Keng Remuneratioun fir divers Trainer a Physiotherapeuten aus de Centres de Formation vun de Sportverbänn?

Rezent konnt een noliesen dass divers Leit déi an de centres de formation vun der Lëtzebuerger Sportswelt engagéiert sinn iwwert Méint ewech keng Sue fir hir geleeschte Prestatioune kritt hunn. DP-Deputéiert Claude Lamberty a Carole Hartmann hunn beim Sportminister nogefrot wat et mat der Interpretatioun vum concernéierten arrêté gouvernemental, dee säit méi wéi 20 Joer aktiv ass, op sech huet.  

Fro

„ Wéi aus engem offizielle Bréif ervirgeet an dono och vun der Presse opgeworf gouf, krute Leit déi an de centres de formation vun der Lëtzebuerger Sportswelt engagéiert sinn iwwert Méint ewech keng Sue fir hir geleeschte Prestatiounen. Dëst well anscheinend eng nei Interpretatioun vun engem arrêté gouvernemental, dee séit méi wéi 20 Joer aktiv ass, vum Sportsministère gemaach gouf.

An deem Kader wollte mir dem Här Sportsminister folgend Froe stellen:

  1. Wéi genee ass d’Prozedur an den Oflaf bis elo gewiescht fir dass déi Suen déi an de centres de formation vun de Sportverbännvun Trainer a Physiotherapeutegeleescht ginn och bei de betraffenen Acteuren ukoumen ?
  2. Wat war an der Vergaangenheet d’Liesaart a wat genee ass elo déi nei Interpretatioun vum arrêté gouvernemental ?
  3. Sinn déi Responsabel vum Sportlycée, de Sportverbänn an dem COSL iwwert déi nei Interpretatioun informéiert ginn ?
  4. Säit wéini gouf déi nei Interpretatioun applizéiert? Wéi vill Leit sinn/ware vun der neier Interpretatioun concernéiert ? Si mëttlerweil all Prestatiounen déi geleescht gi sinn och ausbezuelt ginn ?
  1. Wéi ka séchergestallt ginn, dass déi betraffe Leit hir Prestatiounen an Zukunft och sécher bezuelt kréien?
  2. Denkt de Minister drun eng ganz nei gesetzlech Basis fir d’Zukunft ze schafen?
  3. Wa jo, wat gëtt envisagéiert? Ginn de COSL an aner Gremien aus der Sportswelt mat abezufir dass méiglechst vill Informatiounen aus der Praxis vun der Sportswelt direkt consultéiert ginn a sech Probleemer esou evitéiere loossen?“

Äntwert

  1. Wéi genee ass d’Prozedur an den Oflaf bis elo gewiescht fir dass déi Suen déi an de Centres de formation vun de Sportverbänn vun Trainer a Physiotherapeute geleescht ginn och bei de betraffenen Acteuren ukoumen?

Wat elo d’Prozedur, respektiv den Oflaf vum Bezuele vun den Indemnitéite vun de verschiddenen Intervenanten an de Centres de formation ubelaangt, esou kommen iwwer de Sportlycée, deen zoustänneg ass fir d’Koordinatioun vun de federale Centres de formation, Deklaratiounen an de Sportsministère eran, déi monatlech vun den Intervenante selwer ausgefëllt ginn a vun engem Delegéierte vum Verband dann zertifiéiert ginn. D’Direktioun vum Sportlycée zertifiéiert an approuvéiert dann déi dozougehéierend Deklaratiounen.

D’Finanzdivisioun vum Sportsministère saiséiert dann déi eenzel “Ordres de paiement” fir d’Liquidatioun vun den Indemnitéiten an d’Weeër ze leeden.

No der Ënnerschrëft vum “Ordonnateur”, dee laut de Bestëmmunge vum Artikel 22 vum ofgeännerte Budgetsgesetz vum 8. Juni 1999, d’Kompetenz huet fir Ausgaben z’engagéieren, liquidéieren an ordonnancéieren, an dëst ënnert senger Verantwortung, an deen och d’gesetzlech Verflichtung fir d’Legalitéit an d’Regularitéit vu sengem Handelen huet, ginn d’”Ordres de paiement” da weider un de Finanzkontroller, deem säi Rôle och am Budgetsgesetz festgehalen ass, fir Visa a Virement vum entspriechende Betrag op de Kont vun deem jeeweilegen Intervenant, dëst dann iwwer d’”Trésorerie de l’État”.

Wann et sech bei den Intervenanten ëm Staatsbeamten handelt, dann ass nach eng zousätzlech Etapp erfuerderlech. Ier dës Indemnitéiten, “cumuls” genannt, kënne weider goe bei de Finanzkontroller fir Visa, muss ofgewaart gi bis eng Autorisatioun vum Regierungsrot virläit. Dës Autorisatioune ginn am Prinzip eemol am Mount ausgestallt. Dono leeft dann déi selwecht Prozedur bis zu der Iwwerweisung un.

  1. Wat war an der Vergaangenheet d’Liesaart a wat genee ass elo déi nei Interpretatioun vum Arrêté gouvernemental?

Den Arrêté gouvernemental op dee sech hei bezu gëtt, ass en Arrêté vum 21. Dezember 2001 mat Effet op den 1. Januar 2002, aus enger Zäit an där d‘Centres de formation nach vun der Ecole Nationale de l’Education Physique et des Sports (ENEPS) geréiert gi sinn, a wou et de Sportlycée nach net gouf, dee bekanntlech duerch d’Gesetz vum 21. Juli 2012 geschafe ginn ass.

Dëst erkläert dann och, datt dësen Arrêté vun 2001 verschiddentlech interpretéiert ka ginn an eigentlech net méi der Zäit ugepasst ass.

