Gilles Baum

Alldag vun de Bierger verbesseren: virun, wärend an no der Kris

Impfen hëlleft! D’Kombinatioun vun de Vaccinatiounen a vun de sanitäre Reegelen, hunn hir Wierkung gewisen. Och wann et an der Lescht erëm méi positiv Fäll ginn huet. Dat muss een eescht huelen an am Bléck behalen.

Lëtzebuerg ass bis elo gutt duerch d’Pandemie komm. Ouni den Engagement, d’Responsabilitéit an d’Solidaritéit vun de Leit hei am Land wier dat net méiglech gewiescht. Dofir musse mir alleguerten op deem ageschloene Wee virufueren.

D’DP begréisst besonnesch, datt d’Regierung an hir Majoritéit an der Lutte géint de Covid Efforte gemaach hunn, fir déi sozial Ongläichheeten ze bekämpfen – bei de Leit selwer an an de Betriber.

Dat kascht alles Suen, och wann de Finanzminister Pierre Gramegna mat enger responsabeler Budgetspolitik fir den néidege Sputt gesuergt huet. Mir konnte frou si mat gesonde Staatsfinanzen an dës Kris eragaangen ze sinn. Wéinst dem budgetäre Lach, dat d’Pandemie an eis Keese räisst, ass awer kloer, datt et onverantwortlech wier, fir elo eng ëmfaassend Steierreform ëmzesetzen. Eng Steierreform mat zousätzleche Scholden ze finanzéiere kënnt fir d’DP net a Fro. An engems soe mir, datt et net de richtegen Zäitpunkt fir Steiererhéijungen oder Baissen ass – also och net fir eng Corona-Steier.

Fir d’DP gëtt et awer och keen einfachen Zeréck an déi al Normalitéit. Wat gutt fonctionéiert huet, soll bäibehale ginn an do wou Nohuelbedarf besteet, wëlle mir nobesseren. Esou muss den Teletravail op fräiwëlleger Basis z.B. weider gefërdert ginn.

En anere Chantier sinn d‘Aarbechtszäiten, wou mir onbedéngt méi individuell Flexibilitéit brauchen, déi muss tëschent dem Salarié an dem Patron ausgehandelt ginn. Un der maximaler Aarbechtszäit an un de Supplemente fir Sonndeger a Feierdeeg gëtt dogéint net gefréckelt.

D’DP begréisst de Succès vum Homeoffice an der Kris. Dat heescht awer net, datt d’Leit musse permanent disponibel sinn: Stéchwuert Droit à la déconnexion. Déi digital Disponibilitéit muss däitlech Grenzen hunn, fir datt de psycheschen Drock doheem d’Leit net krank mécht.

Dat nämmlecht gëllt fir eng adequat sozial Ofsécherung vun de fräischaffende Leit wärend Krisenzäiten. Eng aner Fuerderung ass d’Nobesserung op 10 Deeg Pappecongé fir Independanten.

Dir gesitt, datt de Covid-Virus d’Politik net paralyséiert. D’Dezentraliséierung vun eiser Ekonomie a vun den ëffentleche Verwaltungen, d’Stäerke vun eisem Gesondheetssekteur, d’Fërdere vum lokale Konsum an de lokale Produktiounsketten an d’Schafe vun méi abordabele Wunnraum si weider Prioritéite fir déi kommend Méint.

D’Prioritéitelëscht vun der DP ziilt op eng Verbesserung vum Alldag vun eise Bierger a Biergerinnen – doheem an op der Schaff. Dofir setze mir eis an: virun, wärend an no der Kris.

Deelen:

Facebook
Twitter
LinkedIn
Email
WhatsApp

Weider News

Claude Lamberty

E Solidaritéitspak fir Land a Leit

An der Tribune Libre um Radio schwätzt eise Generalsekretär Claude Lamberty dës Woch iwwert den historesche Solidaritéitspak vun 830 Milliounen Euro, op deen d’Tripartite sech gëeenegt huet, fir d’Leit an d’Betriber duerch déi aktuell Kris ze bréngen.

weiderliesen...

Zesumme géint Russland stoen

A senger Tribune libre um Radio schwätzt eisen Deputéierte Gusty Graas iwwert déi russesch Attacke géint d’Ukrain an iwwert d’Mesuren, déi de fräiheetlech gesënnte Länner géint de Regime vum Wladimir Putin zur Verfügung stinn.

weiderliesen...
Yuriko Backes

Yuriko Backes – déi nei Finanzministesch

Als Finanzministesch ass et eng natierlech Prioritéit, dofir ze suergen, datt ons Staatsfinanze weider gesond bleiwen. Da kënne mir nämlech onst Land gezielt op d’Zukunft virbereeden, an zwar andeems mir an déi nohalteg an an déi digital Entwécklung investéieren.

weiderliesen...

Klimabiergerrot

Am Kader vu senger Ried zur Lag vun der Natioun huet de Premier Xavier Bettel d’Iddi vun engem Klimabiergerrot lancéiert. Enn Januar ass et du lassgaang: An der éischter vu ronn 15 Reunioune sinn d’Membere fir d’éischt  iwwert den aktuelle Stand der Dinge a Saache Klimapolitik informéiert ginn.

weiderliesen...