Froen zum neie P&R zu Steeën

No der rezenter Annonce, dass zu Steeën en neie P&R soll gebaut ginn, huet den DP-Deputéierten André Bauler weider Detailer zu dësem Projet gefrot.

„Aus der Press si mer gewuer ginn, datt den Transportministère zesumme mat dem Lycée technique agricole (LTA) an der Gemeng Ärenzdall eng Léisung fir ee P+R um “Bloen Eck” bei Steeën ausgeschafft huet. Dat ass eng gutt Saach. D’Ëffentlechkeet ass och driwwer informéiert ginn, datt d’Gemeng Ärenzdall d’Zoustëmmung ginn huet, fir bei hirem Footballterrain en neien Arrêt ze amenagéieren.

Dësen Arrêt wäert vun der Schülerlinn K17 (Mersch – Larochette – Gilsdorf), déi d’Schüler direkt beim Lycée erausléisst, ugefuer ginn. Zousätzlech dozou géif eng Informatiounscampagne vun der Administration des transports publics an der Akerbauschoul lancéiert ginn, déi d’Schüler iwwer dës nei Opportunitéit opklärt esou wéi iwwert aner Parkméiglechkeeten, déi eng direkt Ubannung un de LTA erméiglechen.

An deem Kontext wëll ech dem Här Mobilitéitsminister folgend Froe stellen:

  • Wéi dacks pendelt d’Linn K17 Moies an no Schoulschluss tëscht dem neien Arrêt um Bloen Eck an der Akerbauschoul hin an hir? Wéi vill Parkplaze stinn de Schüler um Bloen Eck zur Verfügung? Huet dëse Bus genuch Kapazitéite fir d’Schüler, déi aus dem Zentrum an Oste vum Land an de LTA kommen, en charge ze huelen?
  • Géif een zousätzleche Pendeldéngscht agesat ginn, wann d’Zuel vun de Schüler, déi um Parking Bloen Eck halen, iwwer d’Kapazitéit vum Bus erausgeet?
  • Wéi gedenkt den Här Minister d’Schüler, déi aus den NordKantonen an de LTA kommen an déi op den Auto ugewise sinn respektiv net kënnen op de P+R Bloen Eck zréckgräifen, well dat en Ëmwee ass, entgéintzekommen? Goufen et do scho Gespréicher mat der Stad Dikrich fir eng Léisung ze fannen?
  • Ass d’Schülervertriedung vum LTA an d’Echangen iwwer d’Transportproblematik mat agebonne ginn?
  • Gëtt et schonn een Avant-projet fir dat neit Parkhaus, dat als Opfangparking fir Dikrech an Ëmgéigend, bei der Schwämm gebaut soll ginn?“

Äntwert vum Minister fir Mobilitéit an ëffentlech Aarbechten op d’parlamentaresch Fro n° 7150 vum 10. November 2022 vum Här Deputéierten André Bauler.

Wéi dacks pendelt d’Linn K17 Moies an no Schoulschluss tëscht dem neien Arrêt um Bloen Eck an der Akerbauschoul hin an hir?

D’Linn fiert nom aktuellen Fuerplang. Dat sinn zwee “Aller” mueres, an 7 “Retour” Mëttes tëschend 12:00 an 17:00. D’Horairen heizou fënnt een iwwert de Site “Mobilitéit.lu”.

Wéi vill Parkplaze stinn de Schüler um Bloen Eck zur Verfügung?

De Schüler stinn 85 Stellplaze um Parking P+R Bloen Eck zur Verfügung.

Huet dëse Bus genuch Kapazitéite fir d’Schüler, déi aus dem Zentrum an Oste vum Land an de LTA kommen, en charge ze huelen?

Jo. D’Buskategorie gëtt jee no Besoin ugepasst.

Géif een zousätzleche Pendeldéngscht agesat ginn, wann d’Zuel vun de Schüler, déi um Parking Bloen Eck halen, iwwer d’Kapazitéit vum Bus erausgeet?

Jo. Eng Zousaazfahrt ka jee no Besoin organiséiert ginn.

Wéi gedenkt den Här Minister d’Schüler, déi aus den Nord-Kantonen an de LTA kommen an déi op den Auto ugewise sinn respektiv net kënnen op de P+R Bloen Eck zréckgräifen, well dat en Ëmwee ass, entgéintzekommen? Goufen et do scho Gespréicher mat der Stad Dikrich fir eng Léisung ze fannen?