  1. Sinn déi Responsabel vum Sportlycée, de Sportverbänn an dem COSL iwwert déi nei Interpretatioun informéiert ginn?

Prinzipiell ass dëst allen Acteure scho bekannt gewiescht, et gouf och schonn u verschiddene Piste geschafft fir dëst ze regulariséieren. Zulescht war dëst och e Sujet an der Sitzung vum 13. Juni 2022 vum Koordinatiounscomité vum Sportlycée, wou Vertrieder vum Sportlycée, Sportsministère, Educatiounsministère a COSL vertruede sinn.

  1. Säit wéini gouf déi nei Interpretatioun applizéiert? Wéi vill Leit sinn/ware vun der neier Interpretatioun concernéiert? Si mëttlerweil all Prestatiounen déi geleescht gi sinn och ausbezuelt ginn?

Op de 25. Juli 2022 ware 40 Deklaratioune vu 27 Intervenante fir eng Gesamtzomm vun 39.793,58 € am suspens am Sportsministère. An Tëschenzäit ass dann och d’Autorisatioun vum Regierungsrot do fir déi sougenannten “Cumulsdeklaratiounen” vun enger Gesamtzomm vu 7.039,65 €, déi dann och wäerten, nom Visa vum Finanzkontroller, déi nächst Woch kënnen iwwerwise ginn. Dee Moment sinn all Prestatiounen ausbezuelt.

  1. Wéi ka séchergestallt ginn, dass déi betraffe Leit hir Prestatiounen an Zukunft och sécher bezuelt kréien?

Dëst ass an Tëschenzäit séchergestallt, well de Regierungsrot a senger Sëtzung vum 7. September 2022 een ugepassten Arrêté ugeholl huet.

  1. Denkt de Minister drun eng ganz nei gesetzlech Basis fir d’Zukunft ze schafen?

Am Sënn vun der Rechtssécherheet wäert kuerzfristeg eng gesetzlech Basis geschafe ginn, fir d’Indemnitéite vun den Intervenanten an de Centres de formation per groussherzoglecht Reglement ze reegelen.

  1. Wa jo, wat gëtt envisagéiert? Ginn de COSL an aner Gremien aus der Sportswelt mat abezu fir dass méiglechst vill Informatiounen aus der Praxis vun der Sportswelt direkt consideréiert ginn a sech Problemer esou evitéiere loossen?

Dëse Schrëtt ass scho gemaach a wäert da beim Ausschaffe vum Reglement weidergefouert ginn.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Hëllefen diagnostesch Schnelltester géint de Mangel un Antibiotiquen?

Frankräich iwwerleet d’Verschreiwe vun Antibiotiquen nëmmen z’erlaben, wa virdrun een diagnostesche Schnelltest gemaach gëtt. Dëst fir mat Sécherheet festzestellen, op et sech ëm eng bakteriell oder viral Infektioun handelt.
Dëst kéint engersäits dem Mangel un Antibiotiquen entgéint wierken, an anerersäits d’Antibiotikaresistenz verréngeren.
D’DP-Deputéiert Gilles Baum a Gusty Graas hu bei der Gesondheetsministesch nogefrot, wéi vill Antibiotiquen an de leschte fënnef Joer zu Lëtzebuerg verschriwwe goufen an ob Doktere méi sensibiliséiert sollte ginn diagnostesch Tester ze verschreiwen.

weiderliesen...

Wéi vill Patienten krute kee Rendezvous méi an engem Stater Spidol?

Rezent huet ee Spidol an der Stad Bréiwer u Patiente verschéckt hir hinne matzedeelen, datt verschidde medezinesch Zerwisser keng nei Rendezvousen méi unhuele kënnen – ausser et handelt sech ëm eng Urgence oder een héich komplexe Fall.
Den DP-Deputéierten Gusty Graas huet bei der Gesondheetsministesch nogefrot, wéi et zu dësen Incapacitéiten konnt kommen, ob nach aner Spideeler betraff sinn a wat géint dës Situatioun ënnerholl gëtt.

weiderliesen...

Kënnt et zur Kommerzialiséierung vun therapeutesche Wunnstrukturen?

Therapeutesch Wunnstrukturen ginn aktuell vun der konventionéierter Psychiatrie am Extrahospitalier fir Persounen ugebueden, déi ënnert psychesche Problemer leiden.
Elo zirkuléieren Gerüchter, datt de Gesondheetsministère plangt enger kommerzieller Societéit een Agrément ze ginn fir esou therapeutesch Wunnstrukturen ze geréieren.
D’DP-Deputéiert Gusty Graas a Gilles Baum hu bei der Gesondheetsministesch nogefrot, ob dës Gerüchter der Wourecht entspriechen a, wa jo, firwat dëse Wee ageschloe gëtt, amplaz bestoend Acteuren aus der konventionéierter Psychiatrie am Extrahospitalier z’ënnerstëtzen.

weiderliesen...

Kënnt et och zu Lëtzebuerg zum Mëssbrauch vu “Protonenpumpenhemmer”?

De laangjärege Konsum vu sougenannte “Protonenpumpenhemmer” (IPP), déi géint Moproblemer agesat ginn, erhéijen enger rezenter wëssenschaftlecher Etüd no de Risiko un Demenz z’erkranken. Den DP-Deputéierten Gusty Graas huet bei den zoustännege Ministeren nogefrot, ob hinnen dës Etüd bekannt ass, wéi eng Conclusiounen si aus hir zéien, an ob Zuelen iwwert den Asaz vun IPP zu Lëtzebuerg bekannt sinn.

weiderliesen...