D’DP begréisst ausdrécklech, datt de Radiologiezentrum op der Cloche d’Or an den nächste Méint wäert kënne Patienten empfänken.
D’Assuréen erwaarden sech nämlech méi eng grouss Offer ouni laang Waardezäite bei IRM a Mammographie. All Dag zielt, an a ville Fäll brauch et eng präzis Diagnos fir déi richteg Behandlung.
Am Koalitiounsaccord hunn d’DP an d’CSV méi medezinesch Servicer an eng gréisser Offer un Analysen an den Dokteschcabinete festgehalen. Dokteren, respektiv Doktere mat de Spideeler, musse kënnen deementspriechend d’Initiativen huelen. Dat ass nëmme méiglech, wann d’Spidols- an d’Dokteschgesetz geännert ginn.
Dobäi sollen d’Dokteren – gutt organiséiert a Gesellschaften – an dëse multidisziplinäre Cabineten och kleng chirurgesch Agrëffer, z.B. Katarakt-OPen un den Aen, Routine-Endoskopien, wéi z.B. präventiv Daarmspigelungen, an natierlech Rëntgen, Mammographien, Osteodensitometrien an IRMen duerchféiere kënnen. Eng nei Finanzéierung vun de Cabineten iwwert den Dokteren hir Nomenclature mécht dat méiglech, a kann an engems déi strapazéiert Spidolsbudgeten entlaaschten.
D’DP ënnerstëtzt dës Reform fir eng besser medezinesch Versuergung an e méi séieren Zougang zum Dokter. Mir maachen eis weider dofir staark, datt d’Gesondheet zu Lëtzebuerg eng Prioritéit bleift.
