Gesondheet a Rettungswiesen

Gesondheet a Rettungswiesen

Gesondheet: e séieren Accès zu enger qualitativ héichwäerteger Medezin

An der Gesondheetspolitik leet d’DP de Fokus op e séieren Accès vun de Patienten zu enger qualitativ héichwäerteger Medezin. Gläichzäiteg huet fir d’DP déi laangfristeg Ofsécherung vum Gesondheets- a Rentesystem déi héchste Prioritéit.

An der aktueller Legislatur huet d’DP sech fir däitlech Verbesserungen am Gesondheetssystem agesat. Am Kader vum neie Spidolsplang huet d’DP beispillsweis fir eng regional flächendeckend Versuergung an eise Spideeler gesuergt. D’Offer u basismedezineschen Déngschter ass ausgebaut ginn. Doriwwer eraus hu mir eis fir e méi staarkt Matsproocherecht vun den Dokteren a vun der Personaldelegatioun an de Verwaltungsréit vun de Kliniken agesat. Opgrond vun héijen Iwwerschëss an der Gesondheetskeess konnten doriwwer eraus d’Leeschtungen am Beräich vun der Zännmedezin ausgebaut ginn.

D’Leeschtunge vum Lëtzebuerger Gesondheetssystem zielen zu den avantagéiste weltwäit a kënnen sech international weise loossen. D’DP gëtt sech domadder awer net zefridden a wäert de Gesondheetssystem weider verbesseren. Besonnesch bei der Effikassitéit an der Transparenz ass am Gesondheetswiesen nach vill Loft no uewen. E Mangel un Datë bei de Qualitéitsstandarden, mëttelméisseg Qualitéitsdaten an en onverhältnesméisseg héijen administrativen Opwand maachen de Wee hin zu neien, innovativen an besoinsorientéierte Betreiungskonzepter an der Medezin an an der Fleeg méi schwéier. D’DP wäert sech dofir staarkmaachen, datt voll besate Waardezëmmer an der Urgence a méintelaang Waardezäite fir en IRM oder e CT-Scan net méi virkommen.

Opgrond vun der demographescher Entwécklung an enger Liewenserwaardung, déi ëmmer méi an d’Luucht geet, waarden déi nächst Joren nei Erausfuerderungen op d’Gesondheetswiesen. De Gesondheetssystem wäert an Zukunft mat Sécherheet méi staark an Usproch geholl ginn an deemno och méi deier ginn. Fir eng flächendeckend, éischtklasseg Patienteversuergung unzebidden, wäerte mir an Zukunft méi geziilt a méi effikass an eise Gesondheetssystem investéieren. D’DP wäert dofir besonnesch op d’Méiglechkeete vun der Digitaliséierung zeréckgräifen. Ganz nom Motto: „Virsuerg ass déi beschte Medezin“ , wäerte mir däitlech Moyenen an d’Gesondheetspreventioun an an -fërderung investéieren.

Digital Gesondheetskaart aféieren

D’DP schwätzt sech fir d’Aféiere vun enger digitaler Gesondheetskaart aus. Dës wäert an Zukunft net nëmme wichteg Informatioune fir de Patient späicheren, mee och e vereinfachte Bezuelsystem fir Dokteschrechnunge mat sech bréngen. Doriwwer eraus wäert et zu méi Transparenz an der Medikatioun vu Patiente kommen, duerch d’Méiglechkeet fir elektronesch Rezepter auszestellen. Dëst dréit dozou bäi, datt geféierlech Wiesselwierkungen an Medikamentemëssbrauch kënne besser verhënnert ginn.

Präventioun a Fréierkennung fërderen

D’DP well déi medezinesch Preventioun an d’Fréierkennung vu Krankheeten am Kader vun enger nationaler Gesamtstrategie fërderen. Engersäits wëlle mir duerch Sensibiliséierungscampagnen e gesondheetsbewosst Liewen a Schaffe fërderen, an anerersäits awer och d’Fréidiagnostik a -behandlung. Mir leeën an dësem Zesummenhang och vill Wäert op schoulmedezinesch Déngschter, déi gesondheetlech a psychesch Problemer bei Kanner duerch Virënnersichunge beim Kannerdokter fréizäiteg erkenne sollen.

