Méi Verkéierssécherheet duerch Handysradaren oder -dronen?

D'Oflenkung duerch den Handy stellt ëmmer méi e grousse Risiko am Verkéier duer. Den DP-Deputéierte Max Hahn huet dowéinst bei den zoustännege Ministeren nogefrot, wat se dogéint wëllen ënnerhuelen, an ob geplangt wier, wéi an anere Länner, speziell Radaren oder souguer Dronen anzesetze fir ze kontrolléieren, ob d'Leit sech un de Code de la route halen.

« D’Oflenkung duerch den Handy gehéiert nieft ze héijer Vitesse an Alkohol um Steier ëmmer méi zu den Haaptursaache fir Accidenter am Stroosseverkéier. Gläichzäiteg ass et hautdesdaags duerch déi technologesch Méiglechkeete relativ einfach de Respekt vum Code de la route an där Hisiicht ze kontrolléieren a Verstéiss ze sanktionéieren.

An deem Kader wollt ech dem Här Minister fir Mobilitéit an ëffentlech Aarbechten an dem Här Minister fir bannenzeg Sécherheet folgend Froe stellen:

  • Bei wéi villen Accidenter war an de leschte fënnef Joer d’Oflenkung duerch den Handy am Spill ?
  • Wéi vill Protokoller huet d’Police an de leschte fënnef Joer geschriwwen, well de Chauffer wärend dem Fueren den Handy benotzt huet ?
  • Sinn déi Häre Minister der Meenung, dass d’Oflenkung duerch den Handy ëmmer méi eng Gefor am Stroosseverkéier duerstellt ? Wa jo, si méi staark Policekontrollen an där Hisiicht virgesinn ?
  • Ass geplangt, der Police d’Méiglechkeet ze ginn, per mobillem oder fixem Handysradar méi staark géint dës Infraktioun virzegoen ? Wat géif dergéint schwätzen ?
  • Wa jo, kënnen déi Häre Ministere Präzisiounen zu den neien Handysradare ginn, z.B. wou se hikéimen ?
  • Ass virgesinn, d’Police wéi a Spuenie mat Dronen z’equipéieren, fir dës an aner Infraktiounen ze kontrolléieren ?
  • Wier et méiglech, mat de fixe Radaren, déi schonn installéiert sinn, ze kontrolléieren, ob Chaufferen den Handy um Steier benotzen ? »

Äntwert

Zu Lëtzebuerg hätt ee wéineg Donnéeën, fir genee ze soen, wéi vill Accidenter duerch d’Benotze vum Handy um Steier veruersaacht géife ginn, sou d’Ministeren an hirer Äntwert. Generell kéint een awer feststellen, dass d’Oflenkung vum Chauffer géif zouhuelen, well et ëmmer méi Zorten vun Oflenkung gëtt (elektronesch Apparater, Musek iwwer Kopfhörer lauschteren, iessen, drénken, fëmmen…) an domadder d’Oflenkung als Risikofaktor am Verkéier och géif zouhuelen. Dowéinst mécht d’Police reegleméisseg Sensibiliséierungs- grad wéi repressiv Campagnen am Verkéier. Et wier awer net geplangt, Radaren oder Dronen an Zukunft anzesetzen.

Dir wëllt dës parlamentaresch Fro op Lëtzebuergesch iwwersat kréien?

Deelen:

Share on facebook
Facebook
Share on twitter
Twitter
Share on linkedin
LinkedIn
Share on email
Email
Share on whatsapp
WhatsApp

Weider parlamentaresch Froen

Gëtt d’Museldall Unesco Weltkulturierwen?

De « Weltkulturerbe Moseltal » -Veräin ass am Gaangen eng Kandidatur op d’Been ze stelle fir datt d’Museldall soll en Unesco-Weltkulturierwe ginn. D’Wënzer aus Däitschland sinn awer net begeeschtert, well geplangt ass, datt si hir Wéngerten an Terrasselag nëmmen nach dierfen nom der traditioneller « Einzelpfahlerziehung » ubauen. Den DP-Deputéierte Gusty Grass huet bei der zoustänneger Ministesch nogefrot wou d’Kandidatur drun ass an ob de Wäibauminister scho Kontakt mat de Lëtzebuerger Wënzer hat fir si ze froe wat si vun dëser neier Contrainte halen.

weiderliesen...
Covid Text

Asaz vu serologeschen Tester zu Lëtzebuerg

Serologesch Tester erlaben et engem erauszefannen, ob een an der Vergaangenheet mam Sars-CoV-2 infizéiert war an Antikierper géint d’Infektioun gebilt huet. Ma ee negativen serologeschen Test, e puer Méint no engem positiven PCR-Test, léisst d’Fro opkommen, ob de PCR-Test falsch-positiv war. Zu dësem Sujet, wollt den DP-Deputéierten Gusty Graas vun der Gesondheetsministesch ënnert Anerem wëssen, wéi vill serologesch Tester scho gemaach goufen an ob Informatiounen iwwer falsch-positiv PCR-Tester virleien.

weiderliesen...