Ass et méiglech, Mini-Wandanlagen bei sech doheem opzeriichten?

Nieft PV-Anlage si kleng Wandturbinen eng gutt Méiglechkeet, doheem säin eegene Stroum ze produzéieren. D'DP-Deputéiert Max Hahn a Claude Lamberty hunn dowéinst nogefrot, ob dëst erlaabt ass an ob de Staat och Subsiden fir méi kleng Wandanlage gëtt.

„Den Ausbau vun den erneierbaren Energien ass eng vun de Prioritéite vun der Regierung am Kampf géint de Klimawandel. Eng interessant Pist ass de Modell vum Prosumer, also der Produktioun a Consommatioun vun Energie op lokalem Niveau, deen duerch d’Regierung och schonn op déi eng oder aner Manéier ënnerstëtzt gëtt.

D’Autoconsommatioun vun nohaltegem Stroum beschränkt sech allerdéngs am Moment op PV-Anlagen, wärend Wandkraaft éischter am Kader vu grousse Wandparke genotzt gëtt.

Déi spuenesch Firma Vortex Bladeless huet eng Turbinn entwéckelt, deen duerch de Wand a Schwéngung geréit an op déi Manéier Stroum produzéiert. De Modell ass mat maximal 3 Meter Héicht däitlech méi kleng ewéi normal Wandrieder a kéint och ënner gewësse Konditiounen z.B. um Daach vu Büroen oder Wunnhaiser installéiert ginn.

Donieft gëtt et um Marché och e grousse Choix u vertikale Wandturbinnen, déi geneesou fir d’Stroumproduktioun a klengem Moossstaf agesat kéinte ginn an PV-Anlagen ergänze kéinten.

An deem Kader wollte mir der d’Madamm Ministesch fir Ëmwelt, Klima an nohalteg Entwécklung an dem Här Minister fir Energie folgend Froe stellen:

  • Ass d’Regierung au courant vun dëse Wandturbinnen?
  • Ginn et Iwwerleeungen, ënner gewëssen Ëmstänn d’Installatioun vun esou Wandturbinnen mat méi niddreger Leeschtung z.B. doheem um Daach oder am Gaart ze erlaben? Wa jo, wat wieren d’Konditiounen?
  • Ass d‘Regierung bereet, esou Wandturbinnen, änlech ewéi PV-Anlagen, ze subventionéieren? Wann net, firwat net?“

Äntwert

– Ass d’Regierung au courant vun dëse Wandturbinnen?

De Sujet vu klenge Wandanlagen ass de betraffene Ministère bekannt, an an der Vergaangenheet goufen och schonns Entwéckler vu sou Mini-Wandanlagen ënnerstëtzt. Och si vereenzelt sou Anlagen hei am Land opgeriicht ginn. Wat de spezifesche Fall vu Vortex Bladeless ugeet, sou leien dem Minister zoustänneg fir Energie keng präzis Demarchen oder Informatioune vir.

– Ginn et Iwwerleeungen, ënner gewëssen Ëmstänn d’Installatioun vun esou Wandturbinnen mat méi niddereger Leeschtung z.B. doheem um Daach oder am Gaart ze erlaben? Wa jo, wat wieren d’Konditiounen?

Wann een esou eng Anlag wëll opriichten, gëtt et jee no Anlag an no Plaz wou se soll opgeriicht ginn, verschidden Obligatiounen, wéi z.B.

–    eng Baugeneemegung,

–    eng Geneemegung opgrond vum Naturschutzgesetz beim Opriichten innerhalb vun enger Gréngzone,

–    eng Geneemegung opgrond vum Kommodosgesetz (nëmme Wandturbinnen/Wandanlage mat iwwert 100 kVA, wat dann 80 kW installéierter Leeschtung géing entspriechen, brauchen eng Kommodosgeneemegung, fir méi kleng Anlage gesäit d’Kommodosgesetz keng Obligatioune vir).

Onofhängeg vun deenen Obligatiounen ass et och wichteg, bei esou Anlagen op d’Schallemissiounen (dB Wäerter) opzepassen, genee sou wéi op déi technesch Uschlossbedingunge vum Netzbedreiwer.