Lëtzebuergesch-Coursen am Gesondheetswiese fërderen an ausbauen

Grad bei engem Openthalt an der Klinik, deen de Patient jo scho genuch belaascht, ass et fir verschidde Leit schwiereg, sech an enger friemer Sprooch auszedrécken. Besonnesch déi vill medezinesch Begrëffer kënnen zu Verstännegungsproblemer tëschent Patient a Fleegepersonal féieren. D’DP wäert dofir d’Offer u Lëtzebuergesch-Coursen am Gesondheetswiese virundreiwen, fir d’Kommunikatioun tëschent Patient a Personal ze verbesseren. Doriwwer eraus soll eng Persoun, déi Lëtzebuergesch schwätzt zur Verfügung stoen, fir eventuell Verstännegungsproblemer iwwerwannen ze kënnen. Mir wäerten och dee vum DP-geféierte Kulturministère zesummegestallten Online-Dictionnaire fir medezinesch Begrëffer „med.lod.lu“ weider fërderen.

Waardezäit fir IRM-Ënnersichung verkierzen

Eng Waardezäit vu 4 bis 6 Méint fir eng IRM-Ënnersichung ass keng Seelenheet zu Lëtzebuerg. Patiente loossen sech esouguer stationär behandelen oder ginn a Kliniken an der Grenzregioun, fir méi séier un e Rendezvous ze kommen. Déi DP-geféiert Regierung huet kierzlech dem Kaf vu 4 neien IRM-Apparaten zougestëmmt. Dës nei Apparater sollen den neisten techneschen Normen entspriechen a villsäiteg asetzbar sinn. Mir wäerten doriwwer eraus préiwen, a wéi wäit méi laang deeglech Betribszäiten d’Waardezäiten an de Klinike kënnen zousätzlech erofsetzen.

Telemedezin ausbauen

D’Telemedezin wäert an Zukunft eng wichteg Roll am gesondheetleche Versuergungssystem spillen. D’Iwwerdroung vu medezinesche Biller fir eng Ferndiagnostik (Telepathologie) ze maachen, Home-Monitoring vu Patienten, Tele-Formatioun: d’Méiglechkeete vun der Telemedezin si villfälteg. Mir wëllen eng flächendeckend Applicatioun vun dëser Technologie an domadder eng besser, méi effikass a méi flexibel Versuergung vun de Patiente garantéieren.

Medezinesch Versuergung am ländleche Raum stäerken

D’DP wäert dofir suergen, datt d’Opmaache vun enger eegener Praxis fir Hausdokteren a Spezialiste méi attraktiv gëtt. Besonnesch am ländleche Raum sinn Dokteschcabineten d’Basis fir eng flächendeckend, no an héichwäerteg ambulant Versuergung. Och duerch déi demographesch Entwécklung an de méi groussen Undeel un eelere Patiente gëtt eng gutt Offer an deem Beräich gebraucht. Mir wäerten dofir de Fonctionnement an déi geographesch Lag vun de Maisons médicales op hiren Notzen iwwerpréiwen an deemno wéi upassen. Doriwwer eraus wëlle mir d’Grënnung vu Gemeinschaftspraxissen duerch finanziell Ureizer méi staark fërderen. Dës wäerten duerch flexibel Ëffnungszäiten eng besser Versuergung vum Patient sécherstellen.

Gesondheetsversuergung doheem fërderen

Doheem fillt een sech am Beschten. Dëst trefft och bei der Gesondheetsvirsuerg zou. Ëmmer méi Mënschen am héijen Alter, mat chronesche Krankheeten oder permanente Behënnerungen, wëllen doheem wunne bleiwen. Mir wäerten d’Gesondheetsvirsuerg an deem Sënn upassen an en Out-of-hospital-Aktiounsplang ausschaffen, fir et dem Patient méiglech ze maachen a bekannter Ëmgéigend wunnen ze bleiwen an nawell eng Opsiicht duerch en Dokter a Fleeger ze hunn.

