Question
„ De Krich an der Ukrain dauert elo schonn dräi Joer an déi geopolitesch Situatioun spëtzt sech ëmmer méi zou. Spéitstens elo muss jidderengem kloer sinn, dass spierbar méi an d’Verdeedegung investéiert muss ginn – souwuel op EU-Niveau wéi och hei zu Lëtzebuerg. An dësem Kontext setzt Lëtzebuerg op eng Dual-Use-Strategie, fir sécherzestellen, datt d’wirtschaftlech Retombéeë vun dësen Ausgaben och hei am Land ze spiere sinn.
An deem Kader wollte mir dem Här Minister fir Ekonomie, Mëttelstand, Energie an Tourismus follgend Froe stellen:
- A wat fir engem Mooss droe mir mat eiser nationaler Industrie zur Rüstungsproduktioun bäi?
- A wéi enge Secteure gesäit den Här Minister Potenzial, fir an der Rüstungsindustrie aktiv ze ginn a vläicht och weider Betriber op Lëtzebuerg unzezéien?
- Ginn et zu Lëtzebuerger Betriber, déi elo schonn och d’Rüstungsindustrie an Europa beliwweren, z.B. mat Tëscheprodukter? Falls jo, aus wéi enge Branchë kommen dës Firmen?“
Answer
Fir en Iwwerbléck vun de wirtschaftlechen Acteuren ze kréien déi zu Lëtzebuerg am Beräich vun der Verdeedegungsindustrie an den Dual Use Produiten a Servicer (déi souwuel fir zivil wéi fir militäresch Zwecker benotzt kënne ginn) aktiv sinn huet Luxinnovation den Optrag kritt eng Kartografie vum Verdeedegungs- an Dual-Use Ekosystem zu Lëtzebuerg opzestellen, esou wéi dat an der Äntwert vum 18 Juni 2024 op d’parlamentaresch Fro 767 vum Deputéierten Alex Donnersbach duergeluecht gouf. De Katalog vu Luxinnovatioun, mat de Betriber déi haut schonn – haaptsächlech iwwer Dual Use Produkter – am Beräich vun der Verdeedegung aktiv sinn, ass online disponibel : https://gouvernement.lu/dam-assets/documents/actualites/2024/06/19backes-catalogue/lu-industry-research-capabilities-security-defence-2024.pdf
Déi nei Strategie fir d‘Verdeedegungsindustrie ass de Moment an der Ausaarbechtung a wäert dës Secteure méi genee definéieren. Hei wäert op déi bestoend Stäerkten an Atoute vun der Lëtzebuerger Industrie gesat ginn, déi ënnert anerem an der Cybersécherheet an am Weltraumsecteur leien. Och aner Secteure wäerte berücksichtegt ginn, de Secteur vun der Verdeedegung ass aktuell am Ëmbroch an et ass dermat ze rechnen datt sech nei Opportunitéite kennen erginn. Doriwwer eraus lancéiert d’Regierung Opriff fir Fuerschung- an Entwécklungsprojeten am Beräich vun der Verdeedegungsindustrie, besonnesch fir Dual-Use Technologien, un d’Betriber, deen leschten war am Mäerz 2024 lancéiert ginn. D’Zil vun esou Opriff fir Projeten ass Synergien tëschent der Verdeedegung an anere Secteuren ze fërderen a Fuerschung- an d’Entwécklungsefforten unzestoussen. Esou gëtt déi Lëtzebuerger Industrie ënnerstëtzt fir d’Verdeedegungswäertkette vun der Europäescher Unioun z’integréieren an den nationalen Ekosystem vun der Verdeedegungs an Dual Use Industrie gëtt gestäerkt.