– Ass d‘Regierung bereet, esou Wandturbinnen, änlech ewéi PV-Anlagen, ze subventionéieren? Wann net, firwat net?“

Fir d’Wandkraaft ginn et 2 finanziell Ureizer déi och fir kleng Wandanlage gëllen:

  • engersäits eng Hëllef op der Investitioun fir Betriber (déi beim Wirtschaftsministère ugefrot ka ginn) iwwert den Artikel 9 vum Staatshëllefgesetz vum 15. Dezember 2017;
  • an anerersäits den Aspeisetarif (vum Energieministère) deen am Reglement iwwert d’Produktioun vu Stroum op Basis vun erneierbaren Energië virgesinn ass.

Et ass och ervir ze hiewen, datt grouss Wandturbinnen däitlech méi Stroum produzéieren, wéi des kleng an d’Regierung dowéinst virun allem op den Ausbau vun dëse setzt.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Hëllefen diagnostesch Schnelltester géint de Mangel un Antibiotiquen?

Frankräich iwwerleet d’Verschreiwe vun Antibiotiquen nëmmen z’erlaben, wa virdrun een diagnostesche Schnelltest gemaach gëtt. Dëst fir mat Sécherheet festzestellen, op et sech ëm eng bakteriell oder viral Infektioun handelt.
Dëst kéint engersäits dem Mangel un Antibiotiquen entgéint wierken, an anerersäits d’Antibiotikaresistenz verréngeren.
D’DP-Deputéiert Gilles Baum a Gusty Graas hu bei der Gesondheetsministesch nogefrot, wéi vill Antibiotiquen an de leschte fënnef Joer zu Lëtzebuerg verschriwwe goufen an ob Doktere méi sensibiliséiert sollte ginn diagnostesch Tester ze verschreiwen.

weiderliesen...

Wéi vill Patienten krute kee Rendezvous méi an engem Stater Spidol?

Rezent huet ee Spidol an der Stad Bréiwer u Patiente verschéckt hir hinne matzedeelen, datt verschidde medezinesch Zerwisser keng nei Rendezvousen méi unhuele kënnen – ausser et handelt sech ëm eng Urgence oder een héich komplexe Fall.
Den DP-Deputéierten Gusty Graas huet bei der Gesondheetsministesch nogefrot, wéi et zu dësen Incapacitéiten konnt kommen, ob nach aner Spideeler betraff sinn a wat géint dës Situatioun ënnerholl gëtt.

weiderliesen...

Kënnt et zur Kommerzialiséierung vun therapeutesche Wunnstrukturen?

Therapeutesch Wunnstrukturen ginn aktuell vun der konventionéierter Psychiatrie am Extrahospitalier fir Persounen ugebueden, déi ënnert psychesche Problemer leiden.
Elo zirkuléieren Gerüchter, datt de Gesondheetsministère plangt enger kommerzieller Societéit een Agrément ze ginn fir esou therapeutesch Wunnstrukturen ze geréieren.
D’DP-Deputéiert Gusty Graas a Gilles Baum hu bei der Gesondheetsministesch nogefrot, ob dës Gerüchter der Wourecht entspriechen a, wa jo, firwat dëse Wee ageschloe gëtt, amplaz bestoend Acteuren aus der konventionéierter Psychiatrie am Extrahospitalier z’ënnerstëtzen.

weiderliesen...

Kënnt et och zu Lëtzebuerg zum Mëssbrauch vu “Protonenpumpenhemmer”?

De laangjärege Konsum vu sougenannte “Protonenpumpenhemmer” (IPP), déi géint Moproblemer agesat ginn, erhéijen enger rezenter wëssenschaftlecher Etüd no de Risiko un Demenz z’erkranken. Den DP-Deputéierten Gusty Graas huet bei den zoustännege Ministeren nogefrot, ob hinnen dës Etüd bekannt ass, wéi eng Conclusiounen si aus hir zéien, an ob Zuelen iwwert den Asaz vun IPP zu Lëtzebuerg bekannt sinn.

weiderliesen...