D’DP-Fraktioun huet haut de Bilan vun hirer parlamentarescher Aarbecht fir d’Sessioun 2025/2026 virgestallt. De Fraktiounspresident Gilles Baum huet zesumme mat sengen 13 Deputéiertekolleegen op en intensiivt Joer zeréckgekuckt, dat virun allem vun den Auswierkunge vun enger ugespaanter internationaler Lag gepräägt war.
Der Regierung an den Deputéierte vun der parlamentarescher Majoritéit ass et trotz den dauerhafte Belaaschtungsepreuve gelongen, d’Land op engem séchere Kurs ze halen. De Gilles Baum huet betount, dass an de leschten 12 Méint vill Sue mobiliséiert goufen, fir d’Bierger an d’Wirtschaft direkt an indirekt z’entlaaschten.
Am Mëttelpunkt stoungen d’Kafkraaft, de Logement an d’Ëmwelt. Dës Prioritéite fënnt een och am rezenten Tripartite-Accord erëm. Fir déi liberal Fraktioun sinn déi decidéiert Mesüre keng reng Krisenausgaben, mee essenziell Investitiounen an d’Zukunft, déi de sozialen Zesummenhalt am Land nohalteg sécheren.
Mat Bléck no vir weist sech d’DP-Fraktioun determinéiert a realistesch: Lëtzebuerg wäert och an Zukunft viru groussen Erausfuerderunge stoen. D’Deputéiert wäerten dës Aufgabe mat vollem Asaz, fundéiertem Know-How an um Fundament vun hire Grondwäerter ugoen.
Virun der Press huet de Gilles Baum nach emol de Kärprinzip vun der parlamentarescher Aarbecht vun der DP ënnerstrach. Nëmmen eng gesond a kompetitiv Economie kéint d’Moyenen erwirtschaften, déi fir d’Finanzéierung vu konsequente Sozialmoossname néideg sinn.
„A Krisenzäite war an ass an der Chamber op d’Politik vun der DP Verlooss“, sou de Gilles Baum ofschléissend. „Mir sti fir eng sozial-liberal Politik fir d’Land a fir d’Leit. Eng couragéiert an optimistesch Politik, déi an d’Zukunft vu Lëtzebuerg an un de Potenzial vu senge Biergerinnen a Bierger gleeft.“
