Wou ass den Dossier vum neien IRM fir de Standuert Wolz drun?

Mëtt Mee dëst Joer war bekannt ginn, datt de Standuert Woltz vum Centre hospitalier du Nord een IRM soll kréien. D’DP-Deputéiert André Bauler a Carole Hartmann, wollte vun den zoustännege Ministere wëssen, wou dësen Dossier drun ass a wéi vill Patienten am Dag mat dësem IRM ënnersicht kéinte ginn.

Fro

„Mëtt Mee dëst Joer war bekannt ginn, datt de Standuert Woltz vum Centre hospitalier du Nord een IRM (Imagerie par résonance magnétique) soll kréien. Eng Demande wier an deem Sënn vum Nordspidol agereecht ginn.

An deem Kader wollte mir der Madamm Gesondheetsministesch an dem Här Minister fir sozial Sécherheet folgend Froe stellen:

1. Wou ass den Dossier vun engem IRM, deen an der Weelzer Klinik installéiert soll ginn, aktuell drun? Gouf den Dossier mëttlerweil formell vum Centre hospitalier du Nord agereecht?

2. Wéi vill Patiente kéinten zu Woltz am Duerchschnëtt dagdeeglech mat dësem IRM ënnersicht ginn? 

3. Wéi héich gëtt de Käschtepunkt vu sou engem IRM ageschat?“

Äntwert

1. Wou ass den Dossier vun engem IRM, deen an der Weelzer Klinik installéiert soll ginn, aktuell drun? Gouf den Dossier mëttlerweil formell vum Centre hospitalier du Nord agereecht?

Den Gesondheetsministère an den Ministère fir sozial Sécherheet hunn allebéid hiren Accord de Prinzip fir en Projet vun engem IRM um Site vum Centre Hospitalier du Nord (CHdN) zu Woltz ginn.

Aktuell schafft den CHdN een Dossier aus fir den Gesondheetsministère mat enger Demande d’autorisation et de subventionnement ze befaassen. Varianten vun Installatioun am Spidol St.Joseph respektiv an enger Annexe am Kader vum Projet Schlasskéier ginn évaluéiert.

2. Wéi vill Patiente kéinten zu Woltz am Duerchschnëtt dagdeeglech mat dësem IRM ënnersicht ginn?

Am Joer 2019, goufen et am CHdN ronn 6.500 IRM Passagen, am Duerchschnëtt 24,2 IRM Passagë pro Schaffdag a pro Apparat (par rapport zu insgesamt ronn 57.000 IRM Passagen am ganze Land mat engem Duerchschnëtt vu 27,6 IRM Passagë pro Schaffdag a pro Apparat).

Am Joer 2021, goufen et am CHdN ronn 12.100 IRM Passagen, am Duerchschnëtt 23,0 IRM Passagë pro Schaffdag a pro Apparat (par rapport zu insgesamt ronn 79.000 IRM Passagen am ganze Land mat engem Duerchschnëtt vu 27,2 IRM Passagë pro Dag a pro Apparat).

Et ass ze bemierken dass d’Unzuel vun Apparater sech am CHdN, ewéi och an den anere Spideeler, verännert huet an domat am CHdN d’IRM Passagen sech bal verduebelt hunn tëschent 2019 an 2021 bedéngt eben duerch elo zwee IRM Apparater. Zousätzlech huet säit Enn Oktober den CHdN seng Plagen fir Rendez-vous’en fir en IRM ze huelen optimiséiert, sou dat elo bis zu 60-65 IRM’en den Dag kënnen duerchgefouert ginn.

Generell muss een och de nationalen Duerchschnëtt nuancéieren, well d’Unzuel vun de Passagen och vun de verschiddenen Type vun IRM Examen ofhänkt, well dës méi oder manner Zäit an Usproch kënnen huelen. Éischten Schätzungen no géif en neien IRM zu Woltz et awer erlaben (mat Öffnungszäiten vun 7.00 – 17.00 Auer) 25 zousätzlech IRM’en den Dag duerchzeféieren ab deem Moment wou den zousätzlechen IRM-Apparat bis voll operationell wär.

3. Wéi héich gëtt de Käschtepunkt vu sou engem IRM ageschat?

Een IRM Apparat kascht nei ongeféier EUR 900.000.- woubäi déi Käschten souwuel vun der technescher Ausstattung mat Zousatzéquipementer wéi och vun der Négociatioun ofhänken.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéini kënnt d’Pollen-App ?

De Gesondheetsministère hat annoncéiert, datt ugangs 2020 eng gratis App sollt ugebuede ginn, déi de Bierger Informatiounen iwwert d’Pollenkonzentratioun an der Loft liwwert.

No iwwer dräi Joer gëtt et déi App nach ëmmer net. D’DP-Deputéiert Carole Hartmann huet dowéinst bei der Gesondheetsministesch nogefrot, wou d’Aarbechten un dëser App dru sinn a wien mat hirer Entwécklung beoptragt ginn ass ?

weiderliesen...

Wäert Europa deemnächst méi séier handele kënnen?

Op Initiativ vun Däitschland hunn sech 10 europäesch Memberstaate an engem ‘Frëndeskrees’ zesummegedoen, fir Entscheedunge mat enger qualifizéierter Majoritéit ze promovéieren. Och Lëtzebuerg ass Deel vun dësem Grupp. Wat ass den Impakt heivun an Europa? Eisen Deputéierte Gusty Graas huet bei Ausseministère nogefrot.

weiderliesen...

Ass de Grupp Wagner eng Terrororganisatioun ?

De 9. Mee huet déi franséisch Assemblée générale an enger Resolutioun dozou opgefuerdert, de Grupp Wagner an d’Lescht vun den Terrororganisatiounen opzehuelen. Wéi steet eisen Ausseministère zu dëser Demande ? Wäert Lëtzebuerg nozéien ? Eisen Deputéierte Gusty Graas huet beim zoustännege Ministère nogefrot.

weiderliesen...