„Am Joer 2021 huet Lëtzebuerg d‘CO2-Tax agefouert fir géint de Klimawandel virzegoen. Dës louch 2021 bei 20 Euro pro Tonn un CO2, a se ass zanterhier all Joer ëm 5 Euro gehéicht ginn; esou dass se zanter dem 1. Januar dëst Joer bei 40 Euro pro CO2/Tonn läit.
An deem Kader wollte mir dem Här Minister fir Ëmwelt, Klima a Biodiversitéit follgend Froe stellen:
- Wéi vill Recetten huet d’CO2-Steier tëschent de Joren 2021 an 2024 dem Staat erabruecht? Wéi huet sech dës Progressioun vun der CO2-Tax iwwert déi lescht Jore generell op d’Recetten un Accisen ausgewierkt?“
- Wéi eng Ëmweltmesüren a Projete ginn heiduerch finanzéiert fir géint de Klimawandel virzegoen?”
Äntwert
Gemeinsam Äntwert vum Minister fir Ëmwelt, Klima a Biodiversitéit, vum Minister fir Finanzen a vum Minister fir Wirtschaft, PME, Energie an Tourismus op d’parlamentaresch Fro n°1831 vum 23. Januar 2025 vun den éierewäerten Députéierten André Bauler a Luc Emering iwwert “Recettes générées par la taxe carbone”
Wéi vill Recetten huet d’CO2-Steier tëschent de Joren 2021 an 2024 dem Staat erabruecht? Wéi huet sech dës Progressioun vun der CO2-Tax iwwert déi lescht Jore generell op d’Recetten un Accisen ausgewierkt?
D’Recettë vun der CO2-Steier an den Akzisen op Energieprodukter hunn sech iwwer de gefroten Zäitraum follgendermoossen entwéckelt:
Déi méi substantiell Baisse vun den Akziseneinnamen op den Energieprodukter am Joer 2022 ass op den éischte Solidaritéitspak zréckzeféieren an op d’Erofsetze vun den Akzisen um Bensinn an Diesel ëm 7,5 Cents pro Liter tëschent dem 13. Abrëll 2022 an dem 31. August 2022.
Wéi eng Ëmweltmesüren a Projete ginn heiduerch finanzéiert fir géint de Klimawandel virzegoen?
Esou wéi am integréierten Energie- a Klimaplang (PNEC) virgesinn, sinn d‘Recettë vun der CO2-Steier jeeweils zur Hallschent fir Klimaschutzmoossnamen a fir sozial Kompensatiounsmoossname ageplangt. D’Finanzéierung vun dëse Moossname gëtt duerch de Budget vun de jeeweilege Ministèren an duerch de Klima- an Energiefong getätegt. Déi 15 „domaines d’intervention“ vun dësem Fong sinn am modifizéierte Klimagesetz vum 15. Dezember 2020 präziséiert.
