Marc Hansen

Digitaliséierung vum ëffentlechen Déngscht

Den delegéierte Minister fir d’Digitaliséierung Marc Hansen huet sech eng Rëtsch ambitiéis Projete fir dëtt Joer virgeholl. Déi aktuell Prozeduren an Aarbechtsofleef bei der Fonction Publique solle moderniséiert ginn, fir de Fuerderunge vum digitalen Zäitalter gerecht ze ginn.

De Minister setzt seng Kaarte bewosst op d’Potenzial vun de GovTech, also op Technologien, déi souwuel den Echange mat de Bierger a mat den Entreprisen, ewéi och déi intern Kommunikatioun tëscht den eenzelen Administratioune vereinfache sollen.

EXPERIMENT, EXCHANGE, INNOVATE

De GovTech Lab soll d’Digitaliséierung vum ëffentlechen Déngscht acceleréieren, andeems een d’Wësse vun externen Acteure matabezitt. Ganz am Sënn vun enger Approche d’Innovation ouverte, schaft de Ministère eng interaktiv Plattform, déi d‘Acteuren aus der Fonction Publique mat Experten aus der Privatwirtschaft zesummebréngt. Eng Communautéit fir den Austausch vu kreativen Iddien a vun neien Technologien.

De GovTech Lab soll eng innovativ Aarbechtskultur fërderen, andeems e verschidden Challengen organiséiert. Fir d‘éischt proposéieren d‘Administratiounen e konkrete Probleem, deen am Kader vum Challenge soll geléist ginn. Dono gëtt dann eng ëffentlech Ausschreiwung gemaach, bei där Start-uppen, Fuerscher, Entreprisen, Independanten an och Studente kënne matmaachen. Si sollen innovativ Léisunge fir de spezifeschen Challenge proposéieren a kënnen esou hir individuell Kompetenzen ënner Beweis stellen.

Den éischten Challenge mam Numm Bye bye robots! ass schonn Enn vum leschte Joer lancéiert ginn: Mam Zil fir d’Websäite vun der Fonction Publique viru Spam-Ugrëff ze schützen. D’Kandidate sollen eng nei Method entwéckelen, mat där iwwerpréift ka ginn, ob sech effektiv e Mënsch oder awer e Roboter ageloggt huet.

ENG HARMONISÉIERUNG VUN DEN ADMINISTRATIVE PROZEDUREN ZU GONSCHTE VUN DE BIERGER

Am Sënn vun der Simplification administrative vum ëffentlechen Déngscht, huet de Minister Marc Hansen ufanks Januar en aneren neie Projet virgestallt: enquetes-publiques.lu – een digitaalt Portal fir Bedeelegungsprozeduren.

Den neie Site erlaabt dem Bierger e séieren an einfachen Accès op d’Informatiounen zu den aktuellen, ëffentleche Prozeduren. D‘Bierger hunn esou d’Méiglechkeet hir Bäiträg elektronesch un déi concernéiert Autoritéite weiderzeginn. Ausserdeem kënne sech d’Notzer fir spezifesch Prozeduren oder Thematiken abonéieren. A schliisslech profitéieren d’Administratioune vum neie Site duerch déi méi einfach a séier Gestioun vun de Biergerbäiträg.

STRATEGIE VUN DER DIGITALER GOUVERNANCE

Viru kuerzem huet de Minister Marc Hansen och déi nei Strategie Gouvernance électronique 2021-2025 virgestallt, déi di verschidden Elementer fir d‘Digitaliséierung vum ëffentlechen Déngscht definéiert. Dës Transitioun soll vu 6 Prinzippien guidéiert ginn.

Wärend 2015 schonn déi 3 Krittären vum Once only, Digital by Default an der Transparenz festgehalen gi sinn, kommen elo 3 neier dobäi:

  • Inclusioun: d’Servicer solle fir jiddereen accessibel a verständlech sinn,
  • Sécherheet a Vertrauen: d’Administratioune mussen de Schutz vu privaten Donnéeë garantéieren,
  • Interoperabilitéit: standardiséiert, informatesch Programmer sollen d’Kompatibilitéit vun den Donnéeë garantéieren an esou d’Kommunikatioun tëschent den Administratiounen a mat de Bierger vereinfachen.

Deelen:

Facebook
Twitter
LinkedIn
Email
WhatsApp

Weider News

Claude Lamberty

E Solidaritéitspak fir Land a Leit

An der Tribune Libre um Radio schwätzt eise Generalsekretär Claude Lamberty dës Woch iwwert den historesche Solidaritéitspak vun 830 Milliounen Euro, op deen d’Tripartite sech gëeenegt huet, fir d’Leit an d’Betriber duerch déi aktuell Kris ze bréngen.

weiderliesen...

Zesumme géint Russland stoen

A senger Tribune libre um Radio schwätzt eisen Deputéierte Gusty Graas iwwert déi russesch Attacke géint d’Ukrain an iwwert d’Mesuren, déi de fräiheetlech gesënnte Länner géint de Regime vum Wladimir Putin zur Verfügung stinn.

weiderliesen...
Yuriko Backes

Yuriko Backes – déi nei Finanzministesch

Als Finanzministesch ass et eng natierlech Prioritéit, dofir ze suergen, datt ons Staatsfinanze weider gesond bleiwen. Da kënne mir nämlech onst Land gezielt op d’Zukunft virbereeden, an zwar andeems mir an déi nohalteg an an déi digital Entwécklung investéieren.

weiderliesen...

Klimabiergerrot

Am Kader vu senger Ried zur Lag vun der Natioun huet de Premier Xavier Bettel d’Iddi vun engem Klimabiergerrot lancéiert. Enn Januar ass et du lassgaang: An der éischter vu ronn 15 Reunioune sinn d’Membere fir d’éischt  iwwert den aktuelle Stand der Dinge a Saache Klimapolitik informéiert ginn.

weiderliesen...