Déi douce Mobilitéit weiderbréngen, de Mënsche méi Plaz am ëffentleche Raum ginn, d’Stad nach méi attraktiv maachen: Scho virun der Pandemie ass um Knuedler vill doru geschafft ginn, ma Covid huet ouni Zweiwel gehollef, fir Projeten nach méi séier ëmzesetzen.
„Un Iddie fir d’Stad nach méi flott ze gestalten, feelt et net. Mee dat geet dacks net vun haut op muer“, sou de Stater Mobilitéitsschäffe Patrick Goldschmidt. Wichteg wier virun allem, eng sécher a biergerfrëndlech Infrastruktur ze schafen, wou d’Leit sech wuel fillen.
An deem Kontext si besonnesch zwee rezent Projete ze nennen: d’Beaumontsgaass, déi ewell Foussgängerzon ass, an de Gruef, neierdéngs „shared space“ – an och fir de Vëlo an déi zwou Richtungen op. Déi zwou Stroosse gi spéider nach duerch Bornen ofgeséchert.
Grad fir de Vëlo huet sech vill gedoen: vun der Vëlosbréck Cents-Kierchbierg, déi no jorelaangen Diskussiounen decidéiert ginn ass, iwwert déi nei Vëlospisten an der Neier an an der Aler Avenue, bis bei déi éischt „Vëlosstroossen“ am Land, an deenen de Vëlo Prioritéit huet.
„De Virworf, dass an der Stad just op den Auto gesat gëtt, loossen ech net gëllen. Den Auto huet an de leschte Jore vill Plaz zu Gonschte vum Vëlo a vum ëffentlechen Transport ofginn“, sou de Patrick Goldschmidt. „A fir déi nächst zwee Joer sinn nach en etlech Mobilitéitsprojeten an der Maach.“
Patrick Goldschmidt,
Schäffen Stad Lëtzebuerg
