Wéi steet et ëm den Ënnerhalt vun de staatleche Vëlospisten, besonnesch am Wanter?

Blieder, Bulli oder soss Knascht op de Vëlospisten stelle grad am Wanter e Sécherheetsrisiko fir Vëlosfuerer duer. Den DP-Deputéierte Max Hahn huet dowéinst nogefrot, wéi et ëm den Ënnerhalt vun de staatleche Vëlospiste steet.

„D’Fëderung vun der doucer Mobilitéit ass eng vun de Prioritéite vun der Regierung, dat net just am Kampf géint de Klimawandel, mee och fir e Mentalitéitswiessel hin zu enger méi multimodaler an nohalteger Approche an der Mobilitéit zu Lëtzebuerg z’encouragéieren. An deem Kader goufen z.B. net just speziell Primme fir de Kaf vun engem Vëlo oder Pedelec agefouert, et gouf a gëtt och den nationale Vëlospistereseau kontinuéierlech ausgebaut.

Allerdéngs ass et besonnesch an der naasser Joreszäit op ville Plaze sou, dass Blieder, Knascht a Bulli op de Vëlospiste leien, déi souwuel e Sécherheetsrisiko fir Cyclisten duerstellen, wéi och generell d’Leit net onbedéngt encouragéieren, de Vëlo ze huelen, sief et fir op d’Schaff oder soss Deplacementer.

An deem Kader wollt ech dem Här Minister fir Mobilitéit an ëffentlech Aarbechten folgend Froe stellen:

  • Ginn déi staatlech Vëlospiste reegelméisseg gebotzt respektiv ënnerhal?
  • Wann net, ass virgesinn dëst an Zukunft méi systematesch ze maachen, besonnesch wärend den Hierscht- a Wanterméint?
  • Weess den Här Minister vun Accidenter vu Cyclisten, déi op de schlechten Zoustand vun enger Vëlospist zréckzeféiere wieren?
  • Wéi vill Meldunge krut d’Administration des ponts et chaussées an de leschten dräi Joer iwwer den Zoustand vu Vëlospisten?“

Äntwert

Ginn déi staatlech Vëlospisten reegelméisseg gebotzt respektiv ënnerhal ? Wann net, ass virgesinn dëst an Zukunft méi systematesch ze maachen, besonnesch wärend den Hierscht- a Wanterméint ?

Als éischt gëllt et ze betounen, dass een tëscht dem konstruktiven an dem lafenden Ënnerhalt vun de staatleche Vëlospiste muss ënnerscheeden.

Laut dem modifizéierte Gesetz vum 28. Abrëll 2015 iwwert den nationale Vëlosreseau, ass d‘Ponts et Chaussées fir de konstruktiven Ënnerhalt vun den nationale Vëlospisten, déi ausseruerts an inneruerts op Staatsstroosse verlafen, zoustänneg. Zum konstruktiven Ënnerhalt zielt ënner anerem d’Flécke vu Rëss, d‘Schléisse vu Fouen, Accotementer respektiv d’Erneiere vum ganze Belag. D’Ausnam vun dëser Reegel sinn national Vëlospisten déi ob enger Gemengestrooss inneruerts verlafen, hei fält de konstruktiven Ënnerhalt an d’Kompetenze vun der Gemeng.

Den konstruktiven Ënnerhalt gëtt, wann d’Wiederkonditiounen et zouloossen, vu der Ponts et Chaussées iwwert dat ganzt Joer gemaach. Déi meeschten Aarbechten ginn allerdéngs am Fréijoer an am Summer gemaach.

De lafenden Ënnerhalt fält allgemeng ënnert den Zoustännegkeetsberäich vun de Gemengen. Ënnert dem lafenden Ënnerhalt versteet sech ënner anerem d’Botze vun der Strooss, de Kanalisatiounen, den Equipementer, d’Fortmaache vu Graffitien op den Ouvragen, d’Botze vun der Beliichtung (déi net zur der ëffentlecher Beliichtung vun der Strooss gehéiert) ewéi och d’Schneide vun de Beem an Äscht an de Wanterdéngscht.

Dobäi ass ze bemierken, dass folgend dem Artikel 6 quater, de lafenden Ënnerhalt vu Vëloexpressweeër vun der Ponts et Chaussées assuréiert gëtt.

