Gläichstellung tëschent Fraen a Männer am Lëtzebuerger Sport

Iwwert déi lëscht Joerzéngten huet sech d'Gläichstellungspolitik zu Lëtzebuerg kontinuéierlech verbessert. Besonnesch de Sport ka bei dëser Thematik eng wichteg Roll spillen. DP-Deputéiert Carole Hartmann a Claude Lamberty hunn bei den zoustännege Ministeren nogefrot wéi et mat der Gläichstellung tëschent Fraen a Männer am Lëtzebuerger Sport aktuell ausgesäit.

„D’Gläichstellungspolitik zu Lëtzebuerg huet sech déi lescht Joerzéngte kontinuéierlech verbessert. Dëst net zu gudder Lescht wéinst dem engagéierten Handele vun der aktueller Regierung.

Leider si vill Beräicher an eiser Gesellschaft –  och de Sport – nach ëmmer vu Stereotyppe  gepräägt.

Meedercher a Frae sinn a ville Beräicher vum Sport – sief et als Athletinnen, Trainerinnen, Mataarbechterinnen oder a responsable Positiounen an de Sportsveräiner, als Arbitterinnen oder als Supporter – ënnerrepresentéiert. Daat zielt och fir d’LGBTQ+ Communautéit.

Besonnesch de Sport kann awer eng wichteg Roll bei der Gläichstellung tëschent alle Persoune  spillen. 

An deem Kader wollte mir der Madamm Ministesch fir d’Gläichstellung tëschent Fraen a Männer an dem Här Sportminister folgend Froe stellen:

  • Ginn et Zuelen iwwert de Prozentsaz vu Männer, Fraen a Persounen aus der LGBTQ+ Communautéit déi an de lëtzebuerger Sportveräiner selwer aktiv sinn an/oder als Trainer oder Arbitter engagéiert sinn?
  • Ginn et Zuelen iwwert de Prozentsaz vu Männer, Fraen a Persounen aus der LGBTQ+ Communautéit déi an de Gremie vun de Lëtzebuerger Sport-Federatiounen aktiv sinn?
  • Wéi huet sech de Prozentsaz vu Fraen entwéckelt, déi an de verschiddene Kadere vum COSL gefërdert gi si respektiv ginn?
  • Wéi huet sech de Prozentsaz vu Fraen entwéckelt, déi Lëtzebuerg op den Olympesche Spiller vertrueden hunn?
  • Ginn et am Lëtzebuerger Spëtzesport nach ëmmer Ënnerscheeder bei de Remuneratioune vun de Sportler, respektiv bei de Präisgelder op Lëtzebuerger Sportsmanifestatiounen?
  • Wéi eng Mesurë ginn ënnerholl a wéi eng Efforten si geplangt, fir d’Gläichstellung bei der Fërderung vu Lëtzebuerger Spëtzesportler z’erméiglechen?
  • Wéi eng Mesurë si geplangt, fir d’Gläichstellung am Sportsbenevolat ze stäerken?
  • Ginn am Sënn vun der Gläichheet vun alle Persounen och Initiative geholl fir d’LGBTQ+ Communautéit am Lëtzebuerger Sport ze integréieren an ze ënnerstëtzen?“

Äntwert

D’Gläichstellungspolitik zwëschent Fraen a Männer ass generell eng Prioritéit vun der lëtzebuerger Regierung, sou wéi de Regierungsprogramm an de Nationalen Aktiounsplang fir d’Gläichstellung vu Fraen a Männer et och ennersträichen. De Sport spillt schon haut eng Virreiderroll, well en e wichtegen Undeel um alldeeglechen Liewen vu Meedercher a Jongen, vu Fraen a Männer anhëllt. Am Sport sinn d’Stereotypen, déi mer de Geschlechter zouuerdnen besonnesch staark ausgeprägt. Déi sozial Contructiounen vu Maskulinitéit a Féminitéit spillen do eng iwwergeuerdnet Roll, well mer mam Sport virun allem männlech Eegenschaften wéi Kraaft, Stäerkt, Duerchsetzungsverméigen a Virilitéit verbannen. Dëst schléit sech och leider an der Wertschätzung vu Meedercher a Fraen am Sport néier, dëst ganz besonnesch bei hierer Représentatioun an de Héichleeschtungskaderen, de Verwaltungsgremien an de jeweilegen Fédératiounen a Klibb an net zu läscht och bei der Rémunératioun vun hieren sportlechen Leeschtungen.

Virun dësem Hannergrond setzt den Nationalen Gläichstellungsplang engersäits den Akzent op de Kampf géint geschlechtsspezifesch Stereotypen an anerersäits op d’Promotioun vun der Egalitéit am Sport :

  • De Gläichstellungsministère ennerstëtzt d’Fuerschung am Beräich vun de Geschlechterstereotypen an seng Konsequenzen op eis Gesellschaft, dëst an Zesummenaarbecht mat der Uni Lëtzebuerg;
  • De Gläichstellungsministère ass doriwwer eraus amgaangen eng Informatiounscampagne iwwert de Sexismus auszeschaffen, déi sech op d’Campagne vum Europarot „Sexisme : Vois-le, dis-le, stoppons-le !“ baséiert, an déi sech och op de Sexismus am Sport bezitt ;
  • Den Dialog matt den Schlësselacteuren am Sport – dem Sportsministère, dem Conseil supérieur des Sports, de Sportfédératiounen an hiren affiliéierte Veräiner, dem COSL an der Sportpress – ass en aneren wichtegen Schwéierpunkt.

Den Glaïchstellungsministère an den  Sportsministère sin och a Kontakt fir mëttelfristeg en Gläichstellungsplang am Sport auszeschaffen.   

