Een Etablissement public fir d’Bluttspenden ?

D’DP-Deputéiert Corinne Cahen a Gérard Schockmel hunn der Gesondheetsministesch Froen zum annoncéierten Etablissement public fir d’Bluttspende gestallt. Déi liberal Deputéiert froen ënnert anerem, ob et net méi sënnvoll wier all d’Fraise vun der Croix-Rouge fir de Service vum Bluttspenden ze iwwerhuelen, amplaz een Etablissement public ze schafen? A wat geschitt mam Espace fir d’Bluttspend, deen am neie Siège vun der Croix-Rouge um Houwald geplangt ass, wann d’ Rout Kräiz de Service vum Bluttspenden net méi iwwerhëlt ?

Fro

„An der Froestonn vum 13. November an der Chamber huet d’Santésministesch gesot, dass d’Bluttspend an Zukunft soll vun engem Etablissement public iwwerholl ginn. Deemno géing d’Croix-Rouge déi Aufgab ofgeholl kréien.

An deem Kader wollte mir der Madamm Ministesch fir Gesondheet a Sozialversécherung follgend Froe stellen:

  • Ass d’Madamm Minister net och der Meenung, dass d’Bluttspend ee „Core Business“ vum Roude Kräiz ass, an d’Croix-Rouge déi néideg Erfarung a Credibilitéit huet fir dat och weider auszeféieren?
  • D’Croix-Rouge baut den Ament en neie Siège um Houwald. Do ass e groussen Espace virgesi, fir d’Bluttspender nach besser empfänken ze kënnen. Falls d’Croix-Rouge dat net méi sollt maachen, wat soll da mat deem Centre de transfusion sanguine geschéien?
  • Ass d’Madamm Ministesch net och der Meenung, dass d’Regierung éischter misst an d’Richtung goen, all d’Fraisen ze couvréieren, déi bei der Bluttspend ufalen, an domat ze garantéieren, dass d’Croix-Rouge net misst op Spenden zeréckgräife fir dee Service um Bierger?
  • Ass d’Ministesch net och der Meenung, dass vill Bluttspender riskéieren, net méi spenden ze goen, wann net méi d’Croix-Rouge sech dorëms këmmert? Bluttspend ass eng Spend. Mengt d’Ministesch, dass en Etablissement public grad esou vill Leit mobiliséiert kréich?
  • Huet d’Ministesch scho mam Lëtzebuerger Roude Kräiz geschwat, wat ass hier Meenung dozou, dass an Zukunft d’Bluttspend vun engem Etablissement public soll gemaach ginn.“

Äntwert

  • Ass d’Madamm Minister net och der Meenung, dass d’Bluttspend ee „Core Business“ vum Roude Kräizass, an d’Croix-Rouge déi néideg Erfarung a Credibilitéit huet fir dat och weider auszeféieren? 

Jo. 

  • D’Croix-Rouge baut den Ament en neie Siège um Houwald. Do ass e groussen Espace virgesi, fird’Bluttspender nach besser empfänken ze kënnen. Falls d’Croix-Rouge dat net méi sollt maachen, wat soll da mat deem Centre de transfusion sanguine geschéien? 

De Fait datt d‘Aktivitéit als « mission de service public » an de juristesche Kader vun engem établissement public iwwerfouert kéint gin heescht net datt d’Lokalitéiten déi lo virgesi sinn an déi scho wäit am Bau virugeschratt sinn, net kéinten och vum neien eventuellen établissement public fir hir Aktivitéiten an Usproch geholl ginn. 

  • Ass d’Madamm Ministesch net och der Meenung, dass d’Regierung éischter misst an d’Richtung goen,all d’Fraisen ze couvréieren, déi bei der Bluttspend ufalen, an domat ze garantéieren, dass d’Croix-Rouge net misst op Spenden zeréckgräife fir dee Service um Bierger? 

