« De Koalitiounsaccord gesäit vir, de « système de contrôle et d’information du trafic sur les autoroutes (CITA) » op de Leescht ze huele fir en den technologeschen Entwécklungen unzepassen. Donieft soll och eng koherent informatesch Strategie ausgeschafft an déi informatesch Architektur vun der Administration des ponts et chaussées ausgebaut ginn, fir d’Verkéiersfluxe besser ze geréieren an eng besser Informatioun zur Verfügung ze stellen.
An deem Kader wollt ech dem Här Minister fir Mobilitéit an ëffentlech Aarbechte folgend Froe stellen:
– Wéi wäit ass d’Evaluatioun vum CITA ?
– Wat wieren eventuell éischt Konklusiounen ? Ass virgesinn, de CITA auszebauen ? Kann den Här Minister Prezisiounen heizou ginn ?
– Wéi wäit ass d’Ausschaffe vun der genannter informatescher Strategie ? Kann den Här Minister och heizou weider Informatioune ginn ? »
Äntwert
Am Summer 2020 ass d’Dokument « CITA vision stratégique 2030 » ofgeschloss ginn, an deem dräi Achsen festgehale goufen : Capitaliser, Moderniser, Enrichir. Dat bedeit dass éischtens déi Elementer identifizéiert ginn, déi e bleiwende Wäert hunn, zweetens verschidden Elementer dem technesche Fortschrëtt ugepasst wäerte ginn an drëttens nei Elementer dobäi solle kommen, déi et bis lo nach net gouf. Sou sollen an Zukunft z.B. dynamesch Vitessmodulatioune méiglech sinn an d’dynamescht Op- an Zoumaache vu Standspueren zu Spëtzenzäiten.
