KI an der Landwirtschaft 

Den André Bauler an de Luc Emering wollte vun der Landwirtschaftsministesch wëssen op kënschtlech Intelligenz elo schonn an der Landwirtschaft an am Wäibau genotzt gëtt a wéi eng Sparten am meeschten dovunner betraff wäerte sinn an der Zukunft. Ausserdeem hunn déi zwee Deputéiert och nogefrot wéi et mat der Weiderbildung fir d'Aarbechter an dësem Beräich ausgesäit.

Fro

„D’kënschtlech Intelligenz (KI) wäert an Zukunft ëmmer méi Deeler vun eiser Gesellschaft betreffen, sou datt zimmlech all berufflech Acteuren net derlaanscht kommen, fir sech domat ze befaassen a sech an deem Sënn och weiderzebilden.

An deem Kader wollte mir der Madamm Ministesch fir Landwirtschaft, Ernärung a Wäibau folgend Froe stellen:

– A wat fir engem Mooss sinn eis Landwirtschaft, awer och eis Gäertner a Wënzer elo scho vun der KI betraff?

– Wéi gesäit de Moment d’Weiderbildung an deem Beräich konkret aus?

– A wat fir enge Sparte vun der Landwirtschaft kéint d’KI zu enger (spierbarer) Entlaaschtung vun eise Baueren, Gäertner a Wënzer féieren?“

Äntwert

A wat fir engem Mooss sinn eis Landwirtschaft, awer och eis Gäertner a Wënzer elo schonn vunder KI betraff?

An der Landwirtschaft, am Gaardebau an am Wäibau ginn et mëttlerweil vill KI-Uwendungen, déi sech an de Betriber, jee no Struktur a Gréisst, etabléiert hunn. De Betribsleeder huet vill Entscheedungen ze treffen, déi den Ertrag vun de Kulturen oder de Gesondheetsstatus vu senge Béischte beaflosst. Bei dëse Managementdecisioune ka KI hëllefräich si fir Donnée’n ze verschaffen, ze ergänzen an duerzestellen. Sou kënnen Entscheedungen oft besser a méi einfach geholl ginn, wat e positiven Effekt op d’Produktioun, a punkto Nohaltegkeet, Wirtschaftlechkeet, a Klimaschutz huet. 

Um Feld sinn déi modern Trakteren a Maschinnen oft mat Sensoren equipéiert, déi hir Aarbechtsprozesser iwwerwaachen an optiméieren. Et ass zum Beispill méiglech, op Basis vu Sensordaten a GPS-Koordinaten, dat ënnerschiddlecht Ertragspotenzial op engem Feld ze bestëmmen. Dëst erlaabt et Saatgut, Planzeschutzmëttel oder Dünger méi geziilt auszebréngen, andeems d’Maschinn automatesch d’Doséierung upasst. 

Eng App op Basis vu kënschtlecher Intelligenz, déi de Wënzer beréit, wéi en d’Riewen optimal schneide soll, steet kuerz virun der Kommerzialiséierung. Zënter Jore ginn zu Lëtzebuerg Prognosemodeller an der Landwirtschaft agesat, fir Planzekrankheeten, Planzewuesstem a Beiekrankheet virauszesoen, ënner anerem op Basis vun den Donnéeë vun de Wiederstatioune vun der ASTA. Dës Informatioune ginn de Baueren, Gäertner a Wënzer iwwer agrimeteo.lu an aner Kanäl zur Verfügung gestallt a liwwere wichteg Elementer fir nohalteg Bewirtschaftungsentscheedungen ze treffen. 

An der Déiereproduktioun kënne KI-gestëtzten Applikatiounen zu enger besserer Déieregesondheet an Déierewuel bäidroen a sou natierlech d’Effizienz verbesseren. Vill Betriber setzen haut scho Sensoren an, wéi zum Beispill Halsbänner a Pedometer, fir d’Aktivitéit vun hire Kéi ze moossen. Dëst erlaabt, Réckschlëss op de Gesondheetszoustand vun den eenzele Kéi ze zéien. Och am Melkroboter a Melkstand gi ganz vill Daten erfaasst. Dës Systemer signaliséieren dem Bauer, wa gréisser Ofwäichunge vum normale Verhalen optrieden. Sou kënne metabolesch Problemer bei Kéi mat Zäit erkannt ginn, an duerch eng ugepasste Fidderung kann dësen entgéint gewierkt ginn. Doduerch kann den Asaz vu Medikamenter an Antibiotiken reduzéiert ginn. 