Waat elo konkret Zuelen ubelaangt, esou huet den Sportsministère den 10. Februar 2022 den  agrééierte Sportsverbänn per Circulaire een Questionnaire iwert d’Gläichstellung zoukommegelooss, deen eben als „point de départ“ sollt gëllen fir d’Auschaffen vun engem Gläichstellungsplang am Sport. Well nach net all Verband dësen Questionnaire eragereecht huet,  wäerten des Aarbechten nach undaueren. De Sportsministère huet a wäert allerdengs desen Verbänn waermestens un d’Häerz leen, dëst zäitno ranzereechen. D’Circulaire mam Questionnaire fënnt een um Portail vum Sportsministère (www.sports.lu). Déi lescht Zuelen a Punkto Gläichstellung sinn am Aktivitéitsrapport 2021 vum Sportsministère nozeliesen, deen och um Portail publizéiert ass.

Waat elo déi verschidden Kaderen vum COSL ubelaangt, esou ass ze soen, dass d’Kaderzesummenstellung eng Kompetenz vun den zoustaennegen Instanzen vum COSL ass, an dëst no den Kritären déi den COSL sech selwer ginn huet. 

Och d’Sélektioun vun de Sportler a Sportlerinnen, déi eist Land op den olympeschen Spiller vertrieden fällt an d‘Zoustaennegkeet vum COSL.

D‘Ennerscheeder bei den Remunératiounen, respektiv de Präisgelder sinn ee Sujet mat deem sech souwuel de Gläichstellungsministère, ewei och den Sportsministère befaassen. Allerdéngs fällt dëse Sujet  och zum Deel ennert d’Autonomie vum Fonctionnement vun den Sportsverbänn, an hängt och zum Deel  vun der Spezifiziteit vun der jeweileger Sportart of.

Waat Subsiden an de Congé sportif ubelaangen, esou gëtt et do am Beräich vum Sportsministère eng absolut Gläichstellung zwëschent de Geschlechter.

Waat elo d’Initiativen fir d’LGBTQ+-Communautéit betrëfft, esou huet déi lëtzebuerger Regierung 2018 den éischten nationalen Aktiounsplang ausgeschafft fir d’Rechter vun de lesbesche, schwulen, bisexuellen, transgender an intergeschlechtleche (LGBTI) Mënschen ze stäerken. Dëse gouf an Zesummenaarbecht mat der Zivilgesellschaft an de nationale Mënscherechtsorganisatiounen ausgeschafft, an huet eng global Approche fir d’Diskriminatiounen géint LGBTI Mënschen an de verschiddene Liewensberäicher ze bekämpfen.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Hëllefen diagnostesch Schnelltester géint de Mangel un Antibiotiquen?

Frankräich iwwerleet d’Verschreiwe vun Antibiotiquen nëmmen z’erlaben, wa virdrun een diagnostesche Schnelltest gemaach gëtt. Dëst fir mat Sécherheet festzestellen, op et sech ëm eng bakteriell oder viral Infektioun handelt.
Dëst kéint engersäits dem Mangel un Antibiotiquen entgéint wierken, an anerersäits d’Antibiotikaresistenz verréngeren.
D’DP-Deputéiert Gilles Baum a Gusty Graas hu bei der Gesondheetsministesch nogefrot, wéi vill Antibiotiquen an de leschte fënnef Joer zu Lëtzebuerg verschriwwe goufen an ob Doktere méi sensibiliséiert sollte ginn diagnostesch Tester ze verschreiwen.

weiderliesen...

Wéi vill Patienten krute kee Rendezvous méi an engem Stater Spidol?

Rezent huet ee Spidol an der Stad Bréiwer u Patiente verschéckt hir hinne matzedeelen, datt verschidde medezinesch Zerwisser keng nei Rendezvousen méi unhuele kënnen – ausser et handelt sech ëm eng Urgence oder een héich komplexe Fall.
Den DP-Deputéierten Gusty Graas huet bei der Gesondheetsministesch nogefrot, wéi et zu dësen Incapacitéiten konnt kommen, ob nach aner Spideeler betraff sinn a wat géint dës Situatioun ënnerholl gëtt.

weiderliesen...

Kënnt et zur Kommerzialiséierung vun therapeutesche Wunnstrukturen?

Therapeutesch Wunnstrukturen ginn aktuell vun der konventionéierter Psychiatrie am Extrahospitalier fir Persounen ugebueden, déi ënnert psychesche Problemer leiden.
Elo zirkuléieren Gerüchter, datt de Gesondheetsministère plangt enger kommerzieller Societéit een Agrément ze ginn fir esou therapeutesch Wunnstrukturen ze geréieren.
D’DP-Deputéiert Gusty Graas a Gilles Baum hu bei der Gesondheetsministesch nogefrot, ob dës Gerüchter der Wourecht entspriechen a, wa jo, firwat dëse Wee ageschloe gëtt, amplaz bestoend Acteuren aus der konventionéierter Psychiatrie am Extrahospitalier z’ënnerstëtzen.

weiderliesen...

Kënnt et och zu Lëtzebuerg zum Mëssbrauch vu “Protonenpumpenhemmer”?

De laangjärege Konsum vu sougenannte “Protonenpumpenhemmer” (IPP), déi géint Moproblemer agesat ginn, erhéijen enger rezenter wëssenschaftlecher Etüd no de Risiko un Demenz z’erkranken. Den DP-Deputéierten Gusty Graas huet bei den zoustännege Ministeren nogefrot, ob hinnen dës Etüd bekannt ass, wéi eng Conclusiounen si aus hir zéien, an ob Zuelen iwwert den Asaz vun IPP zu Lëtzebuerg bekannt sinn.

weiderliesen...