Wees den Här Minister vun Accidenter vu Cyclisten, déi op de schlechten Zoustand vun enger Vëlospiste zréckzeféiere wieren ?

Mir leit keng Statistik iwwert Accidenter vu Cyclisten op den nationale Vëlospiste vir. Et ass dobäi awer ze erwänen, dass d’Vëlospisten am allgemengen an engem gudden Zoustand sinn.

Wéi vill Meldungen krut d’Administration des Ponts et Chaussées an de leschten dräi Joer iwert den Zoustand vu Vëlospisten ?

Säit 2017 kann all Reklamatioun oder Commentaire zum Zoustand vun de Vëlospisten op d’E-Mail-Adress pistescyclables@pch.etat.lu geschéckt ginn. Am Fall wou d‘Ponts et Chaussées net zoustänneg ass, ginn dës Mailen un déi zoustänneg Gemenge weider geschéckt.

Am Joer 2019 krut d‘Ponts et Chaussées 18 Meldungen, 2020 waren et der 14 an 2021 nach 7 iwwert den Zoustand vu Vëlospisten eran. Dobäi muss een awer nach soen, dass och Reklamatiounen iwwert net gebotzte Vëlosweeër béi d‘Ponts et Chaussées erakommen, wou awer déi jeeweileg Gemengen zoustänneg sinn.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Wéi laang ass d’Waardezäit an der « Travel Clinic » ?

Bei Reesen a méi tropesch Regioune kann een sech an der “Travel Clinic” vum CHL beroden a géint verschidde Krankheeten impfe loossen. D’Waardezäiten an dëser Klinick sollen den Ament awer nawell laang sinn.
D’DP-Deputéiert Dr Gérard Schockmel a Gilles Baum hu bei der Gesondheetsministesch nogefrot, wéi vill Patienten an de leschten 10 Joer an der “Travel Clinic” empfaange goufen, wéi d’Waardezäiten sech an dëser Period entwéckelt hunn an ob et net sënnvoll wier online ee Rendez-vous huelen ze kënnen, esouwéi dat fir vill aner Servicer vum CHL méiglech ass.

weiderliesen...

Wéi kann een de Beruff vum Aide-soignant revaloriséieren ?

De Manktem u Fleegepersonal gehéiert zu de gréissten Erausfuerderunge vun dëser Regierung. D’DP-Deputéiert André Bauler a Gilles Baum wollten an deem Kontext vun der Gesondheetsministesch ënnert anerem wëssen, wéi vill Aides-soignanten aktuell am Land schaffen, wéi vill de Beruff an de leschte Jore gewiesselt hunn a wéi eng Mesüren d’Regierung ze huele gedenkt fir de Beruff nees méi attraktiv ze maachen.

weiderliesen...

Medezinesch Transferten an d’Ausland

Zënter dem 1. Juni 2025 mussen d’Dokteren en neie Formulaire ausfëllen, wann si ee Patient fir Soinen an d’Ausland schécke wëllen. Den Dokter muss elo obligatoresch uginn, ob d’Prestatiounen zu Lëtzebuerg an engem “akzeptabelen Delai” ugebuede kënne ginn, oder net. Kräizt den Dokter un, datt d’Prestatiounen eigentlech och zu Lëtzebuerg ugebuede kéinte ginn, da gëtt d’Demande fir den Transfert automatesch refuséiert.
Den DP-Deputéierten Dr Gérard Schockmel huet bei der Gesondheetsministesch nogefrot, ob déi reng Reduzéierung op den “akzeptabelen Delai”, ouni d’Qualitéit vun de Soinen ze berécksiichtegen, net zu onberechtegte Refuse féiere kéint, an den neie Formulaire Dokteren net dozou zwénge kéint falsch Deklaratiounen ze maache fir hirem Patient déi beschtméiglechst Soinen ze garantéieren.

weiderliesen...

Wéi vill Doktere schaffen am Norde vum Land ?

Am Norde vum Land mussen d’Bierger oft wäit Deplacementer a Kaf huele fir an eng Klinick oder eng Maison médicale ze kommen.
D’DP-Deputéiert André Bauler a Gilles Baum hunn d’Gesondheetsministesch ënnert anerem gefrot, wéi vill Generalisten a Spezialisten am Norde vum Land schaffen, wéi d’Altersstruktur bei den Dokteren ass a wéini eng zweet Maison médicale am Norden opgemaacht kéint ginn.

weiderliesen...