Remboursement am Fall vu Liewensmëttelallergien iwwerpréiwen

Glutefräi, laktosefräi, fructoseaarem – An de Supermarché ze goen ass fir vill Allergiker net ëmmer einfach. Hire Kierper reagéiert op bestëmmte Liewensmëttel iwwerempfindlech, wat am schlëmmste Fall liewesgeféierlech ka ginn. Well vill traditionell Liewensmëttel duerch speziell Produiten ersat gi mussen, mussen net nëmmen d’Liewensmëttel bewosst erausgesicht ginn, mee et féiert och zu substantielle Méikäschten. D’DP wäert préiwen a wéi wäit, de Remboursement vun dëse Méikäschten duerch d’Gesondheetskeess de Besoine vun den Allergiker entsprécht an wäert dës Montanten deemno wéi eropsetzen. Doriwwer eraus wäert d’DP déi administrativ Prozedur fir e Remboursement préiwen an eventuell vereinfachen.

Kloerheet bei de Patienteverfügungen a bei den Organspende schafen

De Mënsch huet d’Recht op selbstbestëmmten Entscheedungen, zu deenen och d’Decisioun iwwer dat eegent Liewensenn gehéiert. De Wëlle vum Patient huet an dëse Fäll iewescht Prioritéit. Eventuell Verfügungen oder den Accord fir eng Organspend sollen onbedéngt op déi perséinlech digital Gesondheetskaart gespäichert ginn. Dëst féiert zu méi Kloerheet am Fall vum Doud vun engem Patient a stellt d’Famill an dëser traureger Situatioun net och nach virun eng schwiereg Decisioun. D’DP steet zum Prinzip, datt all Bierger e potenziellen Organspender ass, et sief dann, en hätt sech zu Liefzäite schrëftlech anescht manifestéiert. Doriwwer eraus wäerte mir mat cibléierten Informatiounscampagnë versichen méiglech Viruerteeler an der Bevëlkerung géintiwwer vun Organspenden opzeklären.

Entschiedegungsfong fir „aléa thérapeutique“ aféieren

D’DP wäert direkt en ëffentleche Fong fir Entschiedegungen am Fall vun Tëschefäll schafen, bei deene kee Feelverhale vun de Gesondheetsdéngschtleeschter virläit („aléa thérapeutique“). D’Rechter vun de Patiente ginn domadder gestäerkt. De Fong soll Patienten entschiedegen, bei deene wärend der Behandlung en Accident geschitt ass, deen e Geriicht net op en zivilrechtleche Feeler zeréckféiert.

Ausbau vun de Medezinsstudien hei am Land bewäerten

D’Ausbildung vun de Medezinsstudien zu Lëtzebuerg gëtt ausgebaut. D’Uni Lëtzebuerg wäert an den nächste Joren e Bachelor an der Medezin ubidden, esou datt d’Studenten dräi Joer studéiere kënnen, amplaz bis elo just ee Joer.

Ausbildung a Beruff vum Krankefleegpersonal opwäerten

Opgrond vun enger Liewenserwaardung, déi klëmmt wäert d’Zuel vun eeleren a fleegebedierftege Mënschen an de nächste Joren däitlech eropgoen. Fir engem zukünftege Mangel u qualifizéiertem Fleegepersonal entgéintzewierken, wäert d’DP de Beruffsstand opwäerten an d’Ausbildung fir zukünfteg Krankefleeger méi attraktiv gestalten. Mir wäerte Bachelor- a Masterstudie fërderen an d’Kompetenze vun de Fleegefachleit deementspriechend erweideren.

Dokteren a Fleegepersonal weiderbilden

Weiderbildung ass en integrale Bestanddeel vun dem Doktesch- a Fleegeberuff an eng wichteg Sail vun der Qualitéitssécherung. D’DP schwätzt sech fir eng obligatoresch a kontinuéierlech Weiderbildung vun den Dokteren an dem Fleegepersonal aus. Déi genee Konditioune musse mat de betraffene Beruffsstänn verhandelt ginn.

Zäitopwand fir administrativ Tâchë reduzéieren

An de Fleegeberuffer muss de Mënsch am Mëttelpunkt stoen an net d’Bürokratie. D’DP wäert den Opwand fir d’Administratioun an d’Dokumentéieren an de Fleegeberuffer reduzéieren, esouwuel bei der stationärer ewéi och bei der ambulanter Versuergung. Domadder wäert d’Fleegepersonal erëm méi Zäit fir d’Patienten hunn. Eng Léisung bitt hei eng konsequent Notzung vun digitalen Hëllefsmëttelen.

