Wou ass de Projet vum “Innovation Campus” zu Biissen drun?

D'DP-Deputéiert Claude Lamberty an André Bauler hunn nogefrot, wou de Projet vum "Innovation Campus" zu Biissen drun ass, a wat déi eventuell Grënn wieren, firwat dee Projet net den erwaarte Succès huet.

„Viru Joren war zu Biissen an der Industriezon en „Automotive Campus“ geplangt, eng Aart Ecosystem am Beräich vun der Mobilitéit, wou Synergien tëscht ënnerschiddlechen Acteuren geschaf sollte ginn an d’Fuerschung an Innovatioun am Zentrum sollte stoen. An der Tëschenzäit ass de Projet an en „Innovation Campus“ ofgewandelt ginn.

Déi Plaz huet effektiv quasi perfekt Viraussetzungen, vu dass se zentral geleeën a gutt ugebonn ass, den Terrain dem Staat gehéiert an u sech relativ direkt bebaut kéint ginn. Allerdéngs muss ee feststellen, dass sech an de leschte Jore relativ wéineg op dësem Site gedoen huet.

An deem Kader wollte mir dem Här Wirtschaftsminister folgend Froe stellen:

  • Wéi vill Firmen sinn aktuell op dësem Site implantéiert? Wéi vill sinn der an de lëschte fënnef Joer derbäi komm?
  • Mat wéi ville Firmen ass den Här Minister am Gespréich fir se dohinner ze kréien?
  • Wat sinn d’Grënn, dass d’Entwéckelung vum Site bis elo net virugaangen ass?
  • Hält den Här Minister un der Iddi vu engem „Innovation Campus“ fest? Wat ass dat geneet Konzept fir de Site?
  • Wéi eng Efforten mécht den Här Minister fir de Site no de Prinzipe vun dësem Konzept z‘entwéckelen?“

Äntwert

Den Automobilsecteur am generellen an d’Mobilitéit am speziellen si prioritär Beräicher wann et drëms geet fir di national Wirtschaft ze diversifizéieren, mat engem starken Fokus op „Smart Mobility“. Besonnesch Aktivitéite ronderëm Fuerschung an Entwécklung an deene Beräicher schafe Plus-Valuen an Aarbechtsplazen. Dofir huet d’Regierung virun e puer Joer decidéiert fir zu Bissen e Campus ze schafen, deen der Innovatioun am Lëtzebuerger Automobilsecteur gewidmet ass. De Numm vun deem Site ass „Automobility Campus“.

Dësen Infrastrukturprojet schreift sech och an d’Politik vum Aménagement du territoire a fir wirtschaftlech Aktivitéite besser iwwer Land ze verdeelen an esou ze dezentraliséieren. Ursprénglech gouf d’Konzept vum Campus am « Haut Comité pour le soutien, le développement et la promotion de l’industrie » ënnert der Féierung vum Wirtschaftsministère elaboréiert, zesumme mat der ILEA (Industrie luxembourgeoise des équipementiers de l’automobile) an Luxinnovation, der nationaler Agence fir d’Promotioun vun der Innovatioun.

D’IEE war 2019 di éischt Firma di sech um Site zu Bissen niddergelooss huet andeems se hire Sëtz dohinner geplënnert huet an ee Fuerschungszenter do opgemaach huet. Duerno koum zum Beispill Luxprovide dohinner, di de Supercomputer MeluXina bedreift deen och vun der Automobilindustrie benotzt gëtt. Och den „Interdisciplinary Centre for Security, Reliability and Trust“ (SnT) vun der Uni Lëtzebuerg huet de Site zäitweileg benotzt fir do Tester mat Autoen ze maachen di ouni Chauffer fuere kënnen.

D‘Automobilindustrie ass zanter e puer Joer schonns am Ëmbroch. Gefierer di ee Motor hunn dee mat Bensinn oder Diesel funktionéiert ginn duerch Elektrogefierer ersat. Dowéinst ass den Automobilmarché ugespaant, een Zoustand deen duerch d’Koronakris an hir ekonomesch Suitten nach weider verstäerkt gouf. Besonnesch d‘Zouliwwerindustrie ass dovunner betraff vun där et vill Entreprisen hei am Land gëtt.

Lëtzebuerger an auslännesch Betriber sinn interesséiert fir sech um Campus zu Bissen nidder ze loossen, sinn hunn hier Decisioune fir esou e laangfristege Projet un ze goen a fir z’investéieren awer wéinst der ugespaanter Situatioun an der Automobilindustrie zeréck gestallt oder op spéider verluecht. Dat erkläert firwat d’Entwécklung vum Site di vergaange Jore bis elo esou net virugaangen ass wéi dat geplangt war.  

D’Regierung hält um Konzept vum Campus zu Bissen fest fir do e Site z’entwéckele fir innovativ Betriber aus der Automobil- an der Zouliwwerindustrie. Dofir gëtt och geschwënn mam Bau vun engem Incubateur fir Startuppen aus deene Beräicher ugefaangen, e Projet deen wéinst der Pandemie Retard krut. Déi zousätzlech Infrastruktur wäert mëttel- a laangfristeg zu der Attraktivitéit vum „Automobility Campus“ bäidroen. Dat Gebai kritt eng Surface vu ronn 5.000 m2 a soll no de Prinzippie vun der Kreeslafwirtschaft gebaut ginn a funktionéieren.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...