Fro
„Sou wéi vill Géigenden a Mëtteleuropa ass och eist Land vun enger staarker Dréchent betraff. Dee leschte grousse Reen ass effektiv am Februar erofgaang. Am Mäerz huet et kaum gereent. Kee Wonner, datt d’Biedem de Moment schnaufdréche sinn. Eng änlech Situatioun gouf et fir d’läscht am Abrëll 2007 an am Fréijoer 2017.
An deem Kader wollte mir der Madamm Ministesch fir Landwirtschaft, Ernärung a Wäibau folgend Froe stellen:
- Wéi schätzt d‘Madamm Minister d’Lag hei zu Lëtzebuerg de Moment an? Wat fir eng Kulturen si besonnesch vun der Dréchent betraff? Trëfft dat a speziellem Mooss op de Spargel zou?
- Bei wat fir enge Kulture riskéiert déi aktuell Dréchent zu irreparabele Schied ze féieren?“
Äntwert
Am Mäerz huet et iwwer Land ongeféier 80% manner gereent wéi an der Klimaperiod 1991-2020 (Asselbuer -80%, Kënzeg -89% an d’Stad Lëtzebuerg -80%). Nëmmen an der Muselgéigend war den Defizit manner staark, zu Réimech war dat ee Réckgang vun 38%. D’Dréchent huet sech haaptsächlech op flaachgrënge Biedem gewisen, déi net vill Waasser späichere kënnen.
Wëll di landwirtschaftlech Kulturen eréischt um Ufank vun hirer saisonaler Entwécklung waren, sinn hei méiglech Schied elo nach ganz schwéier anzeschätzen. Di kal Nuechten hunn de Planzen hier Entwécklung hei warscheinlech méi ausgebremst wéi d’Dréchent. Dat ass och de Fall beim Spargel, dee jo a méi déiwe Biedem geplanzt gëtt, an deenen nach Waasserreserven zur Verfügung stoe missten.
Am Wäibau hu just missten déi jonk Wéngerts-Planzen, déi dëst Joer geplanzt goufen, plazeweis bewässert ginn.
