Yuriko Backes

Yuriko Backes – déi nei Finanzministesch

Yuriko, wat sinn deng Prioritéiten als Finanzministesch? 

Als Finanzministesch ass et eng natierlech Prioritéit, dofir ze suergen, datt ons Staatsfinanze weider gesond bleiwen. Da kënne mir nämlech onst Land gezielt op d’Zukunft virbereeden, an zwar andeems mir an déi nohalteg an an déi digital Entwécklung investéieren. Esou garantéiere mir déi qualitativ Croissance vu muer, déi mir brauchen, fir onse Wuelstand ofzesécheren. Mat gesonde Staatsfinanzen a qualitativem Wuesstem séchere mir awer och onsen Triple A of, deen e wichtege Garant vun onser Attraktivitéit bleift.

Wann ee vun Attraktivitéit schwätzt, dann denken ech natierlech och un ons Finanzplaz. Fir mech bleift et eng Prioritéit, datt d‘Finanzplaz weltwäit konkurrenzfäeg bleift; besonnesch an engem Ëmfeld, dat permanent evoluéiert. D‘Innovatioun am Finanzsecteur muss dofir weider gestäerkt ginn, virun allem a Beräicher wéi der Sustainable Finance an an der Fintech, wou Lëtzebuerg an de leschte Jore vill erreecht huet. Mir musse weider e stabelen an attraktive Kader bidden, deen op d‘Besoine vum Secteur ugepasst ass. 

Wat sinn déi grouss Dossieren an der nächster Zäit?

Ech gesinn eng Rei Dossieren, déi extrem wichteg si fir onst Land a fir d’Leit. An den nächste Wochen a Méint wäerte mir ons weider mat der Fro vun der Kafkraaft beschäftegen. Mir hunn hei vill iwwert déi lescht Jore gemaach a wäerten och weider kucken, wéi mir d’Kafkraaft verstäerke kënnen.

Weider stinn europäesch an international Dossieren op der Agenda, wéi zum Beispill d’Ëmsetzung vun der internationaler Steierreform vun der OECD. Lëtzebuerg huet sech vun Ufank u proaktiv un deene Verhandlunge bedeelegt, well mir e modernen a faire Steiersystem brauchen, wou jiddereen op der Welt säi Bäitrag leescht. Dat wichtegst ass awer, dass déi selwecht Reegele fir alleguerten d’Länner gëllen (level playing field). Esou ka Lëtzebuerg seng Stäerkten nach besser spille loossen.

Firwat d’DP?

D‘Demokratesch Partei steet fir eng liberal, mee och fir eng sozial an nohalteg Politik, an et ass déi Kombinatioun, déi fir mech ganz wichteg ass. D’DP ass eng Partei vun der Mëtt vun der Gesellschaft, déi eng responsabel a wäitsiichteg Politik mécht, an dobäi ëmmer de Mënsch an de Mëttelpunkt stellt. Et sinn also engersäits déi liberal a progressiv Wäerter, fir déi ech mech engagéieren. Op der anerer Säit huet d’DP konkret a pragmatesch Léisungsvirschléi, wéi si déi grouss Erausfuerderunge vun eiser Zäit wëll ugoen, an dat op nationalem, europäeschem an op internationalem Niveau. Fir dass et sech och nach muer an iwwermuer gutt zu Lëtzebuerg liewe léisst.

Deelen:

Facebook
Twitter
LinkedIn
Email
WhatsApp

Weider News

Claude Lamberty

E Solidaritéitspak fir Land a Leit

An der Tribune Libre um Radio schwätzt eise Generalsekretär Claude Lamberty dës Woch iwwert den historesche Solidaritéitspak vun 830 Milliounen Euro, op deen d’Tripartite sech gëeenegt huet, fir d’Leit an d’Betriber duerch déi aktuell Kris ze bréngen.

weiderliesen...

Zesumme géint Russland stoen

A senger Tribune libre um Radio schwätzt eisen Deputéierte Gusty Graas iwwert déi russesch Attacke géint d’Ukrain an iwwert d’Mesuren, déi de fräiheetlech gesënnte Länner géint de Regime vum Wladimir Putin zur Verfügung stinn.

weiderliesen...

Klimabiergerrot

Am Kader vu senger Ried zur Lag vun der Natioun huet de Premier Xavier Bettel d’Iddi vun engem Klimabiergerrot lancéiert. Enn Januar ass et du lassgaang: An der éischter vu ronn 15 Reunioune sinn d’Membere fir d’éischt  iwwert den aktuelle Stand der Dinge a Saache Klimapolitik informéiert ginn.

weiderliesen...