Am Alter vun 73 Joer ass den Éierendeputéierten a fréieren Déifferdenger a Kopleschter Gemengeconseiller John Schummer gestuerwen.
De John Schummer ass tëschent 1989 an 2009 fënnef mol mat der DP an d’Chamberwale gaang. 1992 ass hie fir de Josy Barthel op de Krautmaart nogeréckelt. De Verstuerwenen ass 1994 an 1999 direkt am Süde gewielt ginn. Hie war ënnert anerem President vum Benelux-Parlament.
De John Schummer war Papp vun dräi Kanner. De begeeschterte Fechter a fréieren Handballnationalspiller huet fir d’éischt am Finanzsekter geschafft a war duerno siwe Joer laang Direkter vun der Fondatioun Kräizbierg zu Diddeleng. D’DP trauert ëm e gudde Frënn, dee sech mat vill Energie fir Lëtzebuerg a seng Leit agesat huet. Mir sinn a Gedanke beim John senger Famill a senge Frënn an drécken hinnen eist éierlecht Matgefill aus.
