Prisong Mauer Iwwerwaachung

Wéi geschützt sinn d’Giischtercher am Prisong virun Attacken?

D’Situatioun vun de Giischtercher am Prisong ass keng einfach. Verbal Attacken gehéieren zu hirem Alldag, an och kierperlech Attacken a seriö Menacen kommen ëmmer méi heefeg vir. Wéi gëtt d’Personal bannent de Prisongsmauere geschützt? Wéi vill Attacke gouf et an de leschte Joren? A wéi kënnen sech d’Giischtercher och viru Menace wieren ? Eis Deputéiert Claude Lamberty a Max Hahn hu bei den zoustännege Ministeren nogefrot.

« De Mëttwoch den Owend koum et am Prisong zu Schraasseg zu enger brutaler Attack vu Prisonéier op 6 Giischtercher. Et wieren och Morddreeungen géint d’Gardienen an och géint d’Personal aus dem Prisong ausgeschwat ginn. Gewalt a verbal Attacken stinn an engem Prisong oft un der Dagesuerdnung. Allgemeng géif een säitens vum Personal awer mierken, dass iwwert déi leschte Wochen a Méint souwuel déi kierperlech wéi och déi verbal Attacken a Menacen enorm zouhuelen. 

Déi héich Prisongspopulatioun war iwwer déi lescht Joer ëmmer erëm e Sujet. Zudeem versteet sech, dass do wou vill Prisonéier openeen kommen, d’Konfliktpotential erhéicht ass, an d’Belaaschtung op béide Säiten zouhëlt.

D‘Giischtercher‘ hätten och nëmme limitéiert Moyenen sech ze verdeedegen.  Beispillsweis wier d’Immobilisatioun vun engem Prisonéier an och den Ekipement fir sech am Noutfall oder bei enger Revolt ze schützen streng reglementéiert. Oft géif et och virkomme, dass Membere vum Personal net informéiert ginn, wa Menacen géint si oder Membere vun hirer Famill géifen ausgeschwat ginn.

An deem Kader wollte mir der Madamm Justizministesch an dem Här Minister fir bannenzeg Sécherheet folgend Froe stellen:

  • Wat war den Ausléiser vun den Attacken op d’Giischtercher am Prisong Schraasseg de Mëttwoch 29. Juni 2022?
  • Wéi vill Incidenten gouf et an de leschte 5 Joer an de Lëtzebuerger Prisongen déi d’Sécherheet vun de Prisonéier oder dem Personal gefäerdet hunn?
  • Gëtt d‘Prisongspersonal ëmmer iwwert Menace vis-à-vis vun hinnen oder Membere vun hirer Famill informéiert?
  • Falls nee, wisou net?
  • Wat gëtt de ‚Giischtercher‘am Fall vun enger seriöer Menace géint si oder géint Membere vun hirer Famill geroden ze ënnerhuelen?
  • Wat fir Moyenen stinn de ‚Giischtercher‘ zur Verfügung fir sech am Fall vun enger kierperlecher Attack ze wieren?
  • Wisou gëtt d’Immobilisatioun am Prisong anescht gehandhaabt wéi bei Interventiounen baussent dem Prisong?

Ginn Ënnerscheeder gemaach wéi männlech oder weiblech ‚Giischtecher‘ op gewalttäteg Situatiounen am Alldag virbereet ginn? »

Äntwert

– Wat war den Ausléiser vun den Attacken op d’Giischtercher am Prisong Schraasseg de Mëttwoch 29. Juni 2022?

E mannerjäregen Détenu  ass den 29. Juni 2022 op Schraasseg komm an hien huet d’Fouille corporelle duerch d’Beamten verweigert. Doropshin ass entscheed ginn d’Fouille am Détenu senger Zelle ze maachen. Den Détenu huet dunn eng Forschette aus Plastik an d’Fanger kritt an hien huet ugefaangen d’Beamten ze aggresséieren, mat Féiss ze rennen, mat de Fäischt ze schloen an ze bespäitzen.

– Wéi vill Incidenter gouf et an de leschte 5 Joer an de Lëtzebuerger Prisongen déi d’Sécherheet vun de Prisonéier oder dem Personal gefäerdet hunn ?

Hei ass d’Unzuel vun den Aggressiounen op e Member vum Personal iwwert déi lescht 5 Joer:

– 2018: 5 Aggressiounen op e Member vum Personal an 3 Tentativen ;

– 2019: 7 Aggressiounen op e Member vum Personal an 3 Tentativen ;

– 2020: 8 Aggressiounen op e Member vum Personal an 3 Tentativen ;

– 2021: 13 Aggressiounen op e Member vum Personal an 2 Tentativen ;

– 2022: 10 Aggressiounen op e Member vum Personal.

Hei ass d’Unzuel vun de Brenn an de leschte 5 Joer:

– 2018: 0

– 2019: 0

– 2020: 2

– 2021: 6

– 2022: 1

An d’Unzuel vun de Mouvements collectifs/Streiken:

– 2018: 5

– 2019: 2

– 2020: 1

– 2021: 0

– 2022: 0

Gëtt d’Prisongspersonal ëmmer iwwert Menace vis-à-vis vun hinnen oder Membere vun hirer Famill informéiert ?