Den P+R Bloen Eck befënnt sech 4,5 km vum Site vum LTA ewäsch. D‘Schüler aus den Nord-Kantonen, déi op den Auto ugewise sinn, hu vun der Ackerbauschoul also knapp 3 Minutten weider ze fueren fir op de P+R, wat keen wesentlechen Ëmwee duerstellt. Den P+R Bloen Eck kann esou vun alle Schüler, déi op den Auto ugewise sinn an aus verschiddenste Richtunge kommen, ouni gréisseren Ëmwee ugefuer ginn.

Ass d’Schülervertriedung vum LTA an d’Echangen iwwer d’Transportproblematik mat agebonne ginn?

D’Diskussiounen iwwer d’Transportproblematik sinn haaptsächlech mat der Direktioun vun der Akerbauschoul oofgehalen ginn.

Gëtt et schonn een Avant-projet fir dat neit Parkhaus, dat als Opfangparking fir Dikrech an Ëmgéigend, bei der Schwämm gebaut soll ginn?

Den Ament gëtt et nach keen Avant-projet fir dat neit Parkhaus.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Hëllefen diagnostesch Schnelltester géint de Mangel un Antibiotiquen?

Frankräich iwwerleet d’Verschreiwe vun Antibiotiquen nëmmen z’erlaben, wa virdrun een diagnostesche Schnelltest gemaach gëtt. Dëst fir mat Sécherheet festzestellen, op et sech ëm eng bakteriell oder viral Infektioun handelt.
Dëst kéint engersäits dem Mangel un Antibiotiquen entgéint wierken, an anerersäits d’Antibiotikaresistenz verréngeren.
D’DP-Deputéiert Gilles Baum a Gusty Graas hu bei der Gesondheetsministesch nogefrot, wéi vill Antibiotiquen an de leschte fënnef Joer zu Lëtzebuerg verschriwwe goufen an ob Doktere méi sensibiliséiert sollte ginn diagnostesch Tester ze verschreiwen.

weiderliesen...

Wéi vill Patienten krute kee Rendezvous méi an engem Stater Spidol?

Rezent huet ee Spidol an der Stad Bréiwer u Patiente verschéckt hir hinne matzedeelen, datt verschidde medezinesch Zerwisser keng nei Rendezvousen méi unhuele kënnen – ausser et handelt sech ëm eng Urgence oder een héich komplexe Fall.
Den DP-Deputéierten Gusty Graas huet bei der Gesondheetsministesch nogefrot, wéi et zu dësen Incapacitéiten konnt kommen, ob nach aner Spideeler betraff sinn a wat géint dës Situatioun ënnerholl gëtt.

weiderliesen...

Kënnt et zur Kommerzialiséierung vun therapeutesche Wunnstrukturen?

Therapeutesch Wunnstrukturen ginn aktuell vun der konventionéierter Psychiatrie am Extrahospitalier fir Persounen ugebueden, déi ënnert psychesche Problemer leiden.
Elo zirkuléieren Gerüchter, datt de Gesondheetsministère plangt enger kommerzieller Societéit een Agrément ze ginn fir esou therapeutesch Wunnstrukturen ze geréieren.
D’DP-Deputéiert Gusty Graas a Gilles Baum hu bei der Gesondheetsministesch nogefrot, ob dës Gerüchter der Wourecht entspriechen a, wa jo, firwat dëse Wee ageschloe gëtt, amplaz bestoend Acteuren aus der konventionéierter Psychiatrie am Extrahospitalier z’ënnerstëtzen.

weiderliesen...

Kënnt et och zu Lëtzebuerg zum Mëssbrauch vu “Protonenpumpenhemmer”?

De laangjärege Konsum vu sougenannte “Protonenpumpenhemmer” (IPP), déi géint Moproblemer agesat ginn, erhéijen enger rezenter wëssenschaftlecher Etüd no de Risiko un Demenz z’erkranken. Den DP-Deputéierten Gusty Graas huet bei den zoustännege Ministeren nogefrot, ob hinnen dës Etüd bekannt ass, wéi eng Conclusiounen si aus hir zéien, an ob Zuelen iwwert den Asaz vun IPP zu Lëtzebuerg bekannt sinn.

weiderliesen...