„Virun der Rentrée hunn ech mech mat de Lëtzebuerger Medie getraff, fir driwwer ze schwätzen, wéi d’EU-Aussepolitik an deenen nächste Jore besser ka finanzéiert ginn. Mat dem neie Global Europe-Fong vun 80 Milliarden Euro, deen ech gehollef hu mat op de Wee ze bréngen, wäert Europa seng Humanitär- an Entwécklungshëllef rationaliséieren, a besser garantéiere kënnen, dass déi international Partner eis Grondwäerter vertrieden.
Ech war dann och zu Gaascht am Kloertext op RTL, fir iwwert d’Situatioun am Afghanistan ze schwätzen. D’Evakuatioun vun EU-Bierger a vu villen, mee leider net alle lokalen Hëllefskräften, huet kloer gemaach, wéi ofhängeg d’EU vun den Amerikaner ass. Mir mussen dowéinst dringend méi strategesch autonom ginn. Konkret brauch een hei eng méi enk politesch Unioun an eng seriö Verdeedegungsunioun.
Zu Stroossbuerg hunn ech dunn och der Kommissiounspresidentin hier Ried zur Lag vun der Unioun nogelauschtert. D‘EU ka sech zu Recht felicitéieren, dass d‘Zil vun enger Vaccinatiounsquot vu 70% erreecht ginn ass. Elo musse méi Efforte gemaach ginn, fir och de Rescht vun der Welt z’impfen.”
Charles Goerens,
Europadeputéierten
