Et gëtt wéineg Evenementer, déi esou vill Leit begeeschteren ewéi eng Futtball-Europameeschterschaft. Eng Zäit an där de ronne Ball –an net d’Politik – dominéiert.
An nawell huet e Gesetz an Ungarn et elo fäerdeg bruecht, datt d’Gesellschaftspolitik de Sport an den Hannergronn gedréckt huet. Et goung neméi em de Video-Bewäis oder d’3er-Ketten, ma em eng déi symbolesch Reebou-Beliichtung vun der Münchener Allianz-Arena. Schlussendlech huet sech d’UEFA duerchgesat, déi soss de RESPEKT an den Anti-Rassismus fett op hire Fändel setzt.
Em wat geet et hei? Et geet em en ungarescht Gesetz, dat déi positiv Duerstellung vun Homosexualitéit, Transsexualitéit a vu Geschlechtsëmwandlung fir Kanner a Jungendlecher verbitt. An Ungarn passt deemno just Heterosexualitéit an d’Norm, ähnlech ewéi a Russland. Iwwer alles anescht dierfe jonk Leit net opgekläert ginn… dierf an der Schoul net mat hinnen doriwwer geschwat ginn
Lëtzebuerg an d’Majoritéit vun den EU-Memberen hunn Ungarn awer kloer ze verstoe ginn, wat si vun där Approche halen. Eis Regierung, d’Belsch an Holland hunn e Schreiwes initiéiert, mat deem si sech kloer géint d’Diskriminéierung vun der LGBTI-Communautéit gestäipt hunn an d’Anhale vun de fundamentale Wäerter an Europa verlaangen. De Gros vun den EU-Staaten huet sech domadder solidaresch erkläert.
Déi Reaktioun weist, datt Grondrechter a Rechtsstaatlechkeet fir d’Unioun net verhandelbar sinn.
An de leschte Joren huet sech villes zum Positiven entwéckelt, wat d’Rechter vun homo- an transsexuelle Mënsche betrëfft. An awer ginn et och zu Lëtzebuerg Kräften, deenen dat en Dar am A ass.
Fir d’DP ass et zanter jeehier kloer, datt kee Mënsch dierf wéinst senger sexueller Orientatioun diskriminéiert ginn. Eis liberal DNA ass do méi wéi eendeiteg… heiheem an an Europa.