„Programme de recherche en nursing“ (PRN) ofschafen

D’DP wäert de „Programme de recherche en nursing“ ofschafen. Duerch déi permanent Berechnung vun de Personalkäschten an deem domadder verbonnenen administrativen Opwand, bleift de Krankefleeger ëmmer manner Zäit fir de mënschleche Kontakt mam Patient. Doriwwer eraus sinn d’Spideeler haut schonn a punkto Fleegepersonal chronesch ënnerbesat. Wéinst der demographescher Entwécklung an enger Liewenserwaardung, déi klëmmt wäert sech d’Situatioun an den nächste Jore verschlëmmeren. Fir weiderhin eng beschtméiglechst Patienteversuergung ze garantéieren, brauche mir all eenzele Krankefleeger do, wou en am meeschte gebraucht gëtt: an der Statioun beim Patient.

Konzept vum Referenzdokter bewäerten

De Referenzdokter soll de Patient am Beschte kennen a bei gesondheetleche Problemer den éischten Uspriechpartner sinn. De Modell vum Referenzdokter huet sech allerdéngs knapp 6 Joer no senger Aféierung net duerchsetze kënnen. Esouwuel d’Unzuel vun de Versécherten ewéi och d’Dokteren, déi dorunner deelhuelen ass éischter enttäuschend. D’DP wäert de Konzept dofir bilanzéieren, op säin Notzen hin iwwerpréiwen an deemno wéi upassen.

Budgetiséierung no Qualitéit amplaz no Quantitéit

D’DP wäert eng leeschtungsofhängeg Budgetiséierung vun de Kliniken no kloren, transparente Qualitéitskritären aféieren. Amplaz de Kliniken e globale Budget ze ginn, wäerte mir de Budget no der prestéierter Leeschtung an no klore Kritäre berechnen. Dëst erlaabt et an alle Kliniken eng käschteneffizient medezinesch Qualitéit sécherzestellen.

Depensen, déi dëse Kritären net entspriechen, sollen an Zukunft net méi vun der Gesondheetskeess iwwerholl ginn.

Zentralen Informatiks- an Informatiounssystem aféieren

Den Ament gëtt et zu Lëtzebuerg keen eenheetleche System, deen d’Daten am Gesondheetswiese verschafft. Kliniken, Dokteschcabineten, Apdikten an Laboratoirë si weder ënnereneen, nach mat der Gesondheetskeess vernetzt. Dat ass weder käschteneffizient, nach transparent a kann, am schlëmmste Fall, esouguer Mënscheliewe kaschten. D’P wäert dofir suergen, datt dat medezinescht Personal landeswäit iwwer en eenheetlechen Informatiounssystem verfüügt, op deem all déi relevant Daten an Diagnose vum Patient drop sinn. D’Käschten- an d’Zäiteffizienz gëtt verbessert. Dëst huet de Virdeel, datt net nëmmen Abusen agegrenzt ginn, mee och versuergungswëssenschaftlech Daten effizient opgeschafft kënne ginn. Dateschutz an Datesécherheet hunn hei déi héchste Prioritéit a ginn duerch gesetzlech an technesch Mesurë séchergestallt.

Qualitéits- a Käschteneffizienz vun de Spideeler duerch Synergië fërderen

Spideeler gehéieren ouni Zweiwel zu de wichtegste Piliere vun eisem Gesondheetswiesen. Bei der aktueller Entwécklung vun de Spidolskäschte mussen awer nei Weeër fonnt ginn, fir d’Finanzéierung ze garantéieren an domadder kënne mat enger héichwäerteger Versuergung vun de Patiente virunzefueren. Fir eng besser Qualitéits- a Käschteneffizienz ze erreechen, wäert d’DP bestëmmte Servicer vun de Spideeler zentral organiséieren an eventuell zesummeleeën. Dozou gehéieren op alle Fall déi ganz Informatik, d’Hygiens- a Sterilisatiounsservicer, d’Qualitéitskontroll, d’Aus- a Weiderbildung an d’Laboratoiren. Et soll och zu enger Standardiséierung vun all de medezinesche Prozedure kommen, déi sech soll no international unerkannte Kritäre riichten.

