Wat ass geplangt, fir d’Verkéierssécherheet op der Léier ze verbesseren?

Op der Léier tëscht der Hierheck a Groussbus kënnt et ëmmer nees zu geféierleche Situatiounen. Den DP-Deputéierten André Bauler huet nogefrot, wat geplangt ass fir d'Verkéierssécherheet op där Plaz ze verbesseren.

Op der Léier tëscht der Hierheck a Groussbus ass et viru kuerzem zu engem Accident komm, wéi eng Persoun un der Hierheck erfort koum an eng aner Persoun bei engem Haus eraus gefuer ass. Et gëtt op dësem Lieu-dit effektiv e Problem vu Visibilitéit. D’Situatioun ass esou oniwwersiichtlech, datt reegelméisseg do Accidenter geschéien, zemol well sech net ëmmer un déi virgeschriwwe Vitess gehale gëtt.

Zwar huet sech duerch de Radar ënnen ob der Léier d’Situatioun verbessert, ma uewen ob der Kräizung N12-CR345 fir op Dellen gëtt dacks nees op d‘Gaspedall gedréckt.

Viru Jore war geplangt ginn fir ob dëser Kräizung déi ganz Situatioun ze änneren bzw. ze verbesseren, mee et ass bis elo nach näischt geschitt. Et wier awer Terrain do fir ze tauschen.

An deem Kader wollt ech dem Här Minister fir Mobilitéit an ëffentlech Aarbechten folgend Froe stellen:

  • Gëtt et mëttlerweil eng konkret Léisung fir d’Situatioun op der Léier z’entschäerfen?
  • Wa jo, bis wéini kéint ee Projet ëmgesat sinn?“

Äntwert

Gëtt et mëttlerweil eng konkret Léisung fir d’Situatioun op der Léier z’entschäerfen?

Et ass richteg, dass virun ongeféier 20 Joer op der Léier eng Etüd gemaach ginn ass, fir d’Ausfaart vum CR345 op d’N12 ze verleeën fir angeeblech d’Visibilitéiten ze verbesseren.

Am Kader vun dëser Etüd huet sech awer rausgestallt, dass déi geplangten Ännerung d’Siicht a Richtung Westen éischter verschlechtere géif.

Vu dass op dëser Platz statistesch keng Accidenter enregistréiert gi sinn, an och keng aner Verbesserung méiglech ass, gouf dës Etüd net weider gefouert.

Op dëser vum honorabelen Deputéierte beschriwwener Plaz ass awer vun der Hierheck respektiv vun Groussbus kommend d’Beschëlderung am leschte Joer adaptéiert ginn, déi d’Automobilisten engersäits un déi maximal erlaabte Geschwindegkeet erënnert an anersäits op d’Gefor vun erausfuerderenden Autoen hiweist (allgemeng Gefor Beschëlderung A,21 completéiert duerch d’Zousaztafel “sortie de véhicules”).

Wat d’Accidenter ubelaangt, sinn déi meescht (méi schwéier) ongeféier 500 Meter méi wäit wech a Richtung Groussbus geschitt. Säitdeem de Radar am Joer 2019 op dëser Plaz installéiert ginn ass, ginn et awer och hei keng weider Virfäll méi.

Et bleift ze bemierken, dass eventuell Kontrolle bei Verstéiss géint de Code de la Route op dëser Plaz, wéi zum Beispill d’Iwwerschreide vun der maximal erlaabter Geschwindegkeet op der Héicht vu der Kräizung fir op Dellen, een Deel vun de Missioune vun der d’groussherzoglecher Police duerstellt.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...