D’DP setzt sech zanter laangem fir d’Individualiséierung vun der Besteierung an. Déi Reform, déi och am Koalitiounsaccord steet, gëtt elo endlech lancéiert, wat mir ausdrécklech ënnerstëtzen.
Déi eenheetlech Besteierung wäert d’Liewe méi gerecht maachen: Fir de jonke Single, deen an d’Beruffsliewe start. Fir d’Koppel, déi eng Famill grënne wëll. Fir déi elengerzéiend Mamm an och fir de Mënsch, deen nom Dout vum Partner op sech eleng gestallt ass.
Déi nei, vill méi einfach a gerecht Besteierung wäert et jidderengem erlaben, säi Liewe besser ze plangen an esou d’Villfalt vun eiser Gesellschaft erëmspigelen. Kee bestëmmte Liewensmodell a keng Liewenssituatioun ginn dobäi favoriséiert. Et muss och kee méi fäerten, duerch de Wiessel an eng aner Steierklass a Schwieregkeeten ze geroden.
Déi grouss Piste vun der Steierreform, déi haut an der Finanzkommissioun vun der Chamber virgestallt gi sinn, sinn d’Suite vun der konsequenter Linn, déi d’DP scho jorelaang an deem Dossier vertrueden huet.
Grouss Reforme brauchen eng Visioun, ma och de richtegen Ament fir an d’Realitéit ëmgesat ze ginn.
D’Ziler vun der Steierreform sinn:
- eng eenheetlech Steierklass fir all Mënsch,
- eng däitlech Vereinfachung op administrativem Niveau,
- eng laang Iwwergangsperiod, fir dass keen eppes muss bäileeën.
Eis Kanner musse bei dëser Gesellschaftsreform am Mëttelpunkt stoen. Dofir ënnerstëtzt d’’DP jidder Efforten, fir dass iwwer d’Individualiséierung eraus nach eppes fir Famillje mat Kanner gemaach gëtt.
Well et ëm muer geet.