Spezialisatioun puschen

Net all Spidol kann all méiglech Operatiounen an Therapien ubidden. D’DP wëll dofir d’Spezialisatioun an de Spideeler ënnerstëtzen. Dofir wäerte mir d’Schafe vu Kompetenzreseauen tëschent de Spideeler respektiv Expertenequipe fërderen. Dozou gehéiert och d’Iddi vun engem nationalen Onkologiezenter an d’Behandlung an d’Betreiung vu rare Krankheeten.

Doriwwer eraus wäerte mir d’Patientebetreiung bei Reha-, Erhuelung- oder soss Kure verbesseren, déi vum Dokter verschriwwe ginn. Domadder kann d’Durée vum Patient am Spidol verkierzt ginn.

All de spezialiséierten Dokteren den Zougang zu den nationale Kompetenzzenteren erméiglechen

D’DP wäert all de Spezialisten Accès zur Infrastruktur vun den nationale Kompetenzzentere bidden. Doduercher kënnen déi medezinesch Apparater besser ausgelaascht ginn an d’Patienten uechter d’ganz Land kënne besser versuergt ginn.

D’Sitë vun de regionalen Urgencen ofsécheren an ausbauen

A liewesgeféierleche Situatioune sollen d’Patienten net musse wäit fuere mussen. D’DP wäert d’Site vun de regionalen Urgencen an de Spideeler zu Wolz an zu Nidderkuer, an och an der Zitha an der Stad, laangfristeg garantéieren. D’DP wäert esouguer dofir suergen, datt am Oste vum Land en neit Urgence-Spidol dobäi kënnt. Esou e Schrëtt wäert déi gréisser Spideeler entlaaschten a gläichzäiteg d’Noutversuergung vun de Leit an de Stied an uechter d’Land verbesseren.

D’Geriatrie verstäerken

Fir datt aus der héijer Altersmoyenne zu Lëtzebuerg och e Plus u gudden an aktive Joren am Alter gëtt, kënnt et fir d’DP drop un, gesond ze bleiwen oder am Krankheetsfall erëm séier op d’Been ze kommen. D’DP setzt hei op eng Stäerkung vun den altersspezifeschen Diagnosen an Traitementer. Mir wëllen och méi spezialiséiert Infirmiere fir d’Geriatrie forméieren.

Mënsche mat e puer Krankheete gläichzäiteg, besser ophuelen a versuergen

D’DP wäert dofir suergen, datt d’Strukturen an d’Infrastrukturen an de Spideeler de Besoine vun de Leit mat e puer Krankheete besser ugepasst gëtt. Demenzkrank Leit, déi sech d’Hëft briechen, brauchen z.B. net nëmmen eng Behandlung vum deem Broch, ma och eng spezifesch Behandlung op Demenz. D’DP wäert dofir systematesch multidisziplinär Equipen an den Urgencen asetzen. Mir wëllen adaptéiert Strukturen an Ofleef an de Spideeler fërderen, z.B. eng séier Prise en charge mat weidere „Rooming-in“-Méiglechkeete fir d’Famill oder Frënn. Am Kader vun enger Reform vun der Tutelle wëlle mir de betraffene Patienten en onbürokrateschen a séieren Accès zu all de noutwennege Behandlunge garantéieren.

Privatioun vun der Fräiheet bei demenzkranke Leit ganz streng reegelen

Esou Mesure bei der Betreiung an der Behandlung vun demenzkranke Patiente si ganz sensibel. D’Dokteren, d’Famill an d’Fleegepersonal stinn dobäi ëmmer erëm virun etheschen a juristeschen Dilemmaen tëscht de Rechter an der Protektioun vun deene Leit (z.B. Gitter fir d’Bett bei engem héije Risiko, datt de Patient aus dem Bett fält). D’DP wëll an dësem Beräich fir Rechtssécherheet suergen a fir kloer Linnen am Interessi vun alle Bedeelegten.

