„Laut dem Generaldirekter vun ArcelorMittal zu Lëtzebuerg wier d’Aktualiséierung vum „Plan de délestage“, deen definéiere soll wéi eng Acteuren am Fall vun enger Coupure vum Gas hir Aktivitéit wéi vill an a wéi enger Reiefolleg reduzéiere mussen, nach net fäerdeg – dat obwuel den Hierscht virun der Dier steet.
Vu dass déi verschidde betraffen Acteuren, ënner anerem déi kleng a mëttelstänneg Betriber an d’Industrie, natierlech Previsibilitéit fir déi nächst Méint brauchen, ass et wichteg d’Aarbechten un dësem Plang sou séier et geet ze finaliséieren.
An deem Kader wollt ech dem Här Minister fir Energie folgend Froe stellen:
- Wou sinn d’Aarbechten un der Aktualiséierung vum genannte Plang drun?
- Firwat konnten dës Aarbechte bis elo nach net ofgeschloss ginn?
- Fir wéini wäert den aktualiséierte Plang fäerdeg gestallt kënne ginn?“
Äntwert vum Minister fir Energie, Claude Turmes, op d’parlamentaresch Fro n°6811 vum 12. September 2022 vum éierewäerten Deputéierte Max Hahn iwwer de ‘’ Plan de délestage en cas de coupure de gaz naturel’’
Wou sinn d’Aarbechten un der Aktualiséierung vum genannte Plang drun?
De „Plan de délestage“ gëtt vun deene Gestionnaire fir de Gasreseau ausgeschafft an ass nieft dem „Plan d’intervention d’urgence“ vum HCPN an dem „Plan d’urgence relatif à la sécurité d’approvisionnement en gaz naturel du Luxembourg“ vum Ministère de l‘Énergie et de l’Aménagement du territoire ee vun deenen dräi operative Pläng fir d’Gestioun vun eventuelle Versuergungskrisen am Gasberäich zu Lëtzebuerg. Fir all dräi Pläng gouf am Fréijoer virun dem Hannergrond vun der aktueller Energiekris vun deene jeeweilege responsabelen Acteuren eng Mise à Jour ugestouss. Den HCPN huet d’Mise à Jour vu sengem Plang de 16.9. adoptéiert, an déi zwee aner Pläng wäerten den 19.10. op enger Pressekonferenz virgestallt ginn.
Firwat konnten dës Aarbechte bis elo nach net ofgeschloss ginn?
Déi verschidde Pläng hunn zum Deel substantiell missen iwwerschafft gi fir der neier a komplexer Gesamtsituatioun an der Gasversuergung adequat Rechnung ze droen. Dobäi war et wichteg, d’Pläng konsistent openeen ofzestëmmen, an doriwwer eraus och mat deene verschidden Acteuren am Secteur souwéi mat deene relevante Ministèren am Kader vun der Taskforce Energie ze consultéieren.
Fir wéini wäert den aktualiséierte Plang fäerdeg gestallt kënne ginn?
Dee „Plan de délestage“ souwéi dee „Plan d’urgence relatif à la sécurité d’approvisionnement en gaz naturel du Luxembourg“ wäerten den 19.10. op enger Pressekonferenz virgestallt ginn.
