« Am Sënn vun der Kreeslafwirtschaft an dem Schounen vun de Ressourcen soll iwwer déi nächst Joren den Undeel un Offall, dee muss verbrannt ginn oder an eng Décharge kommen, sou wäit et geet reduzéiert ginn. Trotzdeem ka kaum dovun ausgaange ginn, dass dës Fraktioun an noer Zukunft op Null erof wäert goen.
An deem Kader wollte mir der Madamm Ministesch fir Ëmwelt, Klima an nohalteg Entwécklung folgend Froe stellen:
- Wéi vill Tonnen Offall vun de Kategorien « déchets ménagers, assimilés et encombrants » sinn an de leschte fënnef Joer pro Joer verbrannt ginn, an eng Décharge komm oder hu missen exportéiert ginn?
- Fir de Fall, dass Offall vun de Kategorien « déchets ménagers, assimilés et encombrants » exportéiert ginn ass, fir am Ausland eliminéiert ze ginn, wat waren d’Grënn heifir?
- Wéi vill Tonnen Offall vun de Kategorien « déchets ménagers, assimilés et encombrants » sinn an de leschte fënnef Joer pro Joer ugefall, déi net kënne verbrannt ginn, mee mussen an eng Décharge kommen?
- Wéi schätzt d’Madamm Ministesch d’Evolutioun vun de Quantitéite Offall vun de Kategorien « déchets ménagers, assimilés et encombrants », déi all Joer ufalen, iwwer déi nächst 10 Joer an?
- Ginn déi aktuell Kapazitéiten vun der Verbrennungsanlag zu Leideleng an der Décharge Muertendall duer, fir den Offall vun de Kategorien « déchets ménagers, assimilés et encombrants » vun den nächste Joren ze behandelen?
- Et ass ons zu Ouere komm, dass de Gemengesyndikat SIGRE seng Décharge wäert ausbauen, kann d’Madamm Ministesch dat confirméieren?
- Wéi vill nei Kapazitéiten wäerte sou geschaf ginn? Fir wéi laang gëtt geschat, dass déi zousätzlech Kapazitéiten duerginn?
- Wat ass de Käschtepunkt vun dësen Aarbechten? Wéi vill Subsiden ginn an deem Kader iwwer den Ëmweltfong ausbezuelt?
- Sollen d’Kapazitéiten vun der SIDOR och an den nächste Joren erhéicht ginn? »
Äntwert
D’Quantitéit vun “déchets municipaux en mélange et déchets encombrants” déi zu Leideleng verbrannt ginn, ass iwwer déi leschte 6 Joren geklomme. Gläichzäiteg ass manner däers Offall an eng Decharge komm. Den Export an d’Ausland ass iwwregens verbueden. Der Ëmweltministesch no wäerten d’Gesamtquantitéiten vun dëser Offallkategorie iwwer déi nächst 10 Joer däitlech ofhuelen, an dat trotz dem Wuesstem vun eiser Populatioun. An hirer Äntwert weist si sech optimistesch dass Lëtzebuerg dat europäescht Zil vun enger Recyclingsquote vu 60% bis 2030 erreeche kann. Dofir géif och keen Besoin bestoen fir d’Kapazitéiten vun der Verbrennungsanlag an den Dechargen auszebauen.
