Kritik un der aktueller Politik betreffend dem Wollef

Parlamentaresch Froen
| 11. April 2022

Natur- an Ëmweltschutz

Gusty Graas

Den DP-Deputéierte Gusty Graas huet beim zoustännege Minister nogefrot wéi et mat der Preventiounspolitik vum Wollef ausgesäit, nodeems e Schéifer an engem rezenten Zeitungsartikel seng Onzefriddenheet iwwert déi aktuell Politik betreffend dem Wollef zu Lëtzebuerg zum Ausdrock bruecht huet.

Fro

„An engem Artikel deen de Weekend an enger Lëtzebuerger Dageszeitung publizéiert gouf, gëtt déi aktuell Politik betreffend de Wollef hei zu Lëtzebuerg vun engem Schéifer kritiséiert. Mam „Aktiouns- a Managementplan fir den Ëmgang mat Wëllef zu Lëtzebuerg“ deen 2017 ausgeschafft gouf, géif ee sech um Terrain als Schéifer eleng gelooss fillen. Weider heescht et, dass „d’Wanderschäferei“ an hirer jëtzeger Form a Gefor wier wann de Wollef sech zu Lëtzebuerg géif nidderloossen.

An deem Kader wollt ech der Madamm Ministesch fir Ëmwelt, Klima an nohalteg Entwécklung folgend Froe stellen:

Deelt Madamm Ministesch d’Aschätzung dass Efforten an dëser Thematik musse gemaach ginn?
Wa jo, wat ass Madamm Ministesch gewëllt ze maache fir d’Präventioun géint de Wollef ze verbesseren?
Ass ugeduecht den aktuellen „Aktiouns- a Managementplan fir den Ëmgang mat Wëllef zu Lëtzebuerg“ eventuell ze iwwerschaffen?“

Äntwert

Deelt Madamm Ministesch d’Aschätzung dass Efforten an dëser Thematik musse gemaach ginn?

Déi Aschätzung gëtt net gedeelt. De besoten Aktiouns- a Managementplang ass effektiv 2017 publizéiert ginn[1], no der Consultatioun vun engem Begleedungscomité mat Vertrieder aus staatleche Verwaltungen, awer besonnesch och mat Vertrieder vun Ziichter (z.B. dem Daachverband vun de Lëtzebuerger Schof- a Geessenziichter, DVLSGZ) a Jeeër. An der Praxis funktionéiert d’Ëmsetzung vum Plang gutt.

Wa jo, wat ass Madamm Ministesch gewëllt ze maache fir d’Präventioun géint de Wollef ze verbesseren?

De Wollef ass laut der europäescher wéi och der nationaler Gesetzesgebung (nationaalt modifizéiert Naturschutzgesetz vun 2018[2] a modifizéiert groussherzoglecht Reglement vun 2009[3]) eng integral geschützten Déierenaart.

Deemno wier et net legal eng “Präventioun géint de Wollef” ze bedreiwen. Par conter gesäit besoten Aktiouns- a Managementplang awer eng ganz Rei vu Präventiounsmoossname vir, déi ëmgesat a finanzéiert kënne ginn, mam Zil, d’Attacke vum Wollef op Schof a Geessen ze verhënneren oder op d’mannst däitlech ze erschwéieren.

Ass ugeduecht den aktuellen „Aktiouns- a Managementplan fir den Ëmgang mat Wëllef zu Lëtzebuerg“ eventuell ze iwwerschaffen?“

Den Aktiouns- a Managementplang ass een dynamescht Dokument dat duerchaus kann iwwerschafft ginn, wann dat néideg sollt sinn. Wéi hei virdrun ugedeit, funktionéiert de Plang a seng Moossnamen an der Praxis gutt an et besteet momentan keen zwéngenden Handlungsbedarf fir eng Modifikatioun.

[1] https://environnement.public.lu/fr/publications/chasse/bulletin_technique_BT5.html

[2] https://legilux.public.lu/eli/etat/leg/loi/2018/07/18/a771/jo

[3] https://legilux.public.lu/eli/etat/leg/rgd/2009/01/09/n3/jo?msclkid=147867f7d07d11ecad45ec1fb35cb892

Dir wëllt dës parlamentaresch Fro op Lëtzebuergesch iwwersat kréien?

Deelen:

Weider parlamentaresch Froen

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...

Wéi vill Frae gi wärend der Schwangerschaft an Dispens gesat ?

D’Aarbechtsrecht gesäit vir, datt schwanger Fraen op der Aarbecht verschidden Tâchen net iwwerhuelen dierfen. D’Gesetz gesäit dofir een Amenagement vun der Aarbechtsplaz vir oder eng Reaffektatioun op een anere Posten. Ass béides net méiglech, da muss d’Fra an Dispens gesat ginn.
D’DP-Deputéiert Corinne Cahen a Carole Hartmann wollte vun der Gesondheetsministesch ënnert anerem wëssen, wéi vill Frae pro Secteur an Dispens gesat ginn, wéi oft ee Recours géint eng Dispens vum Patron agereecht gouf an opgrond vu wéi enge konkrete Krittären d’Aarbechtsdokteren eng Dispens decidéieren.

weiderliesen...

Sollten den LNS a Privatlaboe bei Biopsien net méi zesummeschaffen?

Fir der laanger Waardezäit bei der Analyse vu Biopsien entgéint ze wierken, huet den LNS, deen hei ee Monopol huet, eng Rei Mesüren en place gesat.
D’DP-Deputéiert Mandy Minella an Dr Gérard Schockmel hu bei der Gesondheetsministesch nogefrot, wéi een Impakt dës Mesüren op d’Waardezäiten haten an ob net awer eng gréisser Zesummenaarbecht mat Privatlaboen envisagéiert sollt gi fir d’Delaie weider ze verkierzen.

weiderliesen...

Kee Remboursement méi fir dermatoskopesch Fotoen ?

Am Kader vun der Ënnersichung bei engem Hautdokter kënne Fotoe vu verdächtege Plazen op der Haut gemaach ginn, wou de Risiko besteet, datt sech Hautkriibs entwéckele kéint. Dem DP-Deputéierte Gusty Graas gouf elo zougedroen, datt dës Fotoen net méi vun der Krankekeess rembourséiert ginn. An enger parlamentarescher Fro un d’Gesondheetsministesch wëll de liberale Politiker ënnert anerem gewuer gi firwat dës Decisioun geholl gouf a wéi vill Patienten esou Fotoe beim Hautdokter an de leschte 5 Joer rembourséiert kruten.

weiderliesen...