Gilles Baum

Et geet kee Wee méi laanscht eng sektoriell an alters-spezifesch Impfflicht

Léif Nolauschterinnen, Léif Nolauschterer,

D’Chamber huet d’virlescht Woch iwwert eng Impfflicht hei am Land diskutéiert an d’Parlament huet d’Regierung dozou opgeruff, fir kuerzfristeg – d.h. bannent 3 Méint – e Gesetzprojet auszeschaffen, deen eng obligatoresch Vaccinatioun fir all Leit iwwer 50 Joer a fir alleguerten d’Beschäftegt aus dem Gesondheets- a Fleegesecteur an aus de Rettungsdéngschter virgesäit. Déi Impfflicht soll am Ufank emol fir 2 Joer gëllen. Sollt eng nei, méi geféierlech Variant vum Covid-Virus fir déi méi jonk Altersgruppen opdauchen, da kéint déi Altersbarrière eventuell erofgesat ginn.

D’Haapt-Ziler si kloer :

  1. Déi medezinesch Servicer am Land – zemol an de Spideeler – garantéieren ;
  2. Besonnesch d’Risiko-Gruppen iwwer 50 Joer schützen ;
  3. Schwéier Verleef no enger Ustiechung mam Virus esou wäit ewéi méiglech auszeschléissen.

D’ Demokratesch Partei huet sech bei hirer Decisioun op de Rapport vum Expertegrupp baséiert – also op wëssenschaftlech Erkenntnisser, op d’Erfahrungen vun dene Leit, déi all Dag dobaussen um Terrain mam Virus ze din hun.

D’Regierung soll och eng Etude iwwert den Impakt op d’Spideeler vun de Leit ënner 50 Joer maachen, déi positiv sinn.

D’Chamber huet weider no fiabele Chifferen iwwert de Impf-Taux bei de viséierte Alters- a Beruffsgruppe gefrot.

De gefuerderte Gesetzprojet muss elo säi Wee duerch Instanze goen.

Esou eng Mesure wéi d’Impfpflicht fällt enger liberaler Partei net liicht: Ech kann iech versécheren, datt mir net gären op de Wee vun enger Impfflicht ginn (esouguer, wa se net generell ass). Ma mir gesi keen anere Wee méi, fir weider schwéier Kranker an Doudeger esou wäit ewéi méiglech z’evitéieren.

Mir setzen dobäi awer och weider op fräiwëlleg Impfungen. Dat gëllt zemol fir d’Alterstranche tëschent 20 Joer an 29 Joer, an där den Taux am niddregsten ass.

Léif Nolauschterinnen, Léif Nolauschterer,

Mir hate gehofft, datt Appeller zur Solidaritéit géingen duer goen, fir de Virus an de Grëff ze kréien. Dat ass awer net de Fall. Dofir si mir elo um Punkt ukomm, wou kee Wee méi laanscht eng sektoriell an alters-spezifesch Impfflicht geet: Besonnesch aus Solidaritéit mat de vulnerabele Leit an aus Solidaritéit mat dem Personal aus dem Gesondheets- a Fleege-Secteur.

Ma och aus Respekt virun der grousser Majoritéit vun eise Bierger, déi sech vun Ufank un all d’Mesuren an d’Contrainte gehalen hunn. Et dierf op kee Fall d’Gefill bei hinnen opkommen, wéi wann hir Efforte ëmsoss gewiescht wieren. Well si all sinn d’Basis um Wee zeréck an d’Normalitéit.

Ech soen iech Merci.

Deelen:

Facebook
Twitter
LinkedIn
Email
WhatsApp

Weider News

André Bauler

Talent attraction zu Lëtzebuerg

A senger Tribune Libre um Radio huet eisen Deputéierten André Bauler dës Woch doriwwer geschwat, wéi wichteg et fir Lëtzebuerg ass, fir weider attraktiv fir héichqualifizéiert an innovativ Talenter och aus dem Ausland ze bleiwen; besonnesch am Finanzsekteur.

weiderliesen...
Gusty Graas

E raisonnabelen Accord salarial an der Fonction publique

A senger Tribune Libre um Radio huet de Gusty Graas dës Woch iwwert de leschten Accord salarial an der Fonction publique geschwat. Fir eisen Deputéierten ass dat e raisonnabelen Accord, dee weist, datt de Ressortminister Marc Hansen an d’CGFP e konstruktiven Dialog gefouert hunn, deen och an Zukunft fir soziale Fridden am ëffentlechen Déngscht suergt.

weiderliesen...
Guy Arendt

Eng Digitalisatioun fir all Mënsch

A der Tribune Libre vun der DP huet eisen Deputéierte Guy Arendt dës Woch iwwer d’Wichtegkeet vun der digitaler Inclusioun zu Lëtzebuerg geschwat. Dat heescht iwwer d’Efforten, déi hei am Land geholl ginn, fir datt all Mënsch ka mat an dat neit, digitaalt Zäitalter geholl ginn.

weiderliesen...