Problemer mat verschiddenen RGTR-Buslinnen am Norden

Duerch d'Ofschafe respektiv d'Ëmorganisatioun vu verschiddene Buslinnen am Norden schéngt et zu Schwieregkeeten am Schülertransport komm ze sinn. Den DP-Deputéierten André Bauler huet nogefrot, wat de Minister ënnerhuele wëll.

Als Reaktioun op d’parlamentaresch Fro n°5711 vum 8. Februar 2022 hu sech etlech Leit bei mir gemellt fir mer ze soen, datt et aktuell och an aneren Deeler vum Éislek Problemer gëtt.

Sou wier et och lo fir d’Schüler net méi méiglech fir vu Géisdref direkt op Kautebaach op d’Gare mam Bus ze fueren. Si kréie rekommandéiert fir mam Bus op Wooltz ze fueren oder op d’Giewelsmillen, wat awer méi Zäit kascht an ëmständlech ass.

Doriwwer eraus schéngen aner Linnen, wéi z.B. déi tëscht Baaschtnech a Maarnech, déi ganz dacks den Dag iwwer fueren, däitlech ënnerbelaascht ze sinn.

An deem Kader wollt ech dem Här Minister fir Mobilitéit an ëffentlech Aarbechten folgend Froe stellen:

  • Ass den Här Minister bereet fir d’Buslinnen am Éislek sou séier wéi méiglech enger allgemenger Iwwerpréiwung ze ënnerzéien, fir se de Bedürfnisser vun de Leit, besonnesch awer vun deene Jonken, déi an d’Schoul fueren, unzepassen?
  • Léisst de Ministère de Moment Zielungen duerchféieren, fir sech méi e geneet Bild iwwer d’Situatioun ze maachen?
  • Ass den Här Minister gewëllt fir de Schüler aus der Gemeng Géisdref entgéintzekommen, déi virun Dezember 2021 direkt op Kautebaach mam Bus konnte fuere fir op Clierf oder an d’Nordstad an de Lycée ze kommen, an den Horaire an hirem Interesse punktuell unzepassen?“

Äntwert

Den honorablen Deputéierten freet ob d’Buslinnen am Éislek géifen iwwerpréift ginn, fir se de Bedürfnisser vun de Leit, a besonnesch deene Jonken, déi an d’Schoul fueren, unzepassen.

Meng Servicer sinn am gaangen zesumme mat de betraffene Gemengen eng adequat Léisung ze fannen, déi och mëttel- an laangfristeg Sënn mécht. An der Tëschenzäit hu mir scho verschidden Upassunge gemaach a schaffe weider drop hin fir jidderengem schnellstméiglech entgéint ze kommen.

Wat Zielungen ugeet, sou mécht d’Verwaltung fir ëffentlechen Transport bei all Schoulrentrée grouss Kontrollen, dëst bei all Campus oder Lycée. Wärend dem Schouljoer ginn punktuell Zielunge gemaach, des op Ufro vum MENJE, vun Elteren/Schüler oder nach vu Busbetriber déi eis a Kenntnis setzen dat et e Problem gëtt.

Folgend Offeren bidden sech de Schüler aus der Gemeng Géisdref un:

  • Linn RGTR 608 bis op Kautebaach an dann op den Zuch ëmklammen fir an de Clierfer Lycée
  • Linn RGTR 610 bis op Giewelsmillen an dann op den Zuch ëmklammen bis an d’Nordstad

Aner oder eventuell direkt Verbindungen missten nach iwwerpréift ginn, och wat d’Zuelen vun de potentiellen Notzer ugeet.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...