Erneierung vun der N15 zu Nidderfeelen

Parlamentaresch Froen
| 22. March 2022

Mobilitéit

André Bauler

D‘N15 duerch Nidderfeelen soll 2022 deelweis erneiert ginn. Den DP-Deputéierten André Bauler huet dem zoustännege Minister e puer Froen zu dësem Chantier gestallt.

„D‘N15 duerch Nidderfeelen soll 2022 deelweis erneiert ginn.

An deem Kader wollt ech dem Här Minister fir Mobilitéit an ëffentlech Aarbechten folgend Froe stellen:

Kann den Här Minister Detailer zu dësen Aarbechte ginn?
Wéi ka wärend dëser Zäit den Duerchgangstrafic sou gereegelt ginn, datt et net zu laange Staue kënnt? Sinn Ëmleedungen geplangt respektiv iwwerhaapt méiglech?
Wéivill Gefierer fueren all Dag duerch Nidderfeelen? Wéi hu sech d‘Zuelen an de leschte Joeren entwéckelt?“

Äntwert

Kann den Här Minister Detailer zu dësen Aarbechte ginn?

D’Nationalstrooss N15 gëtt tëschent der Tankstell am Dall bis eng 200 Meter virun der Kéier Richtung Ettelbréck nei gemaach. Géigestand vun dësen Aarbechten ass d’Erneierung vum Ënnerbau vun der Strooss. Wéinst dem aktuelle schlechten Zoustand, sackt d‘Strooss op där Plaz ëmmer rëm an. Gläichzäiteg profitéiert d’Gemeng vun där Geleeënheet fir hir Infrastrukturen ze erneieren. D’Aarbechte fänken am August nom Kollektivcongé un, a solle viraussiichtlech an engem Joer ofgeschloss sinn.

Wéi ka wärend dëser Zäit den Duerchgangstrafic sou gereegelt ginn, datt et net zu laange Staue kënnt? Sinn Ëmleedungen geplangt respektiv iwwerhaapt méiglech?

Vu datt de Verkéier am Chantiersberäich duerch eng intelligente Luuchtenanlag gereegelt wäert ginn, si keng Ëmleedunge geplangt. Bei enger Baustell op enger Staatsstrooss mat héijem Verkéiersopkommes, an dat besonnesch an de Spëtzestonnen, ass et evident, datt et schwéier ass ee gewësse Réckstau ze vermeiden. Natierlech gëtt probéiert déi negativ Auswierkungen op de Verkéier sou gutt et geet ze limitéieren. Et ass awer sou, dass all Projet an all Baustell, deen eng bestoend Situatioun verbessere soll, e bësse Verständnis a Gedold vun all de betraffene Leit erfuerdert.

Wéi vill Gefierer fueren all Dag duerch Nidderfeelen? Wéi hu sech d’Zuelen an de leschte Joren entwéckelt?

An der “Route de Bastogne”, direkt am Agang vun Nidderfeelen wann ee vun Ettelbréck kënnt, steet déi permanenten an automatesch Compteur Nummer 905. D’Auswäertung vun dësen Donnéeën tëschent 2018 an 2021 beleet, dass d’Zuel vun de Gefierer déi am Duerchschnëtt all Dag do fueren, relativ stabel ass.

Joer	Schaffdeeg	Samschdes	Sonndes
2018	13560	11562	8819
2019	13160	11403	9237
2020	12418	10355	7681
2021	12990	11457	8825

Déi Donnéeë sinn ëffentlech a kënne vu jiddwerengem zu all Moment réckwierkend op di fënnef lescht Joer um “Portail des Travaux publics” opgeruff ginn (https://travaux.public.lu/fr/infos-trafic/comptage.html).

Dir wëllt dës parlamentaresch Fro op Lëtzebuergesch iwwersat kréien?

Deelen:

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...