Staat an ëffentlechen Déngscht

Staat an ëffentlechen Déngscht

Staat an ëffentlechen Déngscht: modern an effizient

Eng modern an effizient ëffentlech Administratioun vun de kuerze Weeër ass e wichtege Bestanddeel vum Erfollegsmodell Lëtzebuerg an dréit zu der Kompetitivitéit an der Attraktivitéit vun eisem Land bäi. Am Laf vun de leschte fënnef Joer ass den ëffentlechen Déngscht gestäerkt ginn, andeems eng sëlleche nei Plaze bäikomm sinn. Domadder ass der deels chronescher Ënnerbesetzung an de verschiddenen Administratiounen entgéintgewierkt ginn.

Fir DP ass et vun nationaler Wichtegkeet, datt Lëtzebuerg och an Zukunft op kompetent, gutt ausgebilten a motivéiert Fonctionnairen am ëffentlechen Déngscht zeréckgräife kann. D’DP wäert d’Moderniséierung an d’Digitaliséierung vum Staat virundreiwen. Dobäi si fir d’DP den Dialog mam Bierger, d’Transparenz an d’Effikassitéit wichteg Piliere vun engem moderne Staat. D’DP huet d’Zil, datt Lëtzebuerg déi modernsten, biergerfrëndlechsten a digitaalsten Verwaltung an Europa kritt.

Eng Offensiv am ëffentlechen Déngscht starten

D’DP huet d’Zil fir d’berufflech Carrièren am ëffentlechen Déngscht méi attraktiv an ofwiesslungsräich ze maachen. D’Reform vun der CSV-LSAP-Virgängerregierung huet sech deels als kontraproduktiv erausgestallt, virun allem am Beräich vun der Formatioun an der Längt vum Stage. D’DP-gefouert Regierung huet dofir d’Stagezäit fir déi zukünfteg Fonctionnairë vun dräi op zwee Joer erofgesat. Fir DP soll des verkierzte Stagezäit an Zukunft fir eng perséinlech Formatioun genotzt ginn, déi op de Kandidat ofgestëmmt ass. Dobäi sollen d’Kompetenzen, déi an der initaler Formatioun schonns vermëttelt goufen, méi staark berücksichtegt ginn. Fir d’DP setzt dëst eng Reform vum INAP (Institut national d’administration publique) viraus, fir d’Bildungsoffer z’erweideren an ze verdéiwen. D’DP setzt sech och fir eng „Ecole d’Administration“ an, déi als weiderféierend Schoul an enker Zesummenaarbecht mat bestoende Bildungsinstitutiounen soll en Diplom ubidden, fir Beamten op hir Carrière am ëffentlechen Déngscht ze preparéieren.

Keng Sozialbäiträg op den Iwwerstonnen

Déi Beschäftegt kréien d’Gesondheetskeess an d’Fleegeversécherung op hiren Iwwerstonne berechent. D’P wëll awer, datt d’Leit méi Netto vum Brutto behalen. Dofir wäerte mir déi Sozialbäiträg net méi op den Iwwerstonne berechnen: Am Privé a beim Staat. Doriwwer eraus wëll d’DP d’Iwwerstonnen an der Fonction publique net méi besteieren, esou wéi am Privatsecteur.

De Sozialdialog am ëffentlechen Déngscht ënnerhalen

D’DP wäert all d’Moossnamen, déi gréisser Auswierkungen op de Fonctionnairesstatut an d’Organisatioun vun der Administratioun hunn, mat der zoustänneger national repräsentativer Beruffsorganisatioun verhandelen. D’DP ass der Meenung, datt eng Administratioun nëmme gutt ka fonctionnéieren, wann e permanenten Dialog mat de Fonctionnairë stattfënnt.

Wiessel tëschent Privatsecteur an ëffentlechem Déngscht méi attraktiv maachen

D’DP ass der Meenung, datt Leit, déi aus der Privatwirtschaft an den ëffentlechen Déngscht wiesselen, d’Beruffsjoeren, déi si bei engem private Patron geschafft hunn, an hirer Fonctionnaireskarriär integral mussen unerkannt kréien.

Méi Ausbildungsplazen am ëffentlechen Déngscht schafen

De Staat stellt vill Leit mat enger Beruffsausbildung an. D’DP ass der Meenung, datt de Staat och als Patron eng Responsabilitéit huet, fir dozou bäizedroen, datt jonk Leit eng Beruffsausbildung kréien. D’DP wäert dofir suergen, datt am ëffentlechen Déngscht d’Zuel un Ausbildungsplazen dem reelle Besoin u Fachleit entsprécht.

Administrativ Prozedure vereinfachen

D’DP wäert d’Initiativ „Einfach Lëtzebuerg“ weiderentwéckelen, fir déi administrativ Prozedure méi biergerno ze maachen. De betraffene Bierger ka selwer am Beschten d’Effikassitéit vu Prozedure beuerteelen. Dofir wäert d’DP déi administrativ Prozeduren an engem breede Biergerbedeelegungsprozess grondleeënd iwwerpréiwen an am Sënn vum Bierger adaptéieren. All déi administrativ Prozedure wäerten op hir Effikassitéit a Komplexitéit iwwerpréift ginn a wann néideg vereinfacht ginn. Dobäi soll och iwwerpréift ginn, a wéi wäit, de Prinzip „le silence de l’administration vaut accord“ agefouert ka ginn. Ausserdeem soll verhënnert ginn, datt déi selwecht Information méi ewéi eng Kéier gefrot gëtt, och wa méi Administratioune mam Dossier befaasst sinn (Tell-us-once-Prinzip).

Digital Administratioun ëmsetzen

D’DP wëll all Aarbechtsschrëtt vun den ëffentlechen Administratioune souwuel ënnerteneen ewéi och am Kontakt mam Bierger an de Betriber bis 2023 digitaliséieren. All Kontakt tëschent Staat an Drëtte muss online méiglech sinn. Fir onnéideg administrativ Weeër ze verhënneren, setzt sech d’DP dofir an, datt den Echange vu schonn agereechten Ënnerlage funktionéiert. D’administrativ Weeër fir Grënner vu Betriber mussen esouwäit erofgesat ginn, datt eng Grënnung bannent engem Wochendag an och online méiglech ass. Souwuel d’Bierger ewéi och d’Betriber sollen zu all Ament iwwer en Tracking-System doriwwer informéiert ginn, wou hir Demande drun ass an a wiem säin Zoustännegkeetsberäich si fält.

 

Den DP-geféierte Konsumenteschutzministère huet doriwwer eraus e Pilotprojet lancéiert, fir Froen am Beräich vum Konsumenteschutz online iwwer „Chatbots“ ze beäntwerten. D’DP wäert dëse System och an anere Beräicher applizéieren, dat an Zesummenaarbecht mat Guichet.lu.

Kommunizéieren ouni Barrièrë duerch déi einfach Sprooch („leichte Sprache“)

D’Bierger sollen d’Recht hunn, wichteg Informatiounen, déi si vun Administratioune matgedeelt kréien, och ze verstoen. Dofir wäert d’DP sech dofir asetzen, datt dës Informatiounen net nëmmen a méi Sproochen, mee op Nofro hinn och an der sougenanntener „leichte Sprache“ kommunizéiert ka ginn.

Deelen:

Share on facebook
Facebook
Share on twitter
Twitter
Share on linkedin
LinkedIn
Share on email
Email
Share on whatsapp
WhatsApp