Gemeng Rammerech: Froen no der Restrukturéierung vum RGTR

Firwat hu verschidden Uertschaften vun der Gemeng Rammerech nom neie Fuerplang vum 17. Juli 2022 keng direkt Ubannung méi u Rammerech fir do d‘Korrespondenz op Woltz, Ettelbréck an an d’Stad ze garantéieren? A firwat fiert d‘Ligne 141 net méi duerch Holtz a Pärel. Eisen Deputéierten André Bauler huet sech zu deem Sujet beim Minister fir Mobilitéit an ëffentlech Aarbechten renseignéiert.

„D’Regierung leet bekannterweis grousse Wäert op d’Attraktivitéit vum ëffentleche Persounentransport.

No der Restrukturéierung vum RGTR vum 17. Juli 2022, bekloe sech Bierger aus der Gemeng Rammerech iwwer d‘Ubannung vu verschiddenen Uertschaften un d’RGTR-Netz.

An deem Kader wollt ech dem Här Minister fir Mobilitéit an ëffentlech Aarbechten folgend Froe stellen:

  • Firwat hunn d‘Uertschaften Holtz, Pärel, Wolwen, Héi-Maartel an Maartel-Roumecht nom neie Fuerplang vum 17. Juli 2022 keng direkt Ubannung méi u Rammerech fir do d‘Korrespondenz op Woltz, Ettelbréck an an d’Stad ze garantéieren?
  • Firwat fiert d‘Ligne 141 (Ligne 622 bis zum 17.07.2022) net méi duerch Holtz a Pärel um Wee fir op Woltz? Holtz a Pärel hunn nämlech haut keng direkt Ubannung méi op Woltz an Ettelbréck.

Äntwert

Firwat hunn d‘Uertschaften Holtz, Pärel, Wolwen, Héi-Maartel an Maartel-Roumecht nom neie Fuerplang vum 17. Juli 2022 keng direkt Ubannung méi u Rammerech fir do d‘Korrespondenz op Woltz, Ettelbréck an an d’Stad ze garantéieren?

Zu Holtz, Pärel, Wolwen, Héi-Maartel an Maartel-Roumecht ass d’Offer mat enger neier Express-Linn (Linn 901) iwwer Réiden direkt an Stad staark verbessert ginn. Wann een d’Fuerzäiten am Verglach mat der aler Linn 530 kuckt dann huet een 2019 laut Horaire 1 Stonn 10 vu Pärel just bis op Ettelbréck gebraucht, haut ass et 1 Stonn 15 bis op d’Stäreplaz.

Fir op Wolz huet ee vu Wolwen, Héi-Maartel an Maartel-Roumecht haut eng direkt Linn (141). Des Connectioun ass et esou am ale Reseau net ginn. Vun Holtz a Pärel aus kann een d’901 huelen fir duerno mat der 141 weiderzefueren, tëscht dëse Linne gëtt et eng Korrespondenz zu Wolwen.

Fir op Ettelbréck muss een zu Réiden ëmklammen, des Verbindung ass nach net optimal an haut 20 Minutte méi lues ewéi virdrun. De Gros vun der Demande Richtung Ettelbréck an Dikrech kënnt awer vu Lycéesschüler déi mat de Schülerlinnen K15 a K35 eng direkt Verbindung an d’Nordstad hunn. Den Accès zu der Linn 10 vun den CFL ass substantiell verbessert ginn, esou kann een zu Réiden ëmklammen an d’Linn 934 huelen fir séier op d’Mierscher Gare ze kommen.

Prinzipiell ass ze soen, dass mir d’Gemengen intensiv an de Prozess vun der Reorganisatioun agebonnen hunn an effektiv hat d’Gemeng Rammerech gefrot fir déi genannten Uertschaften un d’Lokalitéit Rammerech unzebannen. An dësem Fall war et awer esou, dass ee keng Linn hätt kënnen ëmleeën ouni op enger anerer Plaz d’Fuerzäiten ze verlängeren. Fir eng zousätzlech Linn ass d’Mobilitéits-Demande tëscht dësen Uertschaften an der Uertschaft Rammerech net grouss genuch. Prinzipiell ass den Transport innerhalb vun enger Gemeng net d’Käraufgab vum RGTR, do wou et geet oder wou d’Demande et justifiéiert probéiere mir natierlech de Gemengen entgéint ze kommen.

Esouwuel meng Verwaltung vum ëffentlechen Transport wéi och meng Equipe vun der Mobilitéitsplanung am Ministère stinn de Gemengen zur Verfügung wann des Froen oder Proposen zum ëffentlechen Transport oder zum allgemengen Thema Mobilitéit hunn a probéieren wou méiglech Léisungen ze fannen. D’Gemeng Rammerech ass, ausser bei där éischter Consultatioun 2019, bis elo nach net mat dëse Problematiken u mech erugetrueden.

Firwat fiert d‘Ligne 141 (Ligne 622 bis zum 17.07.2022) net méi duerch Holtz a Pärel um Wee fir op Woltz? Holtz a Pärel hunn nämlech haut keng direkt Ubannung méi op Woltz an Ettelbréck.“

Des Ännerung huet misse gemaach ginn fir d’Korrespondenz op der Gare Wolz ze garantéieren.

Mat der Korrespondenz vun der 901 op d’141 zu Wolwen verléiert ee ronn 7 Minutten par Rapport zum alen Tracé, am Reseau virun 2019 huet eng Ubannung a Richtung Wolz net bestanen.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...