Des Weidere gräift den am Kader vun der Agrarreform vun 2023 agefouerten Area Monitoring System (AMS), deen an de landwirtschaftleche Verwaltungen SER an ASTA genotzt gëtt, op kënschtlech Intelligenz zeréck. An dësem System gi Satellittebiller vum europäesche Copernicus-Programm benotzt, wat et erméiglecht, Aktivitéiten op de landwirtschaftleche Flächen automatiséiert ze iwwerwaachen. Obwuel dëse System haaptsächlech eng Kontrollfunktioun huet, kann en de Betriber d’Aarbecht erliichteren, andeems een Ännerungen direkt selwer am System kann androen, ouni se iwwer d’Verwaltung mussen ze mellen. 

Wéi gesäit de Moment d’Weiderbildung an deem Beräich konkret aus? 

D’Weiderbildungsmoossnamen, déi vun de landwirtschaftlechen Organisatioune fir de Secteur organiséiert ginn, kënnen laut Artikel 72 vum Agrargesetz mat bis zu 100% vun de fërderfähegen Käschte subventionéiert ginn. An dësem Kader hu mir bis elo kee Cour subventionéiert, deen sech ausschliisslech mat der Thematik KI befaasst huet. 

Aktuell lafen 13 Fuerschungs- an Innovatiounsprojete, déi vum Landwirtschaftsministère finanzéiert ginn, an deene konkret KI agesat gëtt. Den Output vun dëse Projete steet alleguer den Acteure vum Agrarsecteur zur Verfügung. Duerch dës Projete kënnen d’Baueren, Gäertner a Wënzer schonn haut vu KI-generéiertem Wëssen an hirer deeglecher Aarbecht profitéieren. Bei dëse Projeten spillt d’Wëssensvermëttlung un de Bauer, Gäertner a Wënzer eng wichteg Roll. 

A wat fir enge Sparte vun der Landwirtschaft kéint d’KI zu enger (spierbarer) Entlaaschtung vun eise Baueren, Gäertner a Wënzer féieren? 

D’Äntwertelementer zu dëser Fro sinn an der 1. Fro enthalen. 

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...

Wéi vill Frae gi wärend der Schwangerschaft an Dispens gesat ?

D’Aarbechtsrecht gesäit vir, datt schwanger Fraen op der Aarbecht verschidden Tâchen net iwwerhuelen dierfen. D’Gesetz gesäit dofir een Amenagement vun der Aarbechtsplaz vir oder eng Reaffektatioun op een anere Posten. Ass béides net méiglech, da muss d’Fra an Dispens gesat ginn.
D’DP-Deputéiert Corinne Cahen a Carole Hartmann wollte vun der Gesondheetsministesch ënnert anerem wëssen, wéi vill Frae pro Secteur an Dispens gesat ginn, wéi oft ee Recours géint eng Dispens vum Patron agereecht gouf an opgrond vu wéi enge konkrete Krittären d’Aarbechtsdokteren eng Dispens decidéieren.

weiderliesen...

Sollten den LNS a Privatlaboe bei Biopsien net méi zesummeschaffen?

Fir der laanger Waardezäit bei der Analyse vu Biopsien entgéint ze wierken, huet den LNS, deen hei ee Monopol huet, eng Rei Mesüren en place gesat.
D’DP-Deputéiert Mandy Minella an Dr Gérard Schockmel hu bei der Gesondheetsministesch nogefrot, wéi een Impakt dës Mesüren op d’Waardezäiten haten an ob net awer eng gréisser Zesummenaarbecht mat Privatlaboen envisagéiert sollt gi fir d’Delaie weider ze verkierzen.

weiderliesen...

Kee Remboursement méi fir dermatoskopesch Fotoen ?

Am Kader vun der Ënnersichung bei engem Hautdokter kënne Fotoe vu verdächtege Plazen op der Haut gemaach ginn, wou de Risiko besteet, datt sech Hautkriibs entwéckele kéint. Dem DP-Deputéierte Gusty Graas gouf elo zougedroen, datt dës Fotoen net méi vun der Krankekeess rembourséiert ginn. An enger parlamentarescher Fro un d’Gesondheetsministesch wëll de liberale Politiker ënnert anerem gewuer gi firwat dës Decisioun geholl gouf a wéi vill Patienten esou Fotoe beim Hautdokter an de leschte 5 Joer rembourséiert kruten.

weiderliesen...