De Problem vun de Frais’en ass net deen eenzegen deen an deem Kader wäert ugeschwat ginn. Am Regierungsprogramm steet: « L’accès au don de sang doit reposer sur le principe de l’évaluation individuelle des risques, quelle que soit l’orientation sexuelle du donneur. Pour mettre fin à la discrimination envers les personnes bisexuelles et homosexuelles, le Gouvernement leur ouvrira la possibilité de donner du sang. » An deem Kader gëtt et zanter laangem Diskussiounen iwwer d’Responsabilitéit vun der Croix-Rouge vis-à-vis vun eventuell ongewollten Incident’en bei Bluttransfusiounen déi nach ëmmer net zur Zefriddenheet gekläert sinn. 

  • Ass d’Ministesch net och der Meenung, dass vill Bluttspender riskéieren, net méi spenden ze goen, wann net méi d’Croix-Rouge sech dorëms këmmert? Bluttspend ass eng Spend. Mengt d’Ministesch, dass en Etablissement public grad esou vill Leit mobiliséiert kréich? 

Déi Froe wäerten an de nächsten Diskussiounsronne sécher ee Sujet sinn an souwuel d’Croix-Rouge selwer wéi och hir Associations de donneurs an all aner Bénévole’en déi ronderëm den CTS am Asaz sinn wäerten an déi Diskussiounen mat agebonne ginn an och hir Plaz an enger eventueller neier juristescher Form fannen. 

  • Huet d’Ministesch scho mam Lëtzebuerger Roude Kräiz geschwat, wat ass hier Meenung dozou, dass an Zukunft d’Bluttspend vun engem Etablissement public soll gemaach ginn. 

Jo, de Sujet ass scho mat de Responsablen ugeduecht ginn. Formal Gespréicher wäerten am Januar ulafen. 

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéini gi Gesondheetsbilanë beim Hausdokter agefouert ?

De Koalitiounsaccord vun der Regierung gesäit d’Aféierung vu reegelméissege Gesondheetsbilanen ab 30 Joer vir. D’DP-Deputéiert André Bauler a Carole Hartmann hu bei der Gesondheetsministesch nogefrot wéi wäit d’Ëmsetzung vun dëser Initiative ass, ob spezifesch Formatioune fir d’Dokteren en place gesat wäerte ginn, an ob an deem Kader den DSP genotzt wäert ginn.

weiderliesen...

MILA Nofolleger

An der Sëtzung vun der Schoulkommissioun vum 17. Juni 2025 gouf ugekënnegt, datt d’Alphabetiséierungsprogramm MILA ausgeet an duerch e neie Schoulprogramm ersat gëtt. Nëmmen nach ronn 20 % vun de Kanner schaffen domat, an ëmmer méi Enseignanten setzen op aner Léiermëttel. Eis Deputéiert Gilles Baum a Barbara Agostino froen de Bildungsminister no den Haaptneierungen am neie Programm, senger Aféierung an de geplangte Formatiounscoursen fir d’Enseignanten.

weiderliesen...

D’Kooperatioun tëscht dem LNS an de private Laboratoiren an d’Automatisatioun am LNS

D’Analyse vu Biopsien spillt eng entscheedend Roll beim Erkennen vu schwéiere Krankheeten wéi dem Kriibs. Trotz Verbesserunge bleiwen d’Waardezäiten am LNS héich, besonnesch an der Onkologie, Gynäkologie an Dermatologie – eng psychologesch Belaaschtung fir Patienten. Eid Deputéiert Mandy Minella an Dr. Gérard Schockmel froen d’Gesondheetsministesch, wéi eng Schrëtt fir méi Automatisatioun, Digitaliséierung a méiglech Zesummenaarbechte mat privaten Laboratoiren virgesi sinn.

weiderliesen...

Administrativ Belaaschtung am Grondschoulunterrecht

Trotz der Vereinfachung vun der administrativer Aarbescht an de Grondschoulen duerch de Bildungsministère, gëtt vu Gewerkschafte betount, datt d’Bürokratie fir d’Enseignanten éischter zougeholl hätt. Wéi gesäit d’Realitéit aus, a wéi kann d’kënschtlech Intelligenz hei eng Roll spillen? Eng parlamentaresch Fro vun eisen Deputéierten Gilles Baum a Barbara Agostino sicht no Äntwerten.

weiderliesen...