Mobilitéit
D’DP wëll d’Weiche fir eng modern Verkéierspolitik stellen, déi de Bierger eng gutt Liewensqualitéit offréiert. De Schlëssel dofir läit an engem pragmateschen a vernetzte Mobilitéitskonzept, dat de Besoine vun de Leit ugepasst ass an hinnen déi néideg Fräiheet a Flexibilitéit gëtt, fir zouverléisseg vun A op B ze kommen. D’Stäerkung vum ëffentlechen Transport an de konsequenten Ausbau vu getrennte Fouss- a Vëlosweeër schafen d’Viraussetzung fir eng zoumutbar Mobilité douce. Dat wäert dem Klima an der Qualitéit vum Kaméidi a vun der Loft zegutt kommen. Mir wäerten d’Sortie aus de fossillen Energien ënner anerem duerch den Ausbau vu Borne fir E-Autoen an E-Vëloen erliichteren.
Verkéiersentwécklungsplang. Fir d’Gemengen a Saache Mobilitéit fit fir d’Zukunft ze maachen, soll e Verkéiersentwécklungsplang ausgeschafft ginn. Dës laangfristeg Strategie wäert an Zesummenaarbecht mat den Acteuren aus der Mobilitéit a mat de Bierger geschéien.
Verkéiersberouegung an eisen Uertschaften. D’DP Helperknapp wäert sech dofir asetzen, fir den Duerchgangsverkéier beschtméiglech aus den Duerfzentren erauszehalen. No Analyse vun de Resultater vun deem Miessgerät wat rezent vum Schäfferot agefouert gouf, an no Récksprooch mat de betraffene Bierger, wëll D’DP Helperknapp hei wann néideg op verkéiersberouegend Mesuren zeréckgräifen, ewéi zum Beispill Verkéiersinselen.
D’Mobilitéit am ländleche Raum verbesseren. Duerch eng aktiv, regional Zesummenaarbecht solle wichteg Standuerter, ewéi Akafszenteren, Kinoen oder Spideeler mam ëffentlechen Transport accessibel ginn. Dofir wëll d’DP Helperknapp de Bummelbus an all weider bestehend Servicer weider fërderen an d’Lächer am nationalen RGTR-Reseau ergänzen. Esou soll analyséiert ginn op ee Shuttlebus duerch d’Gemeng (zum Beispill vu Miersch bis op Tënten) weider Verbindunge mat den iwwerregionale Linne vu Bus a Bunn kéint sécherstellen.
Busarrête mat digitalen Écranen. Leit, déi mam Bus fueren, waarden ze dacks um Arrêt, ouni Informatiounen iwwer d‘Départen an iwwer Verspéidungen. Fir den ëffentlechen Transport méi attraktiv ze maachen, setzt d’DP Helperknapp sech dofir an, datt prioritär déi gréissten a meeschtegenotzte Busarrête iwwerdaacht sinn oder ginn a mat digitalen Écranen equipéiert ginn.
Den ëffentlechen Transport nuets méi attraktiv maachen. Besonnesch am Nuetsliewen ass den Auto dacks onëmgänglech. D’DP Helperknapp wëll d’Offer u Nuetsbussen analyséieren a bei Bedarf ausbauen. Zousätzlech wëll d’DP Helperknapp d’Aféierung vun engem Nuets-Shuttelbus vun der Mierscher Gar aus iwwerpréiwen.
Verkéierssécherheet. D’DP Helperknapp setzt op den Ausbau vun Tempo 30-Zonen a Wunngebidder an op deene Plazen wou Kanner sech ophalen (e.a. bei de Crèchen, um Campus, a bei de Spillplazen. Fir d’Zil vun Tempo 30 ëmzesetzen, brauch et Dialogtafelen, Schwellen an Inselen an de Stroossen. A vill befuerenen Uertschaften an an den Entréeë vu Gemengen wëll d’DP Helperknapp weider Mesuren ënnerstëtzen, déi presséiert Automobilisten ofbremsen.