Schmerzklinik („Clinique de la douleur“) schafen

D’DP wäert ganz staark an der Lutte géint chronesch Péng aktiv ginn. Déi aktuell Programmer géint d’Péng musse séier ugepasst an duerno ëmgesat ginn. Mir wäerten eng Schmerzklinik („Clinique de la douleur“) opmaachen, wou d’Patienten eng fachgerecht a multi-disciplinaire Therapie géint d’Péng kënne kréien.

Cannabis fir medezinesch Zwecker notzen

De Cannabis an der Medezin huet eng Joerdausenden al Traditioun. D’Regierung huet viru kuerzem decidéiert, fir de Cannabis – ënner bestëmmte Konditiounen – an der Therapie géint d’Péng z’erlaben. An enger éischter Phase sollen d’Cannabis-Präparater fir Patiente mat chroneschen Erkrankunge mat vill Péng reservéiert sinn, bei deene soss Mëttel net wierken. D’DP wäert déi zwee Joer laang Testphas ofwaarden, fir méi iwwert d’Méiglechkeeten an d’Wierkunge vum „medezinesche Cannabis“ gewuer ze ginn. Grondsätzlech sti mir positiv zum Ausbau vun de Méiglechkeete vum medezinesche Cannabis.

Doriwwer eraus schwätzt d’DP sech och fir d’Méiglechkeet vun enger allgemenger, staatlech kontrolléierter Ausgab vu Cannabis un Erwuessener aus. Et muss awer drop ugepasst ginn, datt doduercher d’Consommatioun vun Drogen, och vun Alkohol, net verharmloost gëtt.

Palliativ Strukture fir Kanner

Fir de leschte Wee am Liewe vu schwéierkranke Kanner esou léif wéi méiglech ze halen, wëll d’DP kucken, ob et méiglech ass, fir déi palliativ Strukturen un d’Besoine vun de Kanner unzepassen. Mir wëllen och Aus- a Weiderbildungen an deem Beräich ënnerstëtzen.

Transparent Kontrollkritären a kloer Qualitéitsnormen aféieren

Mir wäerten eng onofhängeg, extern Préifinstanz domadder beoptragen, fir déi medezinesch Qualitéit vun all de Servicer ze kontrolléieren. Dës Mesure soll d’Qualitéit an d’Transparenz vun der Fleeg verbesseren an eventuell Mängel opdecken.

 

D’CNS an de Gesondheetsministère solle Programmer fir systematesch Qualitéitskontrollen aféieren an déi Resultater och publizéieren. Dat gëllt och fir Statistiken iwwer d’Zuel vun de Behandlungen an all Spidol.

D’Effikassitéit vun der Gesondheetskeess verbesseren

D’DP wëll d’Verwaltung vun der Gesondheetskeess grondleeënd reforméieren an en Audit iwwert de Fonctionnement vun der CNS maache loossen. Mir wëllen d’Effikassitéit vun der CNS verbesseren. An deem Beräich ka vill duerch d’Digitaliséierung verbessert ginn. Eng éierlech, pointéiert a wierksam Kontroll vum „Contrôle médical“ vun der Sozialkeess a vun der CNS wäert d’Qualitéit vun de Servicer verbesseren, fir substantiell Aspuerunge suergen an eventuell Mëssbräich reduzéieren.

D’Nomenclature grondleeënd iwwerschaffen

Déi schwéierfälleg Prozedure musse séier vereinfacht ginn. En vue vun der haiteger Entwécklung vun der Medezin wëll d’DP d’Nomenclature vun de medezineschen a vun den zänn-medezinesche Behandlunge grondsätzlech iwwerschaffen an duerno méi dacks upassen. Mir wäerten och d’Anticumulregele vun Traitementer iwwerpréiwen an eventuell entschäerfen. Doriwwer eraus wëll d’DP, datt d’basis-medezinesch Aktivitéiten, d’Garden an den Nuetsdéngscht besser bezuelt ginn. Als Géigeleeschtung an an Zesummenaarbecht mat de betraffenen Interessegruppen, wëlle mir de Supplement fir d’„1-Klass“ ofschafen.

