An eiser Summerserie weist sech Lëtzebuerg vu ville verschiddene Säiten. D’Vertrieder vun der DP-Fraktioun waren an allen Ecker vum Land ënnerwee, fir u flotten Aktivitéiten deelzehuelen oder bekannte Plaze mat neien Aen z’entdecken. Einfach op d’Biller klicken, fir bei d’Videoen ze kommen.
Corinne & Mike | Mam Vëlo duerch d’Stad
De Mike McQuaide ass als „An American in Luxembourg“ am ganze Land bekannt. D’Deputéiert Corinne Cahen deelt seng Passioun fir de Vëlo. Si profitéiere vum gudde Wieder, fir een deem aneren hir Liiblingsplazen an der Stad Lëtzebuerg ze weisen a perséinlech Anekdoten zum Beschten ze ginn.
Gusty & Pit | Bei den Déieren am Parc Merveilleux
De Pit Lacoste vum Service pédagogique am Beetebuerger Park weess op all Fro eng Äntwert. Hien hëlt den Deputéierte Gusty Graas mat hanner d’Kulissen. Mir kréien en exklusiven Abléck an d’Fudderkichen an dierfe mat der Kamera esou no bei d’Déieren, wéi normalerweis just d’Fleeger kommen.
Carole & Gaby | E Stéck Geschicht am Dräilännereck
Schengen ass e Symbol fir oppe Grenzen. D’Gaby Huberty-Fautsch ass zanter 2022 Guide am Musée a gëtt hiert Wëssen iwwer Europa mat vill Leidenschaft weider. D’Deputéiert Carole Hartmann krut eng Féierung mat perséinlechen Anekdoten a villen interessante Fakten zum Schengener Traité. Esou gëtt Geschicht gräifbar.
Mandy & Guido | Mam Lafgrupp um Afterwork
„One Little Spark Of Madness“ setzt d’Ekipp vu FatBetty.Run viraus, fir am Grupp matzelafen. De Guido Kröger, ee vun den Initiateuren, hëlt d’Deputéiert Mandy Minella mat op hiren traditionellen Donneschdeg-Laf. Um Wee duerch d’Stad schwätze si iwwer d’Passioun fir d’Lafen an d’Dynamik vum Gruppesport, an dat a Gesellschaft vu Leefer, déi esou divers si wéi de Grand-Duché.
André & Fabien | Braukonscht am Wëlzer Schlass
Zanter 2017 hält de Fabien Claude als Animateur/Brasseur fir de Syndicat d’Initiative et de Tourisme vu Wolz Seminairen am Schlass. Den Deputéierten André Bauler krut vun him en Abléck an d’Braukonscht a konnt an der Mikrobrasserie esouguer säin eegene Béier kreéieren.