Beliichtung vun de Foussgängerweeër. Zemol am Wanter spillt d’Beliichtung eng wichteg Roll bei der Verkéierssécherheet. D’DP Helperknapp wëll den Asaz vum techneschen Déngscht weiderféieren, fir datt villgenotzte Foussgängerweeër genuch beliicht sinn an d’Foussgänger gutt ze gesi sinn. Och méi breet Trottoiren a méi enk Stroossen droen zu enger besserer Sécherheet bäi. D’DP Helperknapp wäert dofir kucken, wou esou Mesurë Sënn maachen.
Sécher Schoulweeër. Egal ob zu Fouss, mam Vëlo oder mat der Trottinette; mir wëllen, datt de Schoulwee fir all d’Schüler interessant, machbar a virun Allem sécher ass. Dozou gehéiere breet, iwwersiichtlech a gutt beliichte Fouss- a Vëlosweeër, ee Weiderféiere vun der aktueller Entlaaschtung vum Verkéier um a ronderëm dem Campus, a regelméisseg Opklärungscampagnen vun de Kanner an hiren Elteren.
Vëlosboxen a Vëlosparkplazen. Zur Fërderung vun der aktiver Mobilitéit gehéieren och nei Vëlosboxen a Vëlosparkplazen am ëffentleche Raum an a Schaff- a Wunngebidder. D’DP Helperknapp begréisst dowéinst den Asaz vum Schäfferot fir déi 3 nei M-Box déi op Béiwen, Bruch an Tënten installéiert ginn. Och wëlle mir d’Installatioun vu sougenannte Vëlosatelieren / Bikestations analyséieren an eventuell an Zesummenaarbecht mat Nopeschgemenge ëmsetzen. D’DP Helperknapp wëll och analyséieren ob e Locatiounssystem fir Vëloen, fir Cargo-Vëloen, respektiv E-Trottinetten fir eis Bierger Sënn mécht an deen Ament eventuell aféieren.
Ausbau vu Park&Ride. D’DP Helperknapp wëll kucken, ob et Sënn mécht, fir Park&Ride-Plaze ze schafen déi eng optimal Connectioun un den ëffentlechen Transport erméiglechen an esou d’Zouparken an den Duerfzentren verhënnert.
Barrièrefräiheet garantéieren. D’DP Helperknapp begréisst d’Initiativ fir déi wichtegst Busarrêten den aktuelle Standarden unzepassen well dës esou schonn all Barrièrë fräi ginn respektiv gi sinn, fir datt Leit mat enger Behënnerung kënnen ouni Problem den ëffentlechen Transport huelen. Weider Mesuren sollen an Zesummenaarbecht mat den Haaptacteuren diskutéiert ginn an een eventuellen Aktiounsplang fir déi nächst Joeren opsetzen.
Elektromobilitéit fërderen. Fir dem Bierger de Wiessel op déi emissiounsfräi Mobilitéit z’erliichteren, wäert d’DP Helperknapp dofir suergen, datt den Asaz vum Schäfferot weidergefouert gëtt fir op allen ëffentleche Parkingen an an der Géigend vu Geschäfter méiglechst genuch Elektro-Bornen disponibel sinn. Niewent den aktuelle Bornen um Campus a beim Veräinshaus zu Tënten entsteet aktuell nach ee gréissere Pool um neie Parking zu Brouch.
D’Mobilitéit vun der Gemengeverwaltung méi nohalteg gestalten. D’DP Helperknapp begréisst datt de Schäfferot de Wiessel op eng klimafrëndlech Mobilitéit agefouert huet an éischt Upassunge vum Fuerpark d’Richtung uginn fir op eng mëttelfristeg CO2-neutral Mobilitéit (Elektro- a Waasserstoff-Gefierer, E-Fuel) ze kommen.
Méi Livraisounsplazen. D’DP Helperknapp wëll setzt sech fir speziell Liwwerparkplaze laanscht vill befuere Stroossen asetzen, fir datt den Traffic esou mann ewéi méiglech behënnert gëtt, wéi zum Beispill op der Areler Strooss zu Brouch an der Lëtzebuerger Strooss zu Tënten. Deen Ament wëlle mir dann och konsequent géint d’Zouparke vun Trottoiren, Entréeën a Vëlospiste virgoen.