Anne Daems

Fir eng Zukunft, an där mir eis all erëmfannen

An déck véier Méint si Gemengewalen – den 11. Juni ass deemno den Optakt vum sougenannte Superwaljoer, an deem den 8. Oktober och Chamberwale sinn.

D’Bezeechnung Superwaljoer ass also net iwwerdriwwen, well et geet ëm déi politesch Zukunft vun eise Gemengen a vum Land – also ëm d’Zukunft vun eis alleguerte bannent den nächste fënnef, respektiv 6 Joer. Dat ass net näischt: besonnesch an dëse Krisenzäiten, vun deene mer net wëssen, wéini se eriwwer sinn. 

An esou Zäite brauch d’Land engagéiert Politiker, op déi d’Mënschen sech kënne verloossen. D’Leit vun der DP mat all hire Kandidaten si prett fir déi Verantwortung z’iwwerhuelen.

Mir hunn dat déi lescht Joren an der Regierung, an der Chamber an a ville Gemengen uechter d’Land och scho bewisen. Mir hu bewisen, datt mir d’Erwaardungen an d’Uleies vun iech seriö huelen an dorobber aginn.

D’DP huet bewisen, datt si d’Land pragmatesch duerch Krisenzäite bréngt, an dass de Bierger bei all den Decisiounen un éischter Plaz steet.

D’DP ass a war ëmmer no bei de Leit.

No bei de Leit, dat heescht fir eis d’Zesummeliewen an de Gemenge fërderen. Dat heescht dofir suergen, datt jiddereen, dee wëll, sech bei der Gestaltung vum Liewen a senger Gemeng abrénge kann. Dat heescht Plaze schafen, wou d’Mënsche sech begéinen, an déi fir jiddereen accessibel sinn. Dat heescht e liewegt Veräinsliewen… familljefrëndlech Gemengen… Gemengen, wou Kanner Kanner kënne sinn… flott Offere fir eis Senioren… eng Gemeng, wou d’Leit matenaner, amplaz niewentenee liewen… an eng Gemeng, an där kee vergiess gëtt.

No bei de Leit , dat heescht fir eis och, datt d’Gemengen nach méi attraktiv fir hir Awunner musse ginn. Dofir ënnerstëtze mir lokal a regional Geschäfter a gutt Handwierksbetriber, déi Aarbechtsplazen nobäi schafen. Dat bedeit nämlech kuerz Weeër op d’Schaff a méi Zäit fir Famill & Fräizäit. Och flexibel Aarbechtszäite bidde sech un, fir d’Zäit fir d’Famill an d’Fräizäit optimal ze notzen.   

No bei de Leit, dat heescht awer och, déi grouss Erausfuerderungen am Beräich vum Klima a vun der Energie weider unzepaken an déi Efforten ze verstäerken.

No bei de Leit, dat heescht d’Logementskris bekämpfen. De Staat an d’Gemenge mussen do – zesumme mam Privatsekter – nach méi Responsabilitéit iwwerhuelen, dat heescht ënnert anerem méi séier bauen.

An eng modern Verkéierspolitik heescht fir eis, datt jiddereen: d’Foussgänger, d’Vëlosfuerer, déi Leit, déi den ëffentlechen Transport huelen an d’Automobilisten, gutt, sécher a séier weiderkommen.

D’DP steet fir eng Politik, déi no bei de Leit ass an déi no de Leit kuckt. D’DP Politik ass no bei iech, no bei ärer Famill, d’DP steet mat iech am Liewen a gestalt d’Zukunft esou, datt mer eis all erëmfannen a wuelfillen.

Deelen:

Facebook
Twitter
LinkedIn
Email
WhatsApp

Weider News

Eis Kandidate fir Europa

D’Demokratesch Partei geet mat enger kompetenter, diverser an héichmotivéierter Lëscht an d’Europawale vum 9. Juni 2024. De Charles Goerens an d’Amela Skenderović féieren d’Lëscht als Spëtzekandidaten un.

weiderliesen...