Jo, d’Prisongspersonal gëtt iwwert all Menace vis-à-vis vun hinnen oder Membere vun hirer Famill informéiert.

Meeschtens ass de Beamten selwer dobäi wann e Gefaangenen Drohungen géingt hien oder – vill méi seelen – géingt seng Famill ausdréckt. An deene ganz rare Fäll wou de Beamten net präsent war, kritt hien eng Copie vum “Compte-Rendu d’Incident” pour information a kann dann déi Schrëtter aleeden déi hien an deem Fall fir néideg hält.

– Wat gëtt de Giischtercher am Fall vun enger seriöser Menace géint si oder géint Membere vun hirer Famill geroden ze ënnerhuelen ?

De Giischtercher gëtt an deem Fall geroden eng Plainte bei der Police ze maachen. Den Détenu gëtt op eng aner Abteilung geluecht, sou dass hien kee Kontakt méi mat deem Agent huet. Dann kann och all Agent en appui psychologique bei der Fonction publique froen.

– Wat fir Moyen stinn de Giischtercher zur Verfügung fir sech am Fall vun enger kierperlecher Attack ze wieren?

Am Fall wou am viraus gewosst ass, dass den Détenu aggressiv ass, intervenéiert de “groupe d’intervention Pénitentiaire” (GRIP), deen dat néidegt Equipement huet. Ausserdeem hunn d’Beamten op den Abteilungen Handschellen fir am Noutfall ze benotzen. Ab dem Hierscht, wann dat noutwenneg Material ukomm ass an di virgeschriwwen Formatiounen gemaach gi sinn, wäerten den Agenten zwee zousätzlech Moyen de Contrainte matériels zur Verfügung stoen fir sech géint Menacen vun Säiten vun den Détenu ze wieren.

– Wisou gëtt d’Immobilisatioun am Prisong anescht gehandhaabt wéi bei Interventiounen baussent dem Prisong ?

Bei den Immobilisatiounstechniken gëtt et keen Ënnerscheed ob se am Prisong oder ausserhalb vum Prisong ugewannt ginn.

– Ginn Ënnerscheeder gemaach wéi männlech oder weiblech Giischtercher op gewalttäteg Situatiounen am Alldag virbereet ginn ?

Nee, et ginn keng Ënnerscheeder gemaach wéi männlech oder weiblech Giischtercher op gewalttäteg Situatiounen am Alldag virbereet ginn.

Dir wëllt dës parlamentaresch Fro op Lëtzebuergesch iwwersat kréien?

Deelen:

Facebook
Twitter
LinkedIn
Email
WhatsApp

Weider parlamentaresch Froen

Gemeng Rammerech: Froen no der Restrukturéierung vum RGTR

Firwat hu verschidden Uertschaften vun der Gemeng Rammerech nom neie Fuerplang vum 17. Juli 2022 keng direkt Ubannung méi u Rammerech fir do d‘Korrespondenz op Woltz, Ettelbréck an an d’Stad ze garantéieren? A firwat fiert d‘Ligne 141 net méi duerch Holtz a Pärel. Eisen Deputéierten André Bauler huet sech zu deem Sujet beim Minister fir Mobilitéit an ëffentlech Aarbechten renseignéiert.

weiderliesen...

Café Zëmmeren

Aus Grënn ewéi engem Manktem un Hygiène a Sécherheet, hunn eng Rei Café Zëmmeren an der läscht missen zoumaachen. Wéi vill vun deem Typ vu Logement sinn am Kanton Norden verluer gaangen a mat wéi enge Moossnamen gëtt probéiert d’Situatioun ze verbesseren? Dës an nach aner Froen goufen vun eisem Députéierten André Bauler un den Här Logementsminister gestallt.

weiderliesen...

Keen Impfbus méi fir de Norden?

Een Impfbus, deen zu Ettelbréck ënnerwee war, huet spontan missen een Impfbus am Zentrum ersetzen. Dëst obwuel zu Ettelbréck Bierger fir hir Impfung an der Schlaang stoungen.
Den DP-Deputéierten André Bauler huet bei der Gesondheetsministesch nogefrot, wéi den Impfbusdéngscht am Land organiséiert ass, firwat den Impfbus vun Ettelbréck huet missen am Zentrum asprangen, an ob et zoutrëfft, datt an Zukunft d’Impfbusser net méi bis an de Bezierk Norde fueren.

weiderliesen...

Steigend Präisser an der Baubranche

Mat Bléck op déi steigend Energiepräisser am Hierscht a Wanter 2022/2023, wat fir Perspektiven an Erwaardunge ginn de Moment ronderëm d‘Baubranche entwéckelt? Eisen DP-Deputéierten André Bauler huet zu deem Sujet eng parlamentaresch Fro un den Här Wirtschaftsminister adresséiert.

weiderliesen...