D’Demokratesch Partei begréisst d’Eenegung tëschent der Regierung an de Sozialpartner iwwer d’Verlängerung vun den Energiemesuren. Fir d’DP stoungen d’Stäerkung vun der Kafkraaft, d’Ofbremse vun der Inflatioun a méi Previsibilitéit fir d’Privatstéit a fir d’Entreprisen am Mëttelpunkt. D’Resultat weist, datt de Sozialdialog zu Lëtzebuerg funktionéiert a konkret Léisunge bréngt.
D’Hëllefe fir Stroum, Gas a Mazout ginn ëm zwielef Méint verlängert. Si entlaaschten d’Leit an d’Entreprisen däitlech bei hiren Energiekäschten a bidden hinnen en zouverlässege Kader, fir hir Ausgaben an hir wirtschaftlech Aktivitéiten ze plangen.
„Eis war et wichteg, datt sech déi Mesuren am nächste Joer net a Loft opléisen, mee datt d’Leit an d’Betriber weider dovu profitéiere kënnen“, esou d’Parteipresidentin Carole Hartmann.
D’Subventionéierung vun Diesel a Bensinn gëtt dogéint nëmmen ëm zwee Méint verlängert. Fir d’DP ass déi zäitlech Begrenzung vum Tankrabatt essentiell, well d’Klimaziler eng Prioritéit bleiwen. D’Entlaaschtung bei den Energiekäschte muss mat enger verantwortungsvoller Klimapolitik an Aklang stoen. Fir d’DP steet d’Elektrifizéierung weider am Virdergrond. Dofir bleiwen d’Subsiden an d’Virfinanzéierung vu Wärmepompelen a Photovoltaik-Anlage prioritär. Dobäi ass de finanzielle Notze vum Tankrabatt fir d’Leit limitéiert; grad esou wéi d’Ofbremse vun der Inflatioun. Fir d’Biergerinnen an d’Bierger virun héijen Energiepräisser ze schützen, gëtt et fir d’DP keng Alternativ zur Energietransitioun. Eng laangfristeg Verlängerung vum Tankrabatt ass dofir fir d’DP net ubruecht.
Stabilitéit a sozial Kohäsioun sinn an onsécheren Zäite besonnesch wichteg. Den Accord vun haut ass och e Succès vum Lëtzebuerger Modell, wéi d’DP e versteet: Am konstruktiven Austausch iwwerhuelen d’Sozialpartner gemeinsam Verantwortung a fannen Äntwerten am Kompromëss. De Sozialdialog huet domat nees seng Friichte gedroen.
