« Fir déi héich Nofro un doucer Mobilitéit z’ënnerstëtzen, déi duerch d’Pandemie opkomm ass, gouf d’lescht Joer wärend de Summerméint de sougenannte « Vëlosummer » organiséiert, deen och e grousse Succès hat, quitt dass schlussendlech manner Gemenge matgemaach hunn, wéi geplangt.
An deem Kader wollt ech dem Här Minister fir Mobilitéit an ëffentlech Aarbechten an dem Här Minister fir Tourismus folgend Froe stellen:
– Ass virgesinn d’Initiativ « Vëlosummer » dëst Joer ze widderhuelen ?
– Sinn d’Ministere schonn a Gespréicher mat de Gemengen am Land fir dëst Joer nach méi eng flott Offer de Vëlosfuerer kënnen ze presentéieren ?
– Kënnen d’Häre Ministeren eventuell schonn éischt Detailer vum Vëlosummer 2021 nennen ? Wann net, fir wéini kéint de Projet dem Public virgestallt ginn ? »