Upassung vun der Fleegeversécherung am Sënn vun de Patienten

D’DP wäert sécherstellen, datt d’Fleegeversécherung eng héich Qualitéit vun der Fleeg garantéiert. Duerch Begleedmesurë soll déi sozial Exklusioun verhënnert ginn. Weider sollen onnéideg administrativ Prozedure fir d’Patienten a fir d’Trägergesellschafte verhënnert ginn. D’DP wëll dofir e Bilan iwwert d’Reform vun der Fleegeversécherung zéien an hir Auswierkungen an der Praxis iwwerpréiwen. Dono wëll d’DP konkret Upassungen am Sënn vun de Patiente maachen.

Liberal Infirmieren ënnerstëtzen

D’DP wëll de fräiberufflechen Infirmieren d’Méiglechkeet ginn, fir hir Servicer méi an der Betreiung vun de Leit doheem unzebidden, andeems déi fleegebedierfteg Patienten net automatesch mussen eng Krankefleeg iwwert e Reseau an Usproch huelen.

Den „Tiers payant“ iwwerdenken a méi flexibel halen

D’DP ass dovunner iwwerzeegt, datt de System vum „Tiers payant“ muss ganz neutral op de Leescht geholl ginn. D’geet dobäi besonnesch drëms, fir d’Käschte vun de Patienten ze reduzéieren an d’Prozedur fir de Remboursement duerch d’CNS méi einfach a méi séier ze maachen. Déi genee Modalitéite musse mat all den Acteuren, also den Dokteren, der Gesondheetskeess an der Patientevertriedung verhandelt ginn.

D’Collaboratioun tëschent de Recherchezenteren am Santésberäich fërderen

D’DP wäert d’Zesummenaarbecht vun den ënnerschiddleche Fuerschungsinstituter (Luxembourg Institute of Health (LIH), Luxembourg Centre for Systems Biomedicine (LCSB), Integrated Biobank of Luxembourg (IBBL)) a vun der Uni Lëtzebuerg ënnerstëtzen. Domadder kënnen déi ëffentlech Gelder méi effikass genotzt ginn. Ma virun allem erhéicht dat d’Qualitéit an den Echange vu wëssenschaftleche Resultater.

Kaderbedéngunge fir déi bioethesch Recherche schafen

D’DP wäert e Kadergesetz ausschaffen, fir eng progressiv, bioethesch Fuerschung ze reglementéieren. Mir brauchen eng passend Legislatioun fir déi medezinesch-technesch Bedingunge vun der Fuerschung, d’Qualifikatioun vun de Medeziner, d’Rechtslag am Kontext mat de Fortplanzungszellen an den Embryodaten an d’Notzung vun den Embryoen, déi ze vill sinn, zu wëssenschaftlechen Zwecker.

Rettungswiesen

D’Reform vum Rettungswiesen an der Praxis begleeden an de Benevolat fërderen

Wärend dëser Legislaturperiode gouf déi dringend néideg Reform vum Lëtzebuerger Rettungswiesen endlech ëmgesat. Wichteg Punkten an der Reform sinn déi nei Organisatioun vun de Servicer, eng besser Ënnerstëtzung vum Benevolat an d’Schafe vun den neien Infrastrukturen um Rond-Point Gluck. D’DP wäert dofir suergen, datt déi déifgräifend Reform optimal um Terrain ëmgesat gëtt. Fir d’DP gehéieren wsouwuel déi Professionell wéi och déi Fräiwëlleg zum Häerz vun eise Rettungsdéngschter. Dofir wäert d’DP och wieder hiren Asaz belounen a stäerken.

De SAMU muss op de Leescht geholl ginn

Den neie CGDIS („Corps grand-ducal d’incendie et de secours“) huet de SAMU un d’Administratioun vun de Rettungsdéngschter ugegliddert. Et bleift nach ëmmer bei 3 SAMUe fir d’ganz Land. Dat ass e potentielle Risiko, besonnesch fir Leit, déi nuets an iwwer Land eng Urgence hunn. Mir wëllen dofir d’SAMU-Unitéiten net nëmmen an de Spideeler mat den Urgence loossen, ma och kucken, awéiwäit zousätzlech SAMUen am Zentrum an iwwer Land géinge Sënn maachen.