Wéi vill Loyer bezilt de Staat?

An enger parlamentarescher Fro un den Här Finanzminister froen d’Deputéiert André Bauler a Corinne Cahen wéi vill Loyeren a Chargë fir Ministèren an Administratiounen de Staat bezilt, ob ee gedenkt an Zukunft éischter ze kafen a wéi et ëm eidel stoend Gebaier steet.

Nodeems de Staat d’Gebai vum Santésministère an der Darwinstrooss op der Cloche d’Or kaaft huet, wollte mir dem Här Finanzminister folgend Froe stellen:

  • Wéi vill Loyeren a Chargen huet de Staat am Joer 2023 fir Gebaier an deene Ministèren an Administratiounen dra si bezuelt?
  • Ass de Staat an Zukunft drop ugewise fir weider Raimlechkeete fir seng Verwaltungen ze lounen oder versicht de Staat éischter op de Wee ze goe fir nei Gebailechkeeten ze kafe respektiv op sengen eegenen Terraine bauen ze loossen?
  • Wéi vill Gebaier, déi dem Staat gehéieren oder vum Staat gelount ginn, stinn den Ament eidel?
  • Wat gedenkt d’Regierung mat deene Gebaier ze maachen, déi aktuell eidel stinn?

Äntwert

Wéi vill Loyeren a Chargen huet de Staat am Joer 2023 fir Gebaier an deene Ministèren anAdministratiounen dra si bezuelt?

Duerch d‘Loyerskommissioun am Finanzministère huet de Staat aktuell ongeféier 320 Loyerskontrakter lafen. Dobäi handelt et sech awer net nëmmen ëm Bürosgebaier an Hale fir Ministèren an Administratiounen, mä och ëm Schoulinfrastrukturen. 

De Gesamtloyer fir d’Joer 2023 beleeft sech dobäi op ongeféier 78 Milliounen Euro. D’Chargë si méi schwéier ze erfaassen, well dës deels vun den Occupanten, deels vun der Loyerskommissioun bezuelt ginn. 

Ass de Staat an Zukunft drop ugewise fir weider Raimlechkeete fir seng Verwaltungen zelounen oder versicht de Staat éischter op de Wee ze goe fir nei Gebailechkeeten ze kaferespektiv op sengen eegenen Terraine bauen ze loossen?

De Wuesstum vum Land, dee parallel natierlech och déi noutwendeg Astellunge beim Staat mat sech bréngt, generéiert ëmmer nees nei Demanden, Extensiounen, Regruppementer wéi och Transformatioune vun Gebailechkeeten. 

D’Loyerskommissioun an de Comité d’acquisition sinn an deem Kontext gefuerdert fir dës Demanden ze evaluéieren an ze kucken wat weider soll gelount oder kaf ginn. 

D’Lokatioun mat Kafsoptioun ass eng vun de Méiglechkeete fir sech ee Gebai ze sécheren, dat duerno net zwéngend a Staatsproprietéit muss iwwergoen. 

De Ministère fir ëffentlech Bauten, zesumme mat der Verwaltung fir ëffentlech Bauten baut awer och nei Gebaier op Staatsterrainen. 

Wéi vill Gebaier, déi dem Staat gehéieren oder vum Staat gelount ginn, stinn den Amenteidel?

Aktuell sti wéineg Gebaier, déi dem Staat gehéieren, eidel. Bei deenen engen ass dat just temporär de Fall, well de Chantier fir d’Renovéierungsaarbechten nach net konnt ufänken. Fir aner Gebaier lafen aktuell Etuden fir dës ëmzeplangen en vue vu Renovatiounsaarbechten fir eng eventuell Reaffektatioun. 

Am Fall vu gelounte Gebaier ginn dës Verträg gekënnegt, sou bal se net méi gebraucht ginn. 

Wat gedenkt d’Regierung mat deene Gebaier ze maachen, déi aktuell eidel stinn? 

Wa Gebaier eidel stinn, dann ass dat doduerch geschëlt, well entweder Aarbechte musse realiséiert ginn oder detailléiert Analyse musse gemaach ginn, ier iwwer d’Zukunft vun dëse kann diskutéiert ginn. 

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Gëtt een zweete PET-CT ugeschaaft?

Déi fréier Gesondheetsministesch hat matgedeelt, datt eventuell een zweete PET-CT ugeschaaft kéint ginn, fir d’Waardezäit fir d’Patienten ze verkierzen. D’DP-Deputéiert André Bauler a Carole Hartmann hu bei der aktueller Gesondheetsministesch nogefrot, wou d’Uschafung vun dësem zweete PET-CT drun ass, ob dësen Apparat eventuell an d’Spidol zu Ettelbréck kéint kommen a wéi sech d’Zuel vun de Behandlungen an de leschten 10 Joer an deem Beräich entwéckelt hunn.

weiderliesen...

Wier eng Sensibiliséierungscampagne géint Allergië sënnvoll ?

Ëmmer méi Leit entwéckelen Allergien, op Liewensmëttel, Pollen oder Milben. D’DP-Deputéiert Carole Hartmann huet bei der zoustänneger Ministesch nogefrot, wéi sech d’Zuel un Allergiker an de leschten zéng Joer entwéckelt huet, ob eng Sensibiliséierungscampagne lancéiert sollt ginn, a wéini déi annoncéiert Pollen-App fir déi betraffe Leit disponibel wäert sinn.

weiderliesen...