounsrichtungen ënnerscheet ginn: de Setzgromperen an den Iessgromperen. D’Entwécklung vun deenen 2 Produktiounen iwwert déi lescht 5 Joer ass an der Grafik festgehalen.

D‘Ubaufläche vun Iessgrompere sinn tendenziell steigend. Hei si just Inlandsflächen duergestallt. Bei de Setzgrompere geet d’Ubaufläch zeréck. Hei ass och ze vermierken, datt bei de Setzgromperen am Duerchschnëtt 20 % Auslandsflächen an der Grafik mat ofgebillt sinn. Des Fläche ginn awer vu lëtzbuerger Betriber bewirtschaft. Bei de Setzgrompere ginn am Duerchschnëtt vun de leschte 5 Joer 80 % vun der Produktioun an d’Ausland exportéiert.

En detailléierten Iwwerbléck vun der Produktioun no Zort ass just am Beräich vun de Setzgrompere méiglech, well des Flächen alleguerte bei der Administration des services techniques de l’agriculture ugemellt musse ginn. An der Tabell sinn d’Zorten, déi 2022 als Setzgromperen ugemellt gi si mat de jeeweilegen Ubaufläche resuméiert. Do och erëm mat Auslandsflächen, déi vu lëtzebuerger Betriber bewirtschaft ginn.

Wéi héich schätzt den Här Minister eise Versuergungsgrad un Iessgromperen hei zu Lëtzebuerg an? Riskéiert deen net eventuell duerch déi wuessend Bevëlkerung zréckzegoen? Wa jo, missten net Ustrengunge gemaach ginn, fir d’Eegeversuergung op engem eenegermoossen héijen Niveau ze halen?

Wann een d’Zuele vun der lëtzebuerger Iessgrompereproduktioun an d’Importer an d’Exporter vun net verschaffte Grompere kuckt, da kann ee vun engem Eegeversuergungsgrad vun ongeféier 40 % an der Moyenne vun de leschte 5 Joer ausgoen. Wann een di verschaffte Forme vun Iessgrompere géing dobäihuelen, da wier dee Prozentsaz awer warscheinlech ee Stéck méi niddreg.

Mat wat fir enge finanziellen Hëllefe kann een de Gromperebauere méi geziilt entgéintkommen, fir hir Produktioun ënner anerem besser op dréche Summere virzebereeden?

D’Gomperebauere kënnen hir Produktioun géint Ertragsausfäll duerch d’Dréchent verséchere fir finanziell Aboussen zum Deel auszegläichen.

Och wann déi Versécherung d’Produktioun vu Gromperen net ofséchert, sou hëlleft se dem Produzent dach weider bei ongënschtege Wiederphenomener. De Landwirtschaftsministère iwwerhëllt 65 % vun der Versécherungsprimm, an am Joer 2022 ware ronn 200 ha vun enger Versécherungspolice couvréiert.

Firwat gëtt d’Gromper net als Geméis unerkannt? Wëll den Här Minister dat eventuell änneren?

Am europäesche Kader gëtt d’Gromper net als Geméis unerkannt, dowéinst ass et national net méiglech, datt d’Grompereproduzente vun de selwechte Flächeprimme profitéiere kënnen ewéi d’Geméisproduzenten.

Ass den Här Minister de Moment am Gespréich mat Grompereproduzente fir hir spezifesch Suergen z’erfaassen an esou op dës reagéieren ze kënnen?

Jo, ganz rezent woren 2 Entrevuen mat Synplants fir sech iwwert hier spezifesch Suergen auszetauschen. Eng weider Réunion mat allen Secteuren, dorënner och Synplants, wäert den 9. Januar 2023 stattfannen.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...