D’DP trauert ëm d’Mady Schaffner

E Liewen am Zeeche vun der Stad Eechternoach a vum Scoutissem

En Dënschdeg ass d’Iechternacher Éierebuergermeeschtesch Mady Schaffner am Alter vu 86 Joer gestuerwen.

D’Mady Schaffner ass 1934 als Kand vun der Berthe Barblé a vum spéidere Resistenzler, DP-Minister, Deputéierten a Buergermeeschter Robert Schaffner op d’Welt komm. Och hire Grousspapp Mathias Schaffner war Buergermeeschter vun Iechternach.

Der Mady Schaffner hier Kandheet war gepräägt duerch d’Wéien an d’Nowéie vum Krich, mee gläichzäiteg huet si scho fréi hier Passioun erkannt, fir sech fir hier Matmënschen anzesetzen. No der Primärschoul huet si hier Première am Meedercherslycée um Lampertsbierg gemaach an huet dono zu Bréissel an an der Haushaltungsschoul zu Ettelbréck Haushaltungsléierin studéiert. Déi Verstuerwen huet am Ufank vun hirer berufflecher Carrière a verschiddene Primärschoulen ersat an huet du bis 1988 am Iechternacher Enseignement complémentaire geschafft.

D’Mady Schaffner war Mamm vun enger Duechter, huet dräi Enkelkanner an hat och d’Chance hier sechs Urenkele kennen ze léieren.

D’Mady Schaffner war vun 1988 bis 1998 fir d’DP am Gemengerot. 1994 ass si als éischte Fra als Buergermeeschtesch vun Iechternach vereedegt ginn. Si huet véier Joer laang d’Geschécker vun der Abteistad geleet.

Als Buergermeeschtesch huet Mady Schaffner wichteg Projeten ëmgesat oder an d’Wee geleet: Ë.a. d‘Viirarbechte fir de Bau vum Kultur- an Tourismuszentrum am Paatregebei, eng nei Schoulinfrastruktur, d’Renovéierung vum Spidol an d’Schafe vun enger regionaler Industriezon.

D’Mady Schaffner war awer och zäitliewes eng „Lussig Quaichléck“ an de Scouten a Guidë vun der AGGL. Spéider war si an der FNEL engagéiert. Si huet d’Prinzippie vun dësem Jugendmouvement gelieft an och u vill Jonker weiderginn. Hiere sozialen Engagement am Groussen ewéi am Klénge war virbildlech.

Mam Mady Schaffner verléiert Iechternach eng verdéngschtvoll Politikerin an een häerzensgudde Mënsch.

D’DP Eechternoach dréckt der Famill an de Frënn vun der Verstuerwener hiert éierlecht Bäileed aus.

Deelen:

Facebook
Twitter
LinkedIn
Email
WhatsApp

Weider News

Claude Lamberty

E Solidaritéitspak fir Land a Leit

An der Tribune Libre um Radio schwätzt eise Generalsekretär Claude Lamberty dës Woch iwwert den historesche Solidaritéitspak vun 830 Milliounen Euro, op deen d’Tripartite sech gëeenegt huet, fir d’Leit an d’Betriber duerch déi aktuell Kris ze bréngen.

weiderliesen...

Zesumme géint Russland stoen

A senger Tribune libre um Radio schwätzt eisen Deputéierte Gusty Graas iwwert déi russesch Attacke géint d’Ukrain an iwwert d’Mesuren, déi de fräiheetlech gesënnte Länner géint de Regime vum Wladimir Putin zur Verfügung stinn.

weiderliesen...
Yuriko Backes

Yuriko Backes – déi nei Finanzministesch

Als Finanzministesch ass et eng natierlech Prioritéit, dofir ze suergen, datt ons Staatsfinanze weider gesond bleiwen. Da kënne mir nämlech onst Land gezielt op d’Zukunft virbereeden, an zwar andeems mir an déi nohalteg an an déi digital Entwécklung investéieren.

weiderliesen...

Klimabiergerrot

Am Kader vu senger Ried zur Lag vun der Natioun huet de Premier Xavier Bettel d’Iddi vun engem Klimabiergerrot lancéiert. Enn Januar ass et du lassgaang: An der éischter vu ronn 15 Reunioune sinn d’Membere fir d’éischt  iwwert den aktuelle Stand der Dinge a Saache Klimapolitik informéiert ginn.

weiderliesen...