Kënschtlerresidenzen zu Lëtzebuerg

Am Bridderhaus zu Esch/Uelzecht ass de 16. Juni eng Kënschtlerresidenz ageweit ginn. Dat fréiert Spidol an der rue Léon Metz ass komplett renovéiert a restrukturéiert ginn a soll insgesamt 17 Kënschtler logéieren. Eisen Deputéierten André Bauler huet an deem Kontext e puer generell Froen zu de Kënschtlerresidenzen am Land um d'Kulturministesch gestallt. 

Viru kuerzem ass am fréiere Bridderhaus zu Esch/Uelzecht eng Residenz fir Kënschtler ageweit ginn.

An deem Kader wollt ech der Madamm Kulturministesch folgend Froe stellen:

  • Wéi vill Residenze fir Artiste gëtt et de Moment am Land an a wat fir engen Uertschafte sinn si lokaliséiert?
  • Wéi vill Kapazitéit hunn dës Residenzen a wéi sinn si an de leschte Joren ausgelaascht gewiescht?
  • Wéi laang ginn dës Residenzen am Duerchschnëtt bewunnt an aus wat fir enge Länner kommen déi meescht Kënschtler?
  • Wéi vill sou Wunnenge gëtt et de Moment am Éislek a wéi sinn dës ausgelaascht? Ass et virgesinn, fir méi där Wunnengen am ländleche Raum ze schafen, z.B. an enger Uertschaft wéi Clierf, déi jo den Titel “Cité de l’image” dréit, oder zu Veianen, déi jo och reegelméisseg Ausstellunge mat international unerkannte Kënschtler organiséiert? Oder an enger aler Kulturstad wéi Iechternach?

Äntwert

A senger parlamentarescher Fro bezitt den Honorabelen Deputéierte sech op d’Residenz Bridderhaus zu Esch-Uelzecht, déi de 16. Juni 2022 ageweit gouf. Et handelt sech heibäi em eng Kënschtlerresidenz, an där d’Kënschtler souwuel wunne wéi och schaffe kënnen.

Woubäi dëse Ministère ronn 17 verschidde Strukturen, déi zu Lëtzebuerg Residenzprogrammer ubidde rezenséiert huet, offréieren déi mannsten d’Formule Logement plus Kreatiounsatelier, a gräife meeschtens op extern Logementsméiglechkeeten zréck. Hei wieren ënnert aneren z’ernimmen : d’Residenze vun der AAPL (Association des Artistes Plasticiens du Luxembourg), Bâtiment4 vu frEsch asbl, d’Residenzen am DudeTownHouse an am Appartement Dominique Lang vum Centre culturel opderschmelz, d’Artist Resideny vum CNA, d’Struwwelpippi Kinder und Jugendbuchautorenresidenz zu Iechternach, d’Résidence d’auteur vum Théâtre national du Luxembourg, d’Residenze vun der Kulturfabrik, d’ILL Residenz vun Independent Little Lies, d’Residenze vum Kulturhuef, d’Luxembourg Philharmonic Orchestra Academy an der Maison des Académiciens, de Residenzprogramm vum Trois C-L, oder nach d’Residenz fir d’Laureate vun der Biennale des étudiants en art et jeunes artistes vu ViArt asbl zu Veianen. De Kulturministère selwer hat am Kontext vun der Covid-19 Pandemie mat enger finanzieller Ënnerstëtzung fir den Accueil vun Artistes associés 18 Residenzprogrammer erméiglecht.

Vu datt d’Froe vum Honorabelen Deputéierte sech op Residenze mat Wunnenge bezéien, ergi sech folgend Äntwerten.

Et bestinn aktuell 6 Kënschtleresidenzen, déi souwuel Wunnengen, wéi och Kreatiounsraim beinhalten, zwou dovunner sinn eréischt am Laf vun 2022 entstanen an eng am Laf vun 2021. Vun dëse Residenze befanne sech der dräi an der Stad Lëtzebuerg (Casino Display Residenz, Canopée Résidence pour artistes an neimënster), eng zu Esch-Uelzecht (Bridderhaus), eng zu Iechternach (Trifolion – Maison Gothique) an eng zu Buerglënster (Résidence-mission vum Kulturministère). Zesummen hunn dës Kënschtlerresidenzen eng Kapazitéit vu ronn 50 Persounen.

An de leschte Joren huet den Occupatiounstaux staark variéiert, notamment wéinst der Covid-19 Pandemie. Fir 2022 läit den aktuellen Occupatiounstaux tëschent 0% (wéinst Renovéirungsaarbechten) an 100 %. Déi meeschte Kënschtler koumen aus Lëtzebuerg, suivéiert vu Frankräich an Däitschland.

D’Duerschnëttsdauer vun dëse Residenze variéiert jee no Struktur, a situéiert sech tëschent 11 Deeg fir di eng an 1-3 Méint fir di aner. D’Résidence-mission vum Kulturministère an den Annexe vum Buerglënster Schlass gëtt dem Artistekollektiv K+A fir dräi Joer zur Verfügung gestallt.

Woubäi eis am Éislek aktuell keng Kënschtlerresidenz, esou wéi se am Kontext vun dëser Ufro definéiert gëtt, bekannt ass, sou ass awer z.B. geplangt datt am Ermitage zu Klierf deemnächst Kënschtlerresidenze vu verschiddene Strukture kënnen ugebuede ginn. Och sief rappelléiert, datt et am ländleche Raum schonn Initiative ginn, déi zäitlech begrenzt Residenzprogrammer ëmsetzen, wéi z.B. déi uewe genannte Residenz fir d’Laureate vun der Biennale des étudiants en art et jeunes artistes zu Veianen, oder d’Kënschtlerresidenze vum Kulturhuef zu Gréivemaacher.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...