Vum nächste Joer u ginn et Ännerunge bei de Bäihëllefen am Logement. Virop gëtt aus dem Service des aides au logement – dee bis elo am Logementsministère ënnerbruecht war – eng eegestänneg Administration des aides au logement. Den DP-Fraktiounschef Gilles Baum huet haut an der Chamber den entspriechende Gesetzprojet rapportéiert.
Mat der Reform kënnen d’Dossieren, also d’Hëllefe fir d’Leit, an Zukunft méi séier verschafft ginn. Dat ass net vu Muttwëll, well an de leschten 10 Joer sinn ëmmerhi 436 Milliounen Euro un Aiden zu Lëtzebuerg ausbezuelt ginn. Am Joer 2024 waren et 32 Milliounen Euro fir d’Subvention Loyer an 18 Millioune fir d’Subvention d’intérêts.
De Service, deen dacks eng éischten Ulafstell fir déi betraffe Leit ass a vill sollicitéiert gëtt, bekëmmert sech haaptsächlech ëm d’Gestioun vun de Wunnengsbäihëllefen an ëm d’Berodung vun de Betraffenen, déi déi Hëllef ufroen. Dobäi kënnt nach d’Ausschaffe vu Statistiken, déi dem Ministère bei der Gestaltung vu senger Wunnengspolitik hëllefen. Fir déi intern Gouvernance vun der neier Verwaltung ze garantéieren, sinn een Direkter an zwee Adjointe virgesinn.
De Switch zu enger Verwaltung wäert dofir suergen, fir méi eegestänneg, effikass an autonom schaffen ze kënnen, wat dann erëm de Service um Bierger verbessert. Esou musse vum anere Joer u vill Dossieren net méi op de Ministère geschéckt gi wéi bis elo, ma si kënnen direkt intern an der neier Verwaltung verschafft ginn.
Zousätzlech gëtt d’Digitalisatioun verbessert, wouduerch d’Aidë méi séier kënnen ausbezuelt ginn. Den Ament mécht de Service net manner ewéi 20.000 Virementen de Mount.
D’DP ënnerstëtzt d’Reform vun der Aide au logement, well si am Endeffekt deene schwächste Mënschen um Wunnengsmaart ënnert d’Äerm